Kel'ndegi «Qazaq mädeniet qoğamınıñ» törağası Şuayıp Eroldıñ aytuınşa, qwrıltayğa 2000-ğa juıq adam qatıspaq. Qazaqstannan 20-ğa tarta öner adamı şaqırılğan. Qwrıltaydıñ maqsatı – käri qwrlıqtıñ är jerinde bıtırap jürgen qandastardıñ basın qosıp, jastardı bir-birimen tanıstıru, wyıstıru jäne qazaq mädenieti men önerinen qol üzbeuge dağdılandıru.

Şuayıp Erol, Qazaqstanğa kelgen säti

Eki künge sozılatın qwrıltayda futbol jarısı men marafon ötedi jäne wlttıq än-küyden koncert nömirleri qoyıladı. Dop bäsekesine Europanıñ 10 memleketindegi qazaq qoğamı 10 futbol komandasın äkelmek. Al, qazaqtar köp qonıstanğan Türkiya elinen 2 komanda oynaydı. Bwdan sırt, Qazaqstannan baratın öner ieleri de bir komanda bolıp qatısuğa niet bildiripti.

Qwrıltayğa Qazaqstan Respublikasınıñ Germaniyadağı Elşisi de qatısadı dep kütilude. Sonımen qatar, Türkiyanıñ qazaqtar köp twratın Salihlı, Zeytinbwrın öñirinen audan äkimderi de qwrıltay qonağı bolmaq. Amerikadan da 20-day adam kelmekşi eken.
Japlı, qwrıltaydıñ barlıq qarajatın özimiz köterip aldıq deydi Şuayıp mırza. Sebebi, Qazaq mädeniet qoğamı basqa jerden kömek almaydı. Al, qoğam müşeleriniñ ay sayınğı qosıp otıratın jarnası mwnday ülken şaralar ötkizuge jetpeytindikten, wyımdastıruşılar qarjını ünemdep, odan-bwdan qwrap qwrıltaydı jaqsı deñgeyde ötkizuge küş saluda.
Germaniyada qazaqtardıñ eñ köp qonıstanğan jeri Kel'n jäne Berlin qalaları. Berlinde Europa qazaqtarınıñ qwrıltayı 2014 jılı ötken bolatın.
Europa elderindegi qazaq mädeniet qoğamdarı «Europa Qazaqtarı qoğamdarı federaciyasına» qaraydı. Onıñ törağası Abdulqayım Kesiji mırza. Kel'ndegi Qazaq mädeniet qoğamınıñ basşısı Şuayıp Erol Kel'n qalasına 1974 jılı kelgenin aytadı. Aldımen bwl qalağa äke-şeşesi Türkiyadan qonıs audarıptı. Kel'nde 40 jıldan astam uaqıttan beri twrıp jatqan Şuayıp Erol ondağı qazaqtardıñ öz wlttıq bolmısın wmıtıp ketpeuine özindik üles qosıp jatqan azamat.
Öz küşterine süyenip, är jılı qwrıltay jasap, jastardıñ jat bolıp ketpey, bir-birimen jaqın ösuine qoldarınan kelgenşe jağday jasap jatqan Europadağı qandastarımızğa tilektestik bildiremiz.
Mwrat Almasbekwlı