كوز قاراس

مايعازيەۆ: ءوز قانداستارىمىزدىڭ ۇرپاقتارىن وزەككە تەبەتىنىمىز وكىنىشتى

kerey.kz

 |  Sep 27, 2016

ساكەن مايعازيەۆتى جۇرت ءانشى رەتىندە عانا ەمەس، ەلىنىڭ وتكەنىنە قاراپ، بولاشاعى ءۇشىن الاڭدايتىن ازامات رەتىندە جاقسى كورەدى. ۇنەمى قوعامدىق ماسەلەلەرگە بايلانىستى ءوز پىكىرىن ءبىلدىرىپ جۇرەتىن ول شىندىقتى اشىق ايتۋدان جاسقانبايدى. بۇگىن ءانشى وزگە ەلدەن ورالىپ، الايدا ءوز ەلىنەن پانا ياكي دوس تاپپاعان قانداستىرىمىزدىڭ جايىن قوزعادى. ءانشى قىتايدان، موڭعوليادان كەلگەن ورالمانداردى، سونىمەن قاتار شىمكەنتتەن كەلگەن وتانداستارىن كورگەندە توبە شاشتارى تىك تۇرىپ، جاتسىنىپ، بوتەنسىنەتىن قازاقستاندىقتارعا ءوز پىكىرىن جەتكىزدى. بۇل تۋرالى Stan.kz حابارلايدى.

«اللا بۇيىرتىپ، جاڭا وقۋ جىلى باستالدى. جوعارعى وقۋ ورنىنا ءتۇسىپ، جان-جاقتان جينالعان جالىندى جاستار جاقىن تانىسىپ، پايدالى ءبىلىم الۋعا بەل بۋادى. تانىسۋدىڭ ءساتى كەلگەندە “قىتايدان، موڭعوليادان، شىمكەنتتەن كەلدىم” دەسە ونە بويى ورە تۇرەگەلىپ، توبە شاشى تىك تۇراتىن وتانداستارىممەن وي بولىسكەلى وتىرمىن. الماس اxمەتبەكۇلىنىڭ “ەگەر 5 قازاق وتىرسا سونىڭ ىشىندەگى بىرەۋىن جەك كورسەڭ، “مەن قازاقتى جاقسى كورەم” دەمەي-اق قوي. سەن ونى قازاق بولعاندىعى ءۇشىن عانا جاقسى كورۋىڭ كەرەك…” دەگەن سوزىنە ريزا بولدىم. ورالماندار تۋرالى əڭگىمە ايتىلسا، “ساتقىندار، قاشقىندار” دەپ كەيىپ، كەۋدەدەدەن يتەرەتىن كەيبىر “كوسەمدەرىمىز” تاريحقا كوز تاستاسا ەكەن»، – دەپ باستادى ءسوزىن مايعازيەۆ.

حاكىم ابايدىڭ دانالىق سوزدەرىن مىسالعا كەلتىرگەن مايعازيەۆ ورالماندار ءۇشىن قاتتى الاڭداۋلى ەكەنىن ءبىلدىردى. ودان بولەك، ورالمانداردان نەمەسە شىمكەنتتىكتەردەن (استانانى) قىزعانۋ ناعىز نادان، ءبىلىمسىز ادامداردىڭ ءىسى ەكەندىگىن ايتىپ ءوتتى.

https://www.instagram.com/p/BKqIjTXBK6W/

“مەن ىشپەگەن ۋ بار ما؟!” دەپ اباي اتامىز ايتقانداي، قازاق كورمەگەن قورلىق بار ما؟! اقتابان شۇبىرىندى، القاكول سۇلاما، اشارشىلىق، ساياسي قۋعىن-سۇرگىن… باس ساۋعالاپ، قازاعىمنىڭ اتىن وشىرمەيمىن، ۇرپاعىمدى اشتان ولتىرمەيمىن دەپ، باس اۋعان جاققا كەتكەن ءوز قانداستارىمىزدىڭ ۇرپاقتارىن وزەككە تەبەتىنىمىز وكىنىشتى. ولاردىڭ دا بابالارى قازاق xالقى ءۇشىن قاسىق قانى قالعانشا كۇرەستى. قالا بەردى، قىلىشىنان قان تامىپ تۇرعان كەڭەس ۇكىمەتى كەزىندە رەسەي، قىتاي، موڭعوليا، وزبەكستان سياقتى ت.ب شەكارالاس ەلدەرىمىزگە ءبىراز جەرلەرىمىز ەنىپ كەتتى. كورشىلەس ەلدەرىمىزدە قانشاما بيلەرىمىزدىڭ، باتىرلارىمىزدىڭ، بابالارىمىزدىڭ سۇيەگى جاتىر. ەڭ بولماسا، ارۋاقتاردى قۇرمەتتەيىك.

“قىتايدان، كارىستەن، فرانتسۋزدان، اعىلشىننان قىزعانباعان استاناڭدى شىمكەنتتىكتەن قىزعاناسىڭ با؟” دەپ بەكبولات اعامىز ايتقانداي، ءوز قانداستارىمىزدان ءوز ەلىمىزدى، ءوز جەرىمىزدى قىزعانبايىق، xالايىق. ول – ساناسىزدىق، بىلىمسىزدىك، ناداندىق. شىنتۋايتىنا كەلگەندە، قازاقستاندا تۋىپ-ءوسىپ، سۋىن ءىشىپ، نانىن جەپ جۇرسە دە انا ءتىلىن، ءدىلىن، ءدىنىن بىلمەيتىن ءدۇبارالاردان گورى سالت-ءداستۇرىمىزدى ساقتاعان ورالماندارىمنىڭ ولسە ولىگى ارتىق ەمەس پە؟! وزگە ۇلت وكىلدەرىنە كۇلكى بولۋدى، ءوزىمىزدى وزگەنىڭ تابانىنىڭ استىنا سالىپ بەرۋدى دوعارايىق، دوستار. ء“بىرىڭدى، قازاق، ءبىرىڭ دوس، كورمەسەڭ ءىستىڭ ءبارى بوس” دەگەن xاكىمنىڭ قاناتتى ءسوزىن تۋ ەتەيىك، اعايىن. اللا تاعالا قازاقستانىمىزدىڭ بولاشاعىن جارقىن ەتكەي. قۇشاقتادىم!» – دەپ تۇيىندەدى ءسوزىن مايعازيەۆ.

ساكەندى قولداعان جەلى قولدانۋشىلارى: «اللاعا شۇكىر، وسىنى ايتار اقىرى ءبىر قازاق شىقتى-اۋ ورتاعا»، «ساكەن باۋىرىمىزدىڭ قازاق رەتىندە ءوز ۇلتىنىڭ جىرتىسىن جىرتقانى دۇرىس.قازاقتىڭ قازاعى….»، «وسىنى ەستيتىن قۇلاق، كورەر كوز بولسا ەكەن»، «كەرەمەت! اسىل ەر، اقىلدى ازامات، ونەگەلى تۇلعا…»، «ايتقانىڭىزدىڭ ءبارى دۇرىس اعا. ورىستىڭ جازىپ بەرگەن تاريحىنا سەنگەندەر ورالمانداردى ساتقىن دەيدى»، – دەپ جازدى جەلى قولدانۋشىلارى.

Qazaquni.kz