قازاقستاندا مۇعالىمدەردىڭ جالاقىسىن 500 مىڭ تەڭگەگە كوتەرۋدى ۇسىنۋدا
kerey.kz
ەكونوميكالىق داۋلار بويىنشا زاڭگەر جانگەلدى سۇلەيمانوۆ قازاقستاندا مۇعالىمدەردىڭ جالاقىسىن 500 مىڭ تەڭگەگە دەيىن كوتەرۋدى ۇسىنۋدا.
«الەمدەگى ەڭ ماڭىزدى ماماندىقتاردىڭ ءبىرى، ول – مۇعالىم ماماندىعى. ناق سول ادامدار ءبىزدىڭ بالالارىمىزدى وقىتادى، ولارعا ءبىلىم بەرەدى، بالانىڭ تۇلعالىق قاسيەتتەرىن قالىپتاستىراتىن دا سولار. ءبىز، اتا-انالار، تاۋلىك بويى جۇمىستا جۇرەمىز دە، بالالارىمىزبەن تەك كەشكى استا سويلەسەمىز. مۇعالىم ءبىزدىڭ بالالارمەن بىرگە بىزدەن ون ەسە كوپ بولادى. ءبىز بالالارىمىزدىڭ تاعدىرىن مۇعالىمنىڭ قولىنا بەرىپ قويعانبىز. سوندىقتان ءبىزدىڭ مۇعالىمدەر بارلىق جاعىنان ۇزدىك بولۋلارى ءتيىس. مورالدىق، زياتكەرلىك، سونىڭ ىشىندە قارجىلىق تۇرعىدان دا. بۇگىن مۇعالىمدەر 50 مىڭنان 100 مىڭعا دەيىن عانا جالاقى الادى. وسىناۋ اسا جاۋاپكەرشىلىگى مول ءارى اۋىر ەڭبەك ءۇشىن بۇل تىم از»، – دەيدى ول ءوزىنىڭ فەيسبۋكتەگى پاراقشاسىندا.
ادۆوكاتتىڭ ايتۋىنشا، مۇعالىمدەر كۇنىنە 15 ساعاتتان، دەمالىسسىز قىزمەت ەتەدى. پەداگوگيكالىق جۇمىسپەن قاتار، ەسەپ تولتىرۋ سياقتى ءتۇرلى بيۋروكراتيالىق جۇمىستار بار. «بۇگىندە مۇعالىمدەردىڭ جۇمىسى ەڭ سترەسسكە تولى جۇمىس دەۋگە بولادى، سەبەبى ولاردىڭ مارتەبەسىنە نۇقسان كەلگەن، ال سىيلى بولماعان ادامعا بالالاردى جاقسى دۇنيەلەرگە سۋسىنداتۋ وتە قيىن»، – دەيدى ول.
«سونىمەن قاتار مۇعالىم ماماندىعى ولاردان بىرنەشە ەسە كوپ جالاقى الاتىن جانە زەينەتاقىلارى قامتاماسىز ەتىلگەن مينيسترلەردەن، سوتتاردان، گەنەرالداردان، دەپۋتاتتاردان الدەقايدا جوعارى. پرەزيدەنتتىڭ «ءبىزدىڭ ەلگە ەڭبەككە ادال ەمەس قىزمەتكەرلەردى اۋىستىرۋ ءۇشىن شەتەلدەن ساۋاتتى ءارى مىقتى مامانداردى تارتا الماي وتىرمىن» دەپ ايتقان ءسوزى بار ەدى. بىزگە ەشكىم دە كەرەك ەمەس، بىزگە وزىمىزگە ساۋاتتى جانە ءبىلىمى جوعارى ادامداردى شىعارۋىمىز كەرەك. بىراق ونى جاساۋ ءۇشىن ءبىزدىڭ مۇعالىمدەر ۇزدىكتىڭ ۇزدىگى بولۋى شارت. ال ول ءۇشىن مۇعالىمدەردىڭ جالاقىسىن بىرنەشە جىل بويى، كەزەڭ-كەزەڭمەن 500 مىڭ تەڭگەگە دەيىن كوتەرۋ قاجەت. سول كەزدە عانا مۇعالىمدەر وتباسىن اسىراۋعا قاجەتتى اقشانى ويلاۋدى دوعارادى، سونىمەن قاتار مۇعالىمدەر اراسىندا بايقاۋلار جۇرگىزىلىپ وتىرادى. وسى تۇستا ءبىزدىڭ ءبىلىم بەرۋ دەڭگەيىمىز جوعارادى، اتا-انالار قوسىمشالارعا بالالارىن جىبەرىپ، بالانى اۋرەگە دە سالمايتىن بولادى.
مەن تۇسىنەمىن، بۇل ىسكە ميللياردتتاعان قاراجات قاجەت. بىراق ساۋاتتى جانە ويلى قوعام تۋمايىنشا، شەكسىز تابيعي بايلىقتار، ءتۇرلى باعدارلامالار مەن رەفورمالار بىزگە كومەكتەسە المايدى. تاعى دا ايتا كەتەتىن جايت، ءبىزدىڭ بارلىق مەكتەپتەر نازارباەۆ زياتكەرلىك مەكتەپتەرىنەن كەم تۇسپەۋى شارت. بالالاردىڭ بارلىعى بىردەي، سوندىقتان بىردەي جاعدايلاردا ءبىلىم الۋلارى كەرەك»، – دەپ ءتۇيدى ءسوزىن زاڭگەر.
قازاقپارات
پىكىر قالدىرۋ