Olar bala kezinde zeñgir aspandı jebedey tilip, artına aqşulan sızıq qaldıra zımırap bara jatqan wşaqqa qızığa qaraytın. Sosın, kök maysağa şalqadan jatıp alıp, temir qanat qwstıñ soñında biltelengen bualdır izdi közben wzatqanda olardıñ qiyal qwsı da biiktep bara jatuşı edi. «Şirkin, ana aeroplanğa otırıp wşar ma edi, kim aydap bara jatır eken, ä!» deytin sonda.

Bwl köp balanıñ basınan ötken arman. Talay bala köktegi wşaqqa bas kiimin bwlğay ayqaylap, jetip alatınday soñınan jügiretin. Biraq, armannıñ bäri orındalıp, quğannıñ bäri jetkizuşi me edi. Oğan tek armanına därmeni, qiyalına qabileti say tañdaulılar ğana ie boladı emes pe? Sol tañdaulılardıñ qatarına Erbolat Qwlataywlı da qosılıptı. Büginde halıqaralıq reyster men el işindegi aviaciya salasında eñbek etip jürgen wşqış bizdi beyjay qaldırmadı.
2001 jılı Qıtay halıq respublikasındağı Altaydıñ Şiñgil audanında tuğan Erbolat orta mektepti bitirisimen añsarı auıp, atamekenge jol tartıptı. Şetelden kelgen özge balalarmen qatar, aldımen bir jıl dayındıq kursında oqidı. Wşqış bolu onıñ bala küngi armanı edi ğoy. Almatığa kele qalanı aralap jürip, äuejay jaqtağı Azamattıq aviaciya akademiyasın tauıp aladı. Osında oqısam dep talaptanğan albırt jas emtihanğa jatpay-twrmay dayındaladı. Söytip, 2002 jılı közdegen oqu ornına aldıñğılardıñ biri bolıp tüsedi.
Matematika, geometriya, algebra sekildi däldikti süyetin pänderdi «şekildeuikşe şaqqan» ol akademiyadağı ülgili studentterdiñ biri bola bildi. «Alğaş oquğa kelgende bizge qoldau körsetip, bilimimizdi bağalağan akademiya prorektorı Ermek Sansızbaywlı Abdramanovqa rahmetimdi aytamın. Ol kisi de bilikti ağa buın mamandardıñ biri. Qazaqstan jerine alğaş «IL-76» jük samoletin qondırğan wşqış sol kisi eken» deydi Erbolat wstazına ıstıq ıqılasın bildirip.
2006 jılı Akademiyanı tämamdağan jigit 2007 jılı Avia­ciya kolledjinde bes ay sabaq beredi. Sol jılı köktemde Jambıl oblısınıñ Tölebi audanında jwmısqa kirisedi. «AN-2» wşağımen Moyınqwm, Tölebi audanı öñirlerinde eginge, joñışqağa, aram şöpterge däri şaşadı. «AN-2-men» aspan kezgen onıñ qızmeti Qızılordada jalğasıp, geologtarmen birge üş ay jwmıs isteydi. Alğaşında mausımdıq jwmıstarda täjiribe jinağan ol Qostanaydağı «Avia Jaynar» kompaniyasına ornalasıp, «AN-2» wşağımen egis alqaptarın himiyalıq öñdeuge qatısadı.
2010 jılı Qırğızstandağı «Manas» trening ortalığında bir jarım aylıq kurstı oqığan soñ Erbolat tikwşaqtı meñgeruge köşedi. Tötenşe jağdaylar mi­nistrliginiñ «Qazavia qwtqaru» mekemesine qabıldanadı.
Büginde bala küngi armandı aqiqatqa aynaldırğan Erbolattıñ jalpı wşu uaqıtı 1 mıñ 600 sağat bolıptı.
Bıltır Reseydiñ Tümen oblısında «MI-26» tikwşağın basqaru kursınan ötti. Ol qazir «Qazavia qwtqaru», qwramınıñ «MI-26» tikwşağınıñ wşqışı. Atalğan äue tehnikası tek apattı jağdaylar men asa qajet jayttarda ğana aspanğa köteriledi. Älemdegi eñ iri azamattıq tikwşaq sanalatın «MI-26» – elimiz avia­ciya salasındağı qımbat äri ozıq äue köligi. Onıñ tötenşe oqiğalar kezindegi mümkindigi orasan zor.
Ayta keterligi, eki «MI-26» aldağı mamır ayında Astanada ötetin Jeñis merekesine arnalğan şeruge qatısadı. Bwyırtsa, onıñ bireuiniñ şturvalında Erbolat Qwlataywlı otıratın boladı.

Mwrat ALMASBEKWLI

astana-akshamy.kz