ەلباسى نازارباەۆ ۋنيۆەرسيتەتىنىڭ العاشقى تۇلەكتەرىنە ديپلوم بەرۋ راسىمىنە قاتىستى
kerey.kz
جينالعاندارعا ءسوز ارناعان مەملەكەت باسشىسى تۇلەكتەردى، ولاردىڭ اتا-انالارىن، قامقورشىلىق كەڭەسىنىڭ مۇشەلەرىن، باسشىلىقتى، پروفەسسورلار مەن ۋنيۆەرسيتەت قىزمەتكەرلەرىن العاشقى لەكتىڭ بىتىرۋىمەن قۇتتىقتادى، سونداي-اق مەتسەناتتارعا العىس ايتتى-دەپ حابارلايدى اقوردا باسپا ءسوز قىزمەتى.
نۇرسۇلتان نازارباەۆ ديپلوم تاپسىرۋ ءراسىمى ۋنيۆەرسيتەت قانا ەمەس، بۇكىل رەسپۋبليكا ءۇشىن دە ماڭىزدى وقيعا ەكەنىن اتاپ ءوتتى.
– تاريحىمىزداعى العاشقى حالىقارالىق دەڭگەيدەگى عىلىمي جانە ءبىلىم بەرۋ ورتالىعىنىڭ – جەتەكشى جوعارى ءبىلىم بەرۋ ورنىنىڭ تۇڭعىش تۇلەكتەرى ەندى بۇكىل قازاقستاننىڭ ومىرىنە ارالاسقالى وتىر. ەلىمىز جاس، جان-جاقتى دايارلانعان، بىلىكتى مامانداردىڭ جاڭا بۋىن وكىلدەرىنە يە بولدى. بۇل اسىرەسە، ۇلت جوسپارى نەگىزىندە مەملەكەتتى جاڭعىرتۋ جونىندەگى تەرەڭ وزگەرىستەرگە كىرىسىپ جاتقان قازىرگىدەي كەزدە ايرىقشا ماڭىزدى، – دەدى قازاقستان پرەزيدەنتى.
مەملەكەت باسشىسى استانادا وسىنداي ۋنيۆەرسيتەت اشۋ ارقىلى جاھاندىق ءبىلىم بەرۋدىڭ قۋاتتى جاڭا وشاعى قالىپتاسقانىن اتاپ ءوتتى.
– ول ءبىزدىڭ ەكونوميكامىز مەن ءومىرىمىزدى بىلىممەن، عىلىمي جاڭالىقتارمەن، يننوۆاتسيامەن ەسەلەيتىن بولادى. ازاماتتارىمىزدىڭ ءومىرىن جاقسى جاعىنا وزگەرتىپ، ولاردىڭ بويىنا باستاماشىلىق پەن وتانشىلدىقتى، ۇزدىكسىز وقۋ مەن كاسىبي ءوسۋدىڭ ماشىعىن ورنىقتىرادى بۇنىڭ ءبارى قازاقستاننىڭ تۇراقتى جانە جاھاندىق تۇرعىدان دامىعان مەملەكەت رەتىندە ءومىر ءسۇرۋى ءۇشىن، ءوز مەملەكەتىمىزدى جاڭعىرتىپ، نىعايتۋ ءۇشىن، وتانىمىزدىڭ بەدەلى مەن الەمگە تانىمالدىعىن ارتتىرۋ ءۇشىن جاسالۋدا. سىزدەرگە ومىرلىك جولداما بەرۋ ارقىلى ءبىز وسى كوكەيتەستى ماقساتىمىزعا قاراي جاقىنداي تۇستىك، – دەدى نۇرسۇلتان نازارباەۆ.
قازاقستان پرەزيدەنتى تۇلەكتەرگە ۋنيۆەرسيتەتتىڭ تاريحي ءتىزىمىنىڭ باسىندا تۇرۋ مارتەبەسى بۇيىرىپ وتىرعانىنا نازار اۋداردى.
– ۋنيۆەرسيتەتتەگى دايارلىق دەڭگەيىن سىزدەر ارقىلى، سىزدەردىڭ ىستەرىڭىز ارقىلى باعالايتىن بولادى، بۇل – ايرىقشا جاۋاپكەرشىلىك. مەن سىزدەردىڭ ارقايسىڭىزدان زور قۇلشىنىس پەن كاسىبي دەڭگەي كۇتەمىن. سىزدەردىڭ وقۋلارىڭىز العاشقى ديپلومدى الۋمەن اياقتالمايدى. ول ءومىر بويى جالعاسادى. ەڭ باستى ومىرلىك تاجىريبەنى وقۋدان كەيىن مەڭگەرەسىزدەر. وعان قالاي قول جەتكىزۋدى سىزدەرگە بەس جىل بويى وقىتتى. ەگەر ماماندىقتارىڭىز بەن ەڭبەكتەرىڭىز ومىرلىك سۇيىكتى ىستەرىڭىزگە اينالماسا، جاتتالعان نارسە تەز ۇمىتىلۋى مۇمكىن. ءوز ءىسىنىڭ ناعىز كاسىپقويى تەك ءبىلىپ قانا قويمايدى، بىلگەنىن ناقتى ىسكە اسىرا دا الادى. ۋنيۆەرسيتەتتىڭ بارلىق تۇلەكتەرى وسىنداي كاسىپقويلار بولاتىنىنا سەنەمىن، – دەدى مەملەكەت باسشىسى.
بۇل ورايدا، نۇرسۇلتان نازارباەۆ تۇلەكتەر ءوز ءىسىنىڭ شەبەرى عانا بولىپ قويماي، قازاقستان قوعامىنىڭ ادامگەرشىلىك قۇندىلىقتارىن دا جان-جاقتى نىعايتىپ، ءوز وتانىنا قىزمەت ەتۋدىڭ بيىك ۇلگىسىن تانىتاتىنىنا، حالقىمىزدىڭ ماتەريالدىق، رۋحاني جانە مادەني قۇندىلىقتارىن ەسەلەۋ ىسىنە زور ۇلەس قوساتىنىنا ايرىقشا سەنىم ءبىلدىردى.
قازاقستان پرەزيدەنتى ەلىمىزدىڭ ءبىلىم بەرۋ سالاسىنداعى بىرقاتار جەتىستىكتەرىنە توقتالىپ ءوتتى.
– دۇنيەجۇزىلىك ەكونوميكالىق فورۋم جاريالاعان ادامي كاپيتالدى دامىتۋ يندەكسىنە سايكەس، قازاقستان ءبىر جىلدا بىردەن 8 ورىنعا كوتەرىلىپ، 37-ورىنعا شىقتى جانە ەكونوميكالىق ىنتىماقتاستىق جانە دامۋ ۇيىمىنا مۇشە پورتۋگاليا، گرەكيا، يسپانيا، چيلي، مەكسيكا، تۇركيا، سونداي-اق مالايزيا، قىتاي، برازيليا سياقتى ەلدەردەن وزدى. ەلدىڭ ساۋاتتىلىق دەڭگەيىنىڭ رەيتينگى بويىنشا قازاقستان 33-ورىندى يەلەندى، ال ءبىلىم بەرۋ جۇيەسىنىڭ ساپاسى جونىنەن بىردەن 9 تارماققا كوتەرىلدى. بۇل تابىستارعا سىزدەردىڭ ۋنيۆەرسيتەت تە زور ۇلەس قوستى، – دەدى نۇرسۇلتان نازارباەۆ.
مەملەكەت باسشىسى ۋنيۆەرسيتەت تۇلەكتەرى مەملەكەتىمىزدىڭ جاڭا بۋىن ەليتاسىنىڭ نەگىزى ەكەنىن اتاپ ايتتى.
– ەلدى دامىتىپ، حالىقتى باقىتقا، باق-بەرەكەگە جەتكىزۋ ءىسى سىزدەرگە جۇكتەلەدى. مۇنىڭ قانشالىق قيىن ءىس ەكەنىن مەن جاقسى بىلەمىن. بۇگىنگىدەي جاھاندانۋ جاعدايىندا سىزدەرگە تۇراقتىلىق پەن دامۋ قارقىنىن ۇستاپ تۇرۋدان دا ارتىعىراق ماقساتقا ۇمتىلۋ قاجەت بولادى. سىزدەرگە «باستان اسىپ سەكىرە المايسىڭ» دەپ قانشا جەردەن نىقتاسا دا، بيىك مەجە قويۋعا تۋرا كەلەدى. ەگەر سىزدەردە قازىر بەكەم ءارى باتىل امبيتسيا بولماسا، وندا كەيىن تابىسقا جەتۋ ءۇشىن كۇش-جىگەر تابۋ قيىن بولادى، – دەدى قازاقستان پرەزيدەنتى.
نۇرسۇلتان نازارباەۆ ۋنيۆەرسيتەتتىڭ ديپلوم يەگەرلەرىن جۇمىسقا قابىلەتتىلىك، تاپقىرلىق، شيراقتىق تانىتۋعا شاقىردى.
– مەن بىزدە باسقارۋشىلاردىڭ، مەملەكەتتىك قىزمەتشىلەردىڭ، بيزنەسمەندەر مەن قوعامدىق كوشباسشىلاردىڭ جاڭا شوعىرى ءوسىپ كەلە جاتقانىن كورىپ وتىرمىن. كوپ ۇزاماي قازاقستاندىق ماماندار، ەڭ الدىمەن، وسى ۋنيۆەرسيتەتتىڭ تۇلەكتەرى بۇكىل الەمگە ءوزىنىڭ جاڭاشىلدىعىن، باسەكەگە قابىلەتتىلىگىن جانە قاجەتتىلىگىن كورسەتەدى دەپ سەنەمىن. الەمنىڭ جەتەكشى ۋنيۆەرسيتەتتەرىنىڭ تاريحى – ەڭ الدىمەن ونىڭ تۇلەكتەرىنىڭ تابىسىنىڭ تاريحى. بۇل ۋنيۆەرسيتەتتە دە ونىڭ تۇلەكتەرى اتقارعان ۇلى ىستەردىڭ جاھاندىق ايشىقتى تاريحى بولاتىنىنا سەنىمدىمىن، – دەدى مەملەكەت باسشىسى.
قازاقستان پرەزيدەنتى بۇل كۇندەرى بۇكىل ەلىمىز بويىنشا مىڭداعان قازاقستاندىق ستۋدەنتتىڭ ديپلوم الىپ جاتقانىنا نازار اۋداردى.
– جوعارى وقۋ ورىندارىنىڭ بارلىق تۇلەكتەرىن قۇتتىقتايمىن، ولارعا ومىردەن لايىقتى ورىندارىن تابۋىن، ساتتىلىك جانە باقىت تىلەيمىن. يۋنيسەف-ءتىڭ باعالاۋى بويىنشا، جاستاردىڭ دامۋىنىڭ جاھاندىق يندەكسىندە قازاقستان 27-ورىن الىپ وتىر. بۇل فرانتسيا، تۇركيا جانە شۆەتسيا سياقتى ەلدەردىڭ كورسەتكىشىنەن جوعارى. ءبىز قازىرگى اتقارىپ جاتقان ىستەرىمىزدىڭ ءبارىن سىزدەر ءۇشىن، سىزدەردىڭ بولاشاقتارىڭىز ءۇشىن جاساپ جاتىرمىز. بۇگىندە سىزدەردىڭ الدارىڭىزدان بۇكىل الەمگە جول اشىق. سىزدەر قىزىقتى كەزەڭدە ءومىر ءسۇرىپ، بولاشاققا قاراي قارىشتاپ قادام باسقان ەلمەن بىرگە ەرجەتىپ كەلەسىزدەر. وسىنىڭ بارلىعى ءبىزدىڭ قوعامداعى تاتۋلىق پەن تۇراقتىلىقتىڭ ارقاسىندا. سوندىقتان سىزدەردىڭ باستى ميسسيالارىڭىز – ەلدەگى بىرلىك پەن كەلىسىمدى نىعايتۋ. بارشاعا بەيبىت زامان مەن يگىلىكتى ءومىر جولىن تىلەيمىن، – دەدى نۇرسۇلتان نازارباەۆ.
ستۋدەنتتەر مەن وقىتۋشىلار ۋنيۆەرسيتەتتەگى جاسالعان جاعداي ءۇشىن مەملەكەت باسشىسىنا العىستارىن ايتىپ، كۇش-جىگەرلەرىن ەلدىڭ بۇدان ءارى دامۋ جولىنا جۇمسايتىندارىن جەتكىزدى.
***
نازارباەۆ ۋنيۆەرسيتەتىنىڭ تۇڭعىش تۇلەكتەرى قاتارىندا 446 ستۋدەنت وقۋىن ءتامامدادى. وقۋ ورنىنىڭ قۇرىلعان كەزىنەن بەرى ءبىلىم الىپ كەلە جاتقان جاستاردىڭ جالپى سانى 2800-گە جەتتى. وقۋعا ءتۇسۋ ەمتيحاندارىنىڭ قورىتىندىسى بويىنشا ەڭ جوعارى ناتيجەگە قول جەتكىزگەن تالاپكەرلەر ستۋدەنتتىڭ ۋنيۆەرسيتەتتەگى بارلىق وقۋ كەزەڭىندەگى شىعىندارىن وتەيتىن مەملەكەتتىك ءبىلىم بەرۋ گرانتى ارقىلى وقيدى. گرانتقا جىل سايىن 500 ادام يە بولادى.
ستۋدەنتتەردىڭ باسىم كوپشىلىگى گۋمانيتارلىق جانە الەۋمەتتىك عىلىمدار، ينجەنەريا، عىلىم مەن تەحنولوگيا مەكتەپتەرىندە، سونداي-اق ءبىلىم بەرۋ، مەملەكەتتىك ساياسات جانە بيزنەستىڭ جوعارى مەكتەپتەرىندە وقيدى. وقۋشىلاردىڭ اراسىندا كومپيۋتەرلىك عىلىمدار، ينجەنەرلىك مەحانيكا، روبوتتى تەحنيكا جانە مەحاترونيكا، ءبىلىم بەرۋ ءىسىن باسقارۋ، بيولوگيالىق عىلىمدار، ەلەكترلىك جانە ەلەكتروندىق ينجەنەريا، سونداي-اق قۇرىلىس ينجەنەرياسى ماماندىقتارى مەيلىنشە سۇرانىسقا يە ماماندىقتار بولىپ وتىر.
پىكىر قالدىرۋ