داريعا تۋرالى تولعاۋ
kerey.kz
سارا قوناقاەۆا ۇلكەن قىزىنىڭ دا داۋىرلەگەن ساتتەرى جوق ەمەس. 2006 جىلدىڭ جازى. ماسكەۋدىڭ قاق ورتاسىنداعى تۆەرسكايا كوشەسى. كگب-فسب پولكوۆنيگى پيوتر ستەفانوۆيچ پارشيكوۆپەن اڭگىمە-دۇكەن قۇردىم. بۇل كىسى دە ءجاي ادام ەمەس. كۋبا رەۆوليۋتسياسى كوسەمدەرى – فيدەل كاسترو مەن چە گەۆارامەن ارالاسقان راديو، تەلەكوممۋنيكاتسيا تىڭشىسى بولىپ تابىلادى. سونداي بىلىكتى ارداگەر دە اپايىمىزدى سىيلاپ، تامسانا ايتپاي ما: “داريعا، داريعا…” ارينە، جوعارى جاقتا جۇرگەندەردىڭ كوبىسى وڭباي تۇرعان قانىشەر، جەمقورلار ەكەندىگى ايدان انىق. سونىڭ وزىندە دە، ءانشى-بيكەشتىڭ سىڭگەن ەڭبەگىن جوققا شىعارۋعا بولمايدى. ونىڭ سىرلاس دوسى، مايرا مۇحاممەدقىزى، اتاقتى پاريج وپەراسى ساحناسىدان جارقىراپ كورىندى. قازاق-تاتار مۋزىكا مامانى راۆيل گيزاتۋلين ماعان بىلاي دەدى: “مايرانىڭ داۋىسى – سوپرانو. الەم بويىنشا، كۇشتى سوپرانو انشىلەر تولىپ تۇر. داريعانىڭ قولداۋىسىز مايرا ءپاريجدىڭ تورىنە شىقپاس ەدى”.
سونىمەن، داكەڭ – سىرتقى ساياساتىمىزدىڭ بەلدى ويىنشىلارىنىڭ ءبىرى. نەگە دەسەڭىزدەر؟ ويتكەنى، تەگەۋرىندى شەتەلدىكتەردىڭ ءبىرازى الگى بيكەشتى تانيدى. مىسالى، 2004 جىلى، الماتىداعى “پاللاديۋم” تۇنگى كلۋبىندا اقش مىقتى ساياساتكەرلەرىنىڭ ءبىرى، ريچارد حولبرۋكتىڭ تۋعان كۇنى تويلاندى. ءوز باسىم كۋا بولدىم حولبرۋك مىرزانىڭ العىس ايتقانىنا: “داريعا! وسى مەرەكەلى كەشتى ەشقاشان ۇمىتپايمىن!” ال، 2019 جىلى، كسرو حالىق ءارتىسى، كەرەمەت سازگەر ەۆگەني دميتريەۆيچ دوگانىڭ كيشينەۆتىك ۇيىندە قوناق بولدىم. اڭگىمە بارىسىندا ماەسترو ماعان بىلاي دەدى: “داريعا ءوز ديسكتەرىن تاماشا شىعاردى! ولاردىڭ دىبىس ساپاسى مەن پوليگرافيا كوركەمدەۋلىگى – ۇلگى ەتەرلىك دۇنيە!” كوردىڭىزدەر مە؟ قانشا ايتقانمەن، وزگە جۇرتتىڭ وكىلدەرى كوبىنەسە ءماسىموۆ-قاسىموۆتاردى ەمەس، داريعا حانىمدى ءسوز ەتەدى. بالكىم، ونىڭ بۇرىنعى كۇيەۋى دە ءانشى-بيكەشتىڭ كوزقاراسىنا يگى اسەر ەتتى. راحات مۇحتارۇلى اليەۆ قازاق فۋتبولىن ەۋروپالىق وداققا كىرگىزىپ، ەلىمىزدەگى وسى سپورت ءتۇرىنىڭ دامۋىنا جاڭا سەرپىلىس بەرگەنى ءسوزسىز. ال، قازاقستاننىڭ قازىرگى ديپلوماتياسىنىڭ تۇتقاسىن ۇستاعان اكىمسىماقتار ەلىمىزدى كەرى قايتارۋ ءۇشىن، ءبىزدى سارى ورىس پەن قارا قىتايدىڭ باعىتىنا يتەرمەلەيدى.
بىراق، بىرنەشە جاعدايلاردا ارعىن قىزى ءمۇلت كەتتى. مىسالى، دەرەكتى فيلمدەردىڭ رەجيسسيورى ستانيسلاۆ پەتروۆيچ چەرنىشەۆ 2000-شى جىلداردىڭ باسىندا “قازاقفيلم” كينوستۋدياسىنىڭ جەتەكشىسى بولۋعا ۇمتىلدى. ماقالامىزدىڭ باس كەيىپكەرى مولدوۆا تۋماسىن قولدامادى. تاجىريبەلى كينو قايراتكەرى وتاندىق فيلمدەردىڭ قارا شاڭىراعىن كوركەيتەر ەدى. ءازىموۆ، امانشاەۆ سىندى پىسىقايلارمەن سالىستىرعاندا، سەكەڭ كينو سالاسى مەن قازاقستانعا بەرىلگەن ادام عوي. ەسەسىنە، داريعا اپايىمىز ۇلتى بەلگىسىز ءسوزۋار ۆولودەنكا رەريحكە دەمەۋشىلىك جاسادى، يزرايل ازاماتى الەكساندر كلەبانوۆكە ەلىمىزدىڭ تەلەكوممۋنيكاتسيا سالاسىن امانات ەتتى. 
گۇرجىستاننىڭ بۇرىنعى پرەزيدەنتى ميحايل سااكاشۆيلي تۋعان ەلىنىڭ قۇقىق قورعاۋ جۇيەسىن ەداۋىر جاقسارتتى، پاراقورلىقتىڭ دەڭگەيىن ايتارلىقتاي تومەندەتتى. الايدا، ميحونىڭ ءوزى تالاي قىلمىس جاساپ، گۇرجىستان تاراپىنان اشىلعان قىلمىستىق ىستەردىڭ ايىپتالۋشىسىنا اينالدى. ۋكراينادا تىعىلعان ميشيكو كوكاين پايدالاناتىن ناشاقور. ونىڭ تاكاپپارلىعىنا ءوز باسىم بىرنەشە رەت كۋا بولدىم. نازارباي تەگىمەن جامىلعان بيكەش تە سونداي. اراق ءىشۋدى جاقسى كورەدى تەمىرتاۋلىق قىز. قاتارداعى ادامدارعا شەكەسىنەن قارايدى ميللياردەر-ايەل. بىراق، ءانشى-بيكەشتىڭ قازىرگى كۇردەلى جاعدايىن ەسەپكە الىپ، داريعا اپايىمىزعا ساتتىلىك تىلەيمىن! ونىڭ جاقسى جەرلەرى جوعارىدا اتالعان كەمشىلىكتەرىنەن ارتىق بولا بەرسىن!
دانيار ناۋرىز
پىكىر قالدىرۋ