ولار بالا كەزىندە زەڭگىر اسپاندى جەبەدەي ءتىلىپ، ارتىنا اقشۋلان سىزىق قالدىرا زىمىراپ بارا جاتقان ۇشاققا قىزىعا قارايتىن. سوسىن، كوك مايساعا شالقادان جاتىپ الىپ، تەمىر قانات قۇستىڭ سوڭىندا بىلتەلەنگەن بۋالدىر ءىزدى كوزبەن ۇزاتقاندا ولاردىڭ قيال قۇسى دا بيىكتەپ بارا جاتۋشى ەدى. «شىركىن، انا اەروپلانعا وتىرىپ ۇشار ما ەدى، كىم ايداپ بارا جاتىر ەكەن، ءا!» دەيتىن سوندا.

بۇل كوپ بالانىڭ باسىنان وتكەن ارمان. تالاي بالا كوكتەگى ۇشاققا باس كيىمىن بۇلعاي ايقايلاپ، جەتىپ الاتىنداي سوڭىنان جۇگىرەتىن. بىراق، ارماننىڭ ءبارى ورىندالىپ، قۋعاننىڭ ءبارى جەتكىزۋشى مە ەدى. وعان تەك ارمانىنا دارمەنى، قيالىنا قابىلەتى ساي تاڭداۋلىلار عانا يە بولادى ەمەس پە؟ سول تاڭداۋلىلاردىڭ قاتارىنا ەربولات قۇلاتايۇلى دا قوسىلىپتى. بۇگىندە حالىقارالىق رەيستەر مەن ەل ىشىندەگى اۆياتسيا سالاسىندا ەڭبەك ەتىپ جۇرگەن ۇشقىش ءبىزدى بەيجاي قالدىرمادى.
2001 جىلى قىتاي حالىق رەسپۋبليكاسىنداعى التايدىڭ شىڭگىل اۋدانىندا تۋعان ەربولات ورتا مەكتەپتى بىتىرىسىمەن اڭسارى اۋىپ، اتامەكەنگە جول تارتىپتى. شەتەلدەن كەلگەن وزگە بالالارمەن قاتار، الدىمەن ءبىر جىل دايىندىق كۋرسىندا وقيدى. ۇشقىش بولۋ ونىڭ بالا كۇنگى ارمانى ەدى عوي. الماتىعا كەلە قالانى ارالاپ ءجۇرىپ، اۋەجاي جاقتاعى ازاماتتىق اۆياتسيا اكادەمياسىن تاۋىپ الادى. وسىندا وقىسام دەپ تالاپتانعان البىرت جاس ەمتيحانعا جاتپاي-تۇرماي دايىندالادى. ءسويتىپ، 2002 جىلى كوزدەگەن وقۋ ورنىنا الدىڭعىلاردىڭ ءبىرى بولىپ تۇسەدى.
ماتەماتيكا، گەومەتريا، الگەبرا سەكىلدى دالدىكتى سۇيەتىن پاندەردى «شەكىلدەۋىكشە شاققان» ول اكادەمياداعى ۇلگىلى ستۋدەنتتەردىڭ ءبىرى بولا ءبىلدى. «العاش وقۋعا كەلگەندە بىزگە قولداۋ كورسەتىپ، ءبىلىمىمىزدى باعالاعان اكادەميا پرورەكتورى ەرمەك سانسىزبايۇلى ابدرامانوۆقا راحمەتىمدى ايتامىن. ول كىسى دە بىلىكتى اعا بۋىن مامانداردىڭ ءبىرى. قازاقستان جەرىنە العاش «يل-76» جۇك سامولەتىن قوندىرعان ۇشقىش سول كىسى ەكەن» دەيدى ەربولات ۇستازىنا ىستىق ىقىلاسىن ءبىلدىرىپ.
2006 جىلى اكادەميانى تامامداعان جىگىت 2007 جىلى اۆيا­تسيا كوللەدجىندە بەس اي ساباق بەرەدى. سول جىلى كوكتەمدە جامبىل وبلىسىنىڭ تولەبي اۋدانىندا جۇمىسقا كىرىسەدى. «ان-2» ۇشاعىمەن مويىنقۇم، تولەبي اۋدانى وڭىرلەرىندە ەگىنگە، جوڭىشقاعا، ارام شوپتەرگە ءدارى شاشادى. «ان-2-مەن» اسپان كەزگەن ونىڭ قىزمەتى قىزىلوردادا جالعاسىپ، گەولوگتارمەن بىرگە ءۇش اي جۇمىس ىستەيدى. العاشىندا ماۋسىمدىق جۇمىستاردا تاجىريبە جيناعان ول قوستانايداعى «اۆيا جاينار» كومپانياسىنا ورنالاسىپ، «ان-2» ۇشاعىمەن ەگىس القاپتارىن حيميالىق وڭدەۋگە قاتىسادى.
2010 جىلى قىرعىزستانداعى «ماناس» ترەنينگ ورتالىعىندا ءبىر جارىم ايلىق كۋرستى وقىعان سوڭ ەربولات تىكۇشاقتى مەڭگەرۋگە كوشەدى. توتەنشە جاعدايلار مي­نيسترلىگىنىڭ «قازاۆيا قۇتقارۋ» مەكەمەسىنە قابىلدانادى.
بۇگىندە بالا كۇنگى ارماندى اقيقاتقا اينالدىرعان ەربولاتتىڭ جالپى ۇشۋ ۋاقىتى 1 مىڭ 600 ساعات بولىپتى.
بىلتىر رەسەيدىڭ تۇمەن وبلىسىندا «مي-26» تىكۇشاعىن باسقارۋ كۋرسىنان ءوتتى. ول قازىر «قازاۆيا قۇتقارۋ»، قۇرامىنىڭ «مي-26» تىكۇشاعىنىڭ ۇشقىشى. اتالعان اۋە تەحنيكاسى تەك اپاتتى جاعدايلار مەن اسا قاجەت جايتتاردا عانا اسپانعا كوتەرىلەدى. الەمدەگى ەڭ ءىرى ازاماتتىق تىكۇشاق سانالاتىن «مي-26» – ەلىمىز اۆيا­تسيا سالاسىنداعى قىمبات ءارى وزىق اۋە كولىگى. ونىڭ توتەنشە وقيعالار كەزىندەگى مۇمكىندىگى وراسان زور.
ايتا كەتەرلىگى، ەكى «مي-26» الداعى مامىر ايىندا استانادا وتەتىن جەڭىس مەرەكەسىنە ارنالعان شەرۋگە قاتىسادى. بۇيىرتسا، ونىڭ بىرەۋىنىڭ شتۋرۆالىندا ەربولات قۇلاتايۇلى وتىراتىن بولادى.

مۇرات الماسبەكۇلى

astana-akshamy.kz