QR Industriya jäne infraqwrılımdıq damu ministrligi – MIIR RK Qwrılıs jäne twrğın üy-kommunaldıq şaruaşılıq isteri komiteti üş jıldan beri qazaq tiline auısa almay keledi. Quanysh Ádilhanuly tarapınan mıñ hat jazılğan. Oğan «qarastıramız, saralaymız, oylastıramız, pilottıq qılıp jasaymız» degen mıñ jauap keldi. Biraq mäsele sonımen şeşilmey qaldı.

Äñgime memleket tarapınan qarjılandıratın qwrılıs jobalarınıñ (PSD) qazaq tilinde jasaluı turalı bolıp otır. Qazir onıñ barlığı tek bir tilde – orısşa jasaladı. Sebep – tapsırıs beruşi tarapınan onday talap joq. Bir qızığı, jobanı jasau üşin qajetti Qazaqstan Respublikasınıñ Qwrılıs normaları, Qwrılıs Erejeleri jäne basqa da memlekettik standarttar men tehnikalıq talaptardıñ, normativti-tehnikalıq qwjattardıñ tolıq qazaqşa nwsqası bar. Qazaq tildi injenerler men basqa da tehnikalıq mamandar jetip artıladı.

Talap bolsa, bizdikiler ağılşınşa da, qıtayşa da dayındap beretinin körip jürmiz. Mısalı, elimizdiñ batıs öñirlerinde mwnay öndiretin TŞO, NCOC, KPO siyaqtı şeteldik kompaniyalardıñ jobaları mindetti türde ağılşın tilinde jasaladı. Sebebi, olar sonday talap qoyadı. Al bizdegi qıtay kompaniyaları qwrılısqa tapsırıs bergende jobanı qıtay tiline audartudı mindetteydi. Ol da op-oñay orındalıp jür. Biraq bizdiñ memleketke nege özi qarjı bölip otırğan jobanıñ qazaqşa nwsqası kerek emes?

Qwrılısşılar tarapınan da, deputattar tarapınan da Qwrılıs jäne twrğın üy-kommunaldıq şaruaşılıq isteri komitetine eki jıldan beri üzdiksiz hattar joldanıp, talap-ötiniş qoyılıp jatsa da, Komitet şın mäninde hattarğa jauap qaytarıp qana, özin-özi aldap kelgeni anıqtaldı. Olar bergen jauabında “jobalauğa qajet otandıq SANA komp'yuterlik bağdarlamasın qazaqşalau üşin onıñ äzirleuşilerimen jwmıs jasap jatırmız” dep jazğan. Al şın mäninde, sol bağdarlama äzirleuşileri bwl swraqpen olarğa Komitetten eşkimniñ habarlaspağanın aytıp, aqırında wyat bolıp qaldı.

Qazaq tilin qwrılıstı jobalauğa kirgizeyik, tildiñ tehnikalıq äleuetin damıtayıq degen azamattar Komitetke hat jazuda, wsınıs bildirude. Komitet oğan «otpiska» jasap qana jauap berude. Solay ömir de, uaqıt ta asıqpay ötip bara jatır.

Bwl jerde bir qızığı – «Estuşi memleket» koncepciyası bwzılmay, orındalıp otır. Sebebi memleket estip otır. Ol osı hattardı oqıp otır. Odan basqa ne kerek?

Aybar Oljaev