ەسىڭىزگە سالايىق. پۋتين «قازاقتاردا ەشقاشان مەملەكەت بولماعان» دەگەن. مەملەكەت قانا ەمەس، مەملەكەتتىلىك بولماعانىن تىلگە تيەك ەتكەن، كرەملدىڭ كوسەمى. سۇمدىق ءسوز، ءيا؟ ايتا سالدى، بولدى. وداقتاسىمىز نە ويلايدى دەپ پىسقىرعان دا جوق. پۋتين عوي ول. وعان ءبارىبىر…
ودان بەرگى ۋاقىتتا پۋتين پىكىرىن وزگەرتتى مە، جوق پا ءبىز بىلمەيمىز. ونىڭ ءسوزى سول جولى رەسەي باسشىسىن تىكەلەي تىڭداعان كۇللى ورىس حالقىنا تارادى. ال ورىس حالقى بىرجاقتى ويلايدى. ءبىز مۇنى بىلەمىز. ولار وزدەرىنىڭ كوسەمدەرىنە شاڭ جۋىتپايدى. ولار ءۇشىپ پۋتين پايعامبار. جوق، راس قوي؟!
بىراق، كۇنى كەشە كۇتپەگەن جاعداي بولدى. پۋتين پىكىرىنىڭ كۇل-تالقانى شىققان كۇن بولدى بۇل.
استانادا تاۋەلسىزدىك 25 جىلدىعىنا وراي ۇلكەن شارا ءوتىپتى. شاراعا رەسەيدەگى تانىمال پروفەسسور، سول جاقتاعى ەكونوميكالىق ستراتەگيالار ينستيتۋتىنىڭ ديرەكتورى الەكساندر اگەەۆ شاقىرتىلعان ەكەن. الەكەڭە، ريزا بولدىق. ايىزىمىزدى قاندىرىپ ايتىپتى.
«قازاقستان تاۋەلسىزدىگىنىڭ 25 جىلدىعى مۇنداي مەملەكەتتىڭ قۇرىلعانىنا 25 جىل تولعاندىعىن بىلدىرمەيدى. وسىنى ۇمىتپاۋ قاجەت. مەملەكەتتىڭ وزىنە 1000 جىل، ءتىپتى عاسىرلاردان دا كوپ. سوندىقتان ءار ۋاقىتتا قازاقستاننىڭ كۇش-قۋاتى ارقالاي بولدى.
ماسەلەن، قاسىم xان، ەسىم xانداردىڭ تۇسىندا قازاقستان ۇلى ايماقتىق دەرجاۆا دارەجەسىنە دەيىن كوتەرىلگەن. رەسەي يمپەرياسى قۇرامىندا دا ءارتۇرلى كەزەڭدەر بولدى. سوسىن كەڭەستەر كەزىندە قازاقستان دەربەس مەملەكەت بولماسا دا، ول مەملەكەتتىڭ بولعانىن مويىنداۋىمىز قاجەت»، — دەگەن ەكەن اگەەۆ.
ءاي، جارايسىڭ!
مۇنداعى عالىمنىڭ «عاسىرلاردان دا كوپ» دەگەن سوزىنە ءمان بەرۋ كەرەك. بۇل نە؟ بۇل مويىنداۋ. ارتىق-الىپ قوسارىمىز جوق.
پروفەسسور مۇنىمەن شەكتەلمەپتى. «قازاقستان كسروو قۇرامىندا بولسا دا، ايماقتاعى ىقپالدى مەملەكەتكە اينالعان» دەپتى ول.
«قازاقستاننىڭ پەريفيريالىق مەملەكەت بولعانى جايىندا ايتىپ جاتىر. مەن ءوزىم بۇل پىكىرمەن كەلىسپەيمىن. سەبەبى ول كەڭەستەر قۇرامىنداعى وزىق ەلدەردىڭ ءبىرى ەدى. ءيا، بايقوڭىر، ۋران جانە تاعى باسقا سيرەك مەتالدار پوليگوندارى ماسكەۋدىڭ قاراماعىندا بولدى. دەگەنمەن، 91-ءشى جىلدارعا دەيىن قازاقستان جەتەكشى وندىرىستىك-اگرارلىق مەملەكەت بولىپ قالىپتاسا ءبىلدى»، — دەپتى رەسەيلىك مامان.
مۇنى ەستىگەن پۋتين قايتتى ەكەن؟ پۋتين نە دەدى ەكەن؟ سايىپ كەلگەندە اگەەۆ كرەمل كوسەمىنىڭ ءسوزىن جوققا شىعارىپ وتىر. رەسەيدە پۋتينگە قارسى كەلمەۋشى ەدى عوي…
365info.kz
پىكىر قالدىرۋ