باتىستاعى بەيساياسي وليمپيادا تۋرالى ءبىر ءسوز
kerey.kz
وليمپيادا كەزىندە سپورتشىلارىمىز جەڭگەن سايىن “بۇل – بۇكىل ەلدىڭ جەڭىسى” دەپ ءدۇر-ءدۇر ەتۋ نەگىزىنەن سپورتتى ساياسيلاندىرىپ، مەملەكەت قاراۋىنا العان رەسەي مەن قىتاي باستاعان پوست-سوۆەتتىك جانە سوتسياليستىك ەلدەرگە عانا ءتان بە دەپ قالام. كۇنىنە التىندى ۋىستاپ الىپ جاتقان باتىس ەلدەرىندە قانداي دا ءبىر جەڭىس ەڭ اۋەلى سول ءبىر جەكە سپورتشىنىڭ ماڭداي تەرىنىڭ ناتيجەسى رەتىندە قابىلدانادى. ول جەڭىس تۇتاس مەملەكەتتىڭ “ۇستەم” ەكەنىن، حالقىنىڭ “ساپالى” ەكەنىن، بيلىگىنىڭ “ەرەكشە قامقور” ەكەنىن كورسەتپەيدى. ەل ىشىنەن شىققان جەكە ءبىر چەمپيوننىڭ جىگەرلى، قاجىرلى، قايراتتى، تالانتتى ءھام ەڭبەكقور ادام ەكەنىن كورسەتەدى. سول سەبەپتى ۇلىبريتانيا مەن گەرمانيا سپورتشىسى، يا كومانداسى فينالدا كەزدەسىپ قالسا، جانكۇيەرلەر ەڭ اۋەلى ەكى كۇش يەسىنىڭ نەمەسە ەكى ۇجىمنىڭ باسەكەسىن باقىلايدى. سپورتشىلار دا، ولاردىڭ قولداۋشىلارى دا وتكەن تاريحتا ۇلىبريتانيا مەن گەرمانيانىڭ اراسىندا بولعان قيساپسىز قىرعىن، نەبىر سوعىستى جادىندا قايتا جاڭعىرتىپ، ءبىر-بىرىنە كەكتەنە قاراپ، كەمسىتە سويلەپ، “جامان نەمىستەن جەڭىلدىك-اۋ”، يا بولماسا ء“تالپىش اعىلشىننىڭ استىنا ءتۇسىپ قور بولدىق-اۋ”، “باسقانى جەڭۋ ءبىر بولەك تە، اعىلشىندى تۇقىرتۋ ءبىر بولەك قوي، شىركىن!” دەپ كىجىنبەيدى:) جەڭگەن جاق تا، جەڭىلگەن جاق تا جەكپە-جەك، جارىس، يا ماتچتان سوڭ ءتوس قاعىستىرىپ، “كۇش اتاسىن تانىماس” دەگەن – وسى” دەپ جىلى جىميىسىپ تارايدى.
باتىس ەلدەرىندە وليمپيادا قۇراماسىن مەملەكەت ەمەس، حالىق قارجىلاندىرادى. مىسالى، وليمپيادا جاقىنداعان كەزدە اقش-تىڭ بانكتەرى بارلىق كليەنتتەرىنە ارنايى حات جىبەرەدى. سونىڭ بىرنەشەۋىن ءوز كوزىممەن كوردىم. قىسقاشا بايانداسام، بىلاي دەپ جازىلعان: “قۇرمەتتى پالەنشە! الداعى وليمپيادا كەزىندە ۇلتتىق قۇرامامىزداعى سپورتشىلارىمىزدىڭ ماڭدايى جارقىراپ ءجۇرۋى ءۇشىن، سپورتتىق فورماسى ەرەكشە ادەمى بولىپ تىگىلۋى ءۇشىن، جاتىن ورىندارى جايلىراق، اس-سۋلارى قۇنارلىراق، قۇرال-جابدىقتارى تولىعىراق بولۋى ءۇشىن قايىرىمدىلىق قولىن سوزساڭىز. جوسپارىمىز – 1 دوللاردان جيناۋ. ەگەر 2 دوللارىڭىزدى قيساڭىز – قۇبا-قۇپ. قۇرمەتپەن، بانكىڭىز”. سول سەبەپتى دە ميلليونداعان امەريكالىقتىڭ قارجىسىمەن جارىسقا اتتانعان وليمپيادا قۇراماسى شىنايى “حالىق كومانداسى” بولىپ قابىلدانادى. وليمپيادا جەڭىمپازدارىنا ۇلىبريتانيا ۇكىمەتى كوك تيىن تولەمەيدى. ويتكەنى چەمپيوندار ەلگە ورالعاسىن ولارعا ەركىن نارىق زاڭدارىمەن ءىس قىلاتىن جەرگىلىكتى نەبىر بيزنەس كومپانيالار مەن برەندتەر تاۋارىن ناسيحاتتاۋ ءۇشىن “جارنامامىزعا تۇسسەڭىز” دەپ جاتا كەپ جابىسادى. كەيبىر اتاعى شىققان جۇلدەگەرلەر ءتيىمدى كونتراكتىلەر ارقىلى ميلليونداپ تا پايدا تابادى. بىلايشا ايتقاندا، اينالىپ كەلگەندە تاعى سول قاراپايىم تۇتىنۋشىلاردىڭ – حالىقتىڭ ارقاسىندا ەڭبەگىنىڭ جەمىسىن، بەينەتىنىڭ زەينەتىن كورەدى. سوندىقتان بيلىككە جالتاقتامايدى، پرەزيدەنتكە العىس ايتپايدى، ۇكىمەتتىڭ پيار اكتسيالارىنا پىسقىرىپ تا قارامايدى.
باتىس ەلدەرىندە وليمپيادا قۇراماسىنا ءىلىنۋ ءۇشىن جەكە-جەكە اۋەسقوي سپورت كلۋبتارىنىڭ اراسىندا ءادىل باسەكە وتەدى. وليمپياداعا كىم باراتىنىن قۇرامانىڭ باس باپكەرى شەشپەيدى، باسەكە شەشەدى. سول سەبەپتى كەيبىر جارىس تۇرلەرى بويىنشا ءبىر ەلدەن بىرنەشە سپورتشى جولداما الىپ، قاتار قاتىسىپ جاتادى. بۇنىڭ ءبىر جاقسىسى – جانكۇيەرلەر اراسىندا “تۇگەنشە مىقتىراق ەدى، باس باپكەر ءوز كانديداتىنا بۇرا تارتىپ، قۇراماعا الماي قويدى” دەگەن اڭگىمە تۋمايدى.
وسىنداعى فرەندتەرىمنىڭ قاپەرىندە ءجۇرسىن دەپ ەسكەرتىپ جاتقانىم.
عالىم بوقاشتىڭ facebook پاراقشاسىنان الىندى
پىكىر قالدىرۋ