Batıstağı beysayasi olimpiada turalı bir söz
kerey.kz
Olimpiada kezinde sportşılarımız jeñgen sayın “bwl – bükil eldiñ jeñisi” dep dür-dür etu negizinen sporttı sayasilandırıp, memleket qarauına alğan Resey men Qıtay bastağan post-sovettik jäne socialistik elderge ğana tän be dep qalam. Künine altındı uıstap alıp jatqan Batıs elderinde qanday da bir jeñis eñ äueli sol bir jeke sportşınıñ mañday teriniñ nätijesi retinde qabıldanadı. Ol jeñis twtas memlekettiñ “üstem” ekenin, halqınıñ “sapalı” ekenin, biliginiñ “erekşe qamqor” ekenin körsetpeydi. El işinen şıqqan jeke bir çempionnıñ jigerli, qajırlı, qayrattı, talanttı häm eñbekqor adam ekenin körsetedi. Sol sebepti Wlıbritaniya men Germaniya sportşısı, ya komandası finalda kezdesip qalsa, janküyerler eñ äueli eki küş iesiniñ nemese eki wjımnıñ bäsekesin baqılaydı. Sportşılar da, olardıñ qoldauşıları da ötken tarihta Wlıbritaniya men Germaniyanıñ arasında bolğan qisapsız qırğın, nebir soğıstı jadında qayta jañğırtıp, bir-birine kektene qarap, kemsite söylep, “jaman nemisten jeñildik-au”, ya bolmasa “tälpiş ağılşınnıñ astına tüsip qor boldıq-au”, “basqanı jeñu bir bölek te, ağılşındı twqırtu bir bölek qoy, şirkin!” dep kijinbeydi:) Jeñgen jaq ta, jeñilgen jaq ta jekpe-jek, jarıs, ya matçtan soñ tös qağıstırıp, “küş atasın tanımas” degen – osı” dep jılı jımiısıp taraydı.
Batıs elderinde olimpiada qwramasın memleket emes, halıq qarjılandıradı. Mısalı, olimpiada jaqındağan kezde AQŞ-tıñ bankteri barlıq klientterine arnayı hat jiberedi. Sonıñ birneşeuin öz közimmen kördim. Qısqaşa bayandasam, bılay dep jazılğan: “Qwrmetti Pälenşe! Aldağı olimpiada kezinde wlttıq qwramamızdağı sportşılarımızdıñ mañdayı jarqırap jürui üşin, sporttıq forması erekşe ädemi bolıp tigilui üşin, jatın orındarı jaylıraq, as-suları qwnarlıraq, qwral-jabdıqtarı tolığıraq boluı üşin qayırımdılıq qolın sozsañız. Josparımız – 1 dollardan jinau. Eger 2 dollarıñızdı qisañız – qwba-qwp. Qwrmetpen, bankiñiz”. Sol sebepti de milliondağan amerikalıqtıñ qarjısımen jarısqa attanğan olimpiada qwraması şınayı “halıq komandası” bolıp qabıldanadı. Olimpiada jeñimpazdarına Wlıbritaniya ükimeti kök tiın tölemeydi. Öytkeni çempiondar elge oralğasın olarğa erkin narıq zañdarımen is qılatın jergilikti nebir biznes kompaniyalar men brendter tauarın nasihattau üşin “jarnamamızğa tüsseñiz” dep jata kep jabısadı. Keybir atağı şıqqan jüldegerler tiimdi kontraktiler arqılı milliondap ta payda tabadı. Bılayşa aytqanda, aynalıp kelgende tağı sol qarapayım twtınuşılardıñ – halıqtıñ arqasında eñbeginiñ jemisin, beynetiniñ zeynetin köredi. Sondıqtan bilikke jaltaqtamaydı, prezidentke alğıs aytpaydı, ükimettiñ piar akciyalarına pısqırıp ta qaramaydı.
Batıs elderinde olimpiada qwramasına ilinu üşin jeke-jeke äuesqoy sport klubtarınıñ arasında ädil bäseke ötedi. Olimpiadağa kim baratının qwramanıñ bas bapkeri şeşpeydi, bäseke şeşedi. Sol sebepti keybir jarıs türleri boyınşa bir elden birneşe sportşı joldama alıp, qatar qatısıp jatadı. Bwnıñ bir jaqsısı – janküyerler arasında “Tügenşe mıqtıraq edi, bas bapker öz kandidatına bwra tartıp, qwramağa almay qoydı” degen äñgime tumaydı.
Osındağı frendterimniñ qaperinde jürsin dep eskertip jatqanım.
Ğalım BOQAŞtıñ facebook paraqşasınan alındı
Pikir qaldıru