وسىلايشا، قازاقستان ورتالىق ازيانىڭ ەۋرووداقپەن ءبارىن قامتيتىن جاڭا قۇجاتقا قول قويعان العاشقى ەلى بولدى.
جاڭا كەلىسىم ساۋدا-ەكونوميكالىق جانە ينۆەستيتسيالىق سالاداعى، ونىڭ ىشىندە قازاقستاننىڭ دۇنيەجۇزىلىك ساۋدا ۇيىمىنا قوسىلۋىن جانە ەۋرازيالىق ەكونوميكالىق وداقتى دامىتۋدى قوسا العاندا، قر مەن ەو اراسىنداعى ءوزارا ءىس-قيمىل شەڭبەرىن ەداۋىر ۇلعايتادى جانە ىنتىماقتاستىق ءۇشىن جاڭا مۇمكىندىكتەر اشادى.
قازاقستان مەن ەۋرووداق قاتىناستاردىڭ تۇجىرىمدامالىق جاڭا دەڭگەيىنە كوشۋگە جانە اتالعان كەلىسىم قامتيتىن 29 سالاداعى ءوزارا ءتيىمدى سەرىكتەستىكتى جانداندىرۋعا دايىن ەكەندىكتەرىن بىلدىرۋدە. ىنتىماقتاستىق باعىتتارىنا ەكونوميكا جانە قارجى، كولىك، ەنەرگەتيكا، قورشاعان ورتانى قورعاۋ، ءبىلىم جانە زەرتتەۋ، سونداي-اق دەرەكتەردى قورعاۋ، كوشى-قون، زاڭنىڭ ۇستەم بولۋى، سىبايلاس جەمقورلىققا قارسى كۇرەس سالالارى كىرەدى. تاراپتار سونىمەن قاتار تەرروريزمگە جانە ترانسۇلتتىق ۇيىمداسقان قىلمىسقا قارسى كۇرەستەگى ىنتىماقتاستىقتى كۇشەيتۋدى، حالىقارالىق جانە وڭىرلىك قاۋىپسىزدىك پەن تۇراقتىلىققا كومەكتەسۋدى كوزدەۋدە.
جاڭا كەلىسىم شەڭبەرىندەگى ىنتىماقتاستىقتىڭ ماڭىزدى باعىتتارىنىڭ ءبىرى ازاماتتاردىڭ ءوزارا ساپارلارىن جەڭىلدەتۋ بولىپ تابىلادى. وسى ورايدا، استاناداعى كەلىسسوزدەر بارىسىندا وسى باعىتتاعى ءارى قارايعى قادامدار تالقىعا سالىندى. ە. ىدىرىسوۆ اتاپ وتكەندەي، قازاقستان ۆيزالىق ساياسات سالاسىندا ۇلتتىق زاڭنامانى ەۋروپالىق نورمالارمەن ۇيلەستىرۋمەن قاتار، شەتەلدىك ازاماتتاردىڭ قازاقستانعا كەلۋىن جەڭىلدەتۋگە دە ەلەۋلى كوڭىل ءبولىپ كەلەدى. مىسالى، 2014 جىلعى جازدان باستاپ الەمنىڭ 20 دامىعان ەلىنە قازاقستانعا ۆيزالىق تالاپتارسىز كەلۋگە رۇقسات بەرەتىن پيلوتتىق جوبا جۇزەگە اسۋدا. ولاردىڭ كوبىسى ەۋروپالىق ەلدەر. قر ءسىم باسشىسى ەۋروپالىق تاراپتىڭ جاۋاپتى ارەكەتىنە ءپوزيتيۆتى كوزقاراسىنا سەنەتىنىن جەتكىزدى.
كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمگە قول قويۋ قازاقستان مەن ەو قاتىناستارىن دامىتۋ مەن نىعايتۋدا ماڭىزدى كەزەڭ بولىپ، بۇل قاتىناستاردىڭ ساپالى جاڭا دەڭگەيگە وتكەنىن كورسەتتى.
قۇجاتقا قول قويۋ ءراسىمى قازاقستان پرەمەر-ءمينيسترى كارىم ءماسىموۆتىڭ قاتىسۋىمەن ءوتتى.
قازاقستان رەسپۋبليكاسى مەن ەۋروپالىق قوعامداستىق جانە وعان مۇشە مەملەكەتتەر اراسىنداعى سەرىكتەستىك پەن ىنتىماقتاستىق تۋرالى ءبىرىنشى كەلىسىم 1995 جىلعى 23 قاڭتاردا 10 جىل مەرزىمگە قول قويىلىپ، ول 1999 جىلعى 1 شىلدەدە كۇشىنە ەندى.
قازاقستان مەن ەو اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى جاڭا كەلىسىم بويىنشا كەلىسسوزدەر 2011 جىلعى 27 ماۋسىمدا بريۋسسەلدە باستالدى.
2014 جىلعى 9 قازاندا قر پرەزيدەنتى ن.نازارباەۆتىڭ بريۋسسەلگە رەسمي ساپارى بارىسىندا قازاقستان مەن ەۋروپالىق وداق اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى كەلىسىم بويىنشا كەلىسسوزدەردى اياقتاۋ تۋرالى حاتتاماعا قول قويىلدى.
بۇگىنگى تاڭدا ەۋروپالىق وداق قازاقستاننىڭ ءىرى ساۋدا سەرىكتەسى بولىپ تابىلادى. ەو-مەن سىرتقى ساۋدا 2014 جىلدىڭ قورىتىندىسى بويىنشا 53 ملرد. دوللاردان استام سومانى قۇرادى. بۇل قر-نىڭ بارلىق سىرتقى ساۋدا اينالىمىنىڭ 53,2%-ىنا تەڭ. 2015 جىلدىڭ قاڭتارى مەن قىركۇيەگى ارالىعىنداعى كەزەڭدە اتالعان كورسەتكىش 24,5 ملرد. دوللاردى قۇرادى. ول قازاقستاننىڭ سىرتقى ساۋداسىنىڭ جالپى كولەمىنىڭ 51,8%-ىن سايكەس كەلەدى.
قر سىم باسپا ءسوز قىزمەتى
پىكىر قالدىرۋ