مۋزىكانت عالىمجان مولدانازار ۆلاست باسىلىمىنا سۇحبات بەرىپ، ءوزىنىڭ ءومىرى، كوزقاراسى، مۋزىكاسى جايلى اڭگىمەلەدى. تۋعان جەرى، تۋعان ءتىلى تۋرالى دا ايتتى. تومەندە سۇحباتتان ۇزىندىلەر بەرىپ وتىرمىز.egemen.kz
ءوزىمدى قازاقستان ەستراداسىنىڭ وكىلىمىن دەپ سانامايمىن. نە جاسىراتىنى بار، ءبىزدىڭ ەسترادا ماعان ۇنامايدى. مادەنيەت، مۋزىكا، شىعارماشىلىققا دەگەن مۇنداي كوزقاراس ۇنامايدى. فونوگرامما – دەگەن ول قىلمىس. جۇرتتى الداپ، اقشا الۋ… ءبىزدىڭ ادامدار، كورەرمەندەر وزدەرىن ۇيالماي، اشىقتان-اشىق الداپ جاتقانىن ءبىلۋى كەرەك. ال ارتىستەر وزدەرىنىڭ جاساپ جۇرگەنى قىلمىس ەكەنىن تۇسىنۋلەرى كەرەك. بۇل ەندى… جىلاعىڭ دا، كۇلكىڭ دە كەلەدى. مەن قىلمىسكەر بولعىم كەلمەيدى.
***
مەنەن دە مىقتىلار بار، بىراق ءازىر ولار ەشكىمگە كەرەك بولماي جاتىر. مەن باياعىدان ءان شىعارىپ كەلەم، بىراق ول اندەر كەرەكسىز بولىپ ينتەرنەتتە جاتتى. سوسىن رەسەيدە بىرەۋلەر «و، ءبىر قازاق كۇشتى سينتي-پوپ جاساپ ءجۇر» دەدى. سوسىن بىزدىكىلەر «و! ءبىزدىڭ بالا ەۋروپادا بىردەڭە ۇتىپ الدى» دەدى. بىراق مەن وعان دەيىن دە بولعام نەگىزى.
***
رەسەيگە بىرنەشە رەت شاقىردى. بىراق بارعىم كەلمەدى. ويتكەنى، الماتىنى وتە قاتتى جاقسى كورەم. بۇل جەردەن ەشقايدا كەتكىم كەلمەيدى.
***
ەشقاشان اتاققا، كوپ اقشا تابۋعا قىزىققان ەمەسپىن. كوبى «سەنىڭ ورنىڭدا بولسام، باسقا جاققا كەتىپ قالار ەدىم» دەيدى. مەن كەتكىم كەلمەيدى. سوڭىنا دەيىن وسىندا قالىپ، وسى قالادا made in Kazakhstan دەۋگە تۇرارلىق بىردەڭە جاساسام دەيمىن.
***
قازاق ءتىلى ول مەن ءۇشىن دۇنيەگە العاش كەلگەندە ەستىگەن دىبىستارىم. مەن ونى مەكتەپتى بىتىرگەنشە تىڭدادىم. ويتكەنى، ءبىزدىڭ اۋىلدا ءبىر عانا ورىس وتباسى بولدى، ولاردىڭ ءوزى ورىسشا بىلمەيتىن.
***
قايرات نۇرتاستى ءوز باسىم سىيلايمىن. ونىڭ ءوز اۋديتورياسى بار. ءتىپتى سونداي ۇلكەن اۋديتوريا مەندە دە بولسا دەيمىن. قايراتتى ءسۇيىپ تىڭدايتىن، تىڭداپ وتىرىپ جىلايتىن جاقىندارىم بار. ول شىنىمەن دە ادامدارعا ءبىر سەزىمدەر بەرەدى. ول شىنىمەن دە ادامداردى ءبىر نارسەلەر تۋرالى ويلاندىرادى.
***
اكەم قاتال، اسكەري ادام. بىراق ىشتەي ەركىن ادام. «بىلگەنىڭدى ىستە. ەڭ باستىسى، جۇرتتى الداما» دەيدى.
***
التى بالانىڭ كىشىسى بولدىم. قازاقتا ءۇيدىڭ كىشىسى اكە-شەشەسىمەن قالادى. ال مەن كەتەتىنىمدى مەكتەپتە جۇرگەندە-اق ءبىلدىم. بىراق تۋعان اۋىلىمدى قاتتى جاقسى كورەم. ءجيى بارام. ساعىنعاندا بيلەت الام دا كەتىپ قالام. دەگەنمەن… بالا كەزىمدە، قازىر دە ول جەرمەن ءبىرتۇرلى گارمونيا تابا المايمىن.
***
اۋىلدىڭ تاربيەسىمەن ءوستىم. سوندىقتان كەي نارسەلەردى قابىلداۋ ماعان قيىن. مىسالى، بالانىڭ اكە-شەشەسىمەن داۋلاسقانىن كورگەندە «نە بولىپ بارادى ءوزى؟» دەپ شوشيمىن.
***
«سەن امەريكان مۋزىكاسىن ناسيحاتتايسىڭ. مۋزارت، قايرات نۇرتاس – مىنە بۇلار بىزدىكى» دەپ ۇرسادى كەيدە. مەن تۇسىندىرۋگە تىرىسام: «مۋزارت پەن قايرات نۇرتاس ەلەكتروندى گيتارامەن، سينتەزاتورمەن ايتادى. قازاق ەلەكتروندى گيتارا تارتىپ پا ەدى؟ قالايشا ونى ناعىز قازاق مۋزىكاسى دەپ ايتاسىز؟».
***
قازاقشا بولسىن دەيتىندەر تويلارىنا كانە ۋەست، بەيونسە، دجەننيفەر لوپەستەردى شاقىرادى. ول جەردەن دومبىرا، قوبىز كورمەيسىز.
***
«نەگە دومبىرا تارتپايسىڭ؟» دەپ تە ۇرسادى. ءبىر اعامىزعا «مىنە كوشەدە كەزدەستىك. ءسىز نەگە مەرسەدەسپەن كەلدىڭىز، نەگە اتپەن كەلمەدىڭىز؟» دەدىم.
***
بىردەڭە دۇرىس بولماي جاتسا، ءبارىن تاستاپ قاشۋعا بولمايدى. اركىم ءوز ءىسىن ادال اتقارسا، ەلدى سىيلاسا، جانە ادامداردى اقشاسى ءۇشىن ەمەس، ادام بولعانى ءۇشىن سىيلاسا، جاقسىراق بولادى. پاتريوتيزم دەگەن وسى.
***
مۇنى ەستىپ بىرەۋلەر مىرس ەتۋىلەرى مۇمكىن. بىراق ءبىز قاتتى بولىپ كەتتىك. دوستارىمىزدىڭ وزىنە سەنبەيمىز. ادام بولۋدان قالا باستاعاندايمىز.
***
مايكل دجەكسون ناعىز كورول. ونى سىناپ جاتسا، ءوز باسىم ءبىرتۇرلى بولا باستايمىن.
***
تويلاردا ءان ايتپايتىن سەبەبىم، تويدىڭ شىرقىن بۇزعىم كەلمەيدى. «كەيدە بىرەۋ كەلىپ «ەي ىنىشەك، وسى سەنىڭ ايتىپ جۇرگەنىڭ نە ءان؟» دەيدى. بۇل دا ءبىر پىكىر. ونى دا سىيلاعان دۇرىس.
egemen.kz
پىكىر قالدىرۋ