كەلندەگى «قازاق مادەنيەت قوعامىنىڭ» توراعاسى شۋايىپ ەرولدىڭ ايتۋىنشا، قۇرىلتايعا 2000-عا جۋىق ادام قاتىسپاق. قازاقستاننان 20-عا تارتا ونەر ادامى شاقىرىلعان. قۇرىلتايدىڭ ماقساتى – كارى قۇرلىقتىڭ ءار جەرىندە بىتىراپ جۇرگەن قانداستاردىڭ باسىن قوسىپ، جاستاردى ءبىر-بىرىمەن تانىستىرۋ، ۇيىستىرۋ جانە قازاق مادەنيەتى مەن ونەرىنەن قول ۇزبەۋگە داعدىلاندىرۋ.

شۋايىپ ەرول، قازاقستانعا كەلگەن ءساتى

ەكى كۇنگە سوزىلاتىن قۇرىلتايدا فۋتبول جارىسى مەن مارافون وتەدى جانە ۇلتتىق ءان-كۇيدەن كونتسەرت نومىرلەرى قويىلادى. دوپ باسەكەسىنە ەۋروپانىڭ 10 مەملەكەتىندەگى قازاق قوعامى 10 فۋتبول كومانداسىن اكەلمەك. ال، قازاقتار كوپ قونىستانعان تۇركيا ەلىنەن 2 كوماندا وينايدى. بۇدان سىرت، قازاقستاننان باراتىن ونەر يەلەرى دە ءبىر كوماندا بولىپ قاتىسۋعا نيەت ءبىلدىرىپتى.

قۇرىلتايعا قازاقستان رەسپۋبليكاسىنىڭ گەرمانياداعى ەلشىسى دە قاتىسادى دەپ كۇتىلۋدە. سونىمەن قاتار، تۇركيانىڭ قازاقتار كوپ تۇراتىن ساليحلى، زەيتىنبۇرىن وڭىرىنەن اۋدان اكىمدەرى دە قۇرىلتاي قوناعى بولماق. امەريكادان دا 20-داي ادام كەلمەكشى ەكەن.
جاپلى، قۇرىلتايدىڭ بارلىق قاراجاتىن ءوزىمىز كوتەرىپ الدىق دەيدى شۋايىپ مىرزا. سەبەبى، قازاق مادەنيەت قوعامى باسقا جەردەن كومەك المايدى. ال، قوعام مۇشەلەرىنىڭ اي سايىنعى قوسىپ وتىراتىن جارناسى مۇنداي ۇلكەن شارالار وتكىزۋگە جەتپەيتىندىكتەن، ۇيىمداستىرۋشىلار قارجىنى ۇنەمدەپ، ودان-بۇدان قۇراپ قۇرىلتايدى جاقسى دەڭگەيدە وتكىزۋگە كۇش سالۋدا.
گەرمانيادا قازاقتاردىڭ ەڭ كوپ قونىستانعان جەرى كەلن جانە بەرلين قالالارى. بەرليندە ەۋروپا قازاقتارىنىڭ قۇرىلتايى 2014 جىلى وتكەن بولاتىن.
ەۋروپا ەلدەرىندەگى قازاق مادەنيەت قوعامدارى «ەۋروپا قازاقتارى قوعامدارى فەدەراتسياسىنا» قارايدى. ونىڭ توراعاسى ابدۋلقايىم كەسىجي مىرزا. كەلندەگى قازاق مادەنيەت قوعامىنىڭ باسشىسى شۋايىپ ەرول كەلن قالاسىنا 1974 جىلى كەلگەنىن ايتادى. الدىمەن بۇل قالاعا اكە-شەشەسى تۇركيادان قونىس اۋدارىپتى. كەلندە 40 جىلدان استام ۋاقىتتان بەرى تۇرىپ جاتقان شۋايىپ ەرول ونداعى قازاقتاردىڭ ءوز ۇلتتىق بولمىسىن ۇمىتىپ كەتپەۋىنە وزىندىك ۇلەس قوسىپ جاتقان ازامات.
ءوز كۇشتەرىنە سۇيەنىپ، ءار جىلى قۇرىلتاي جاساپ، جاستاردىڭ جات بولىپ كەتپەي، ءبىر-بىرىمەن جاقىن وسۋىنە قولدارىنان كەلگەنشە جاعداي جاساپ جاتقان ەۋروپاداعى قانداستارىمىزعا تىلەكتەستىك بىلدىرەمىز.
مۇرات الماسبەكۇلى