Bıltır Äliya Äşimniñ «Orıstandıru» fil'mine şaqırtu aldım. Şaranı wyımdastırğan Ramil' eken. Sol kinodan keyin qazaq tili joyıludıñ az-aq aldında bolğanın tüsinip, tabısın tauıp otırğan qoğamda aq jüzdi ömir sürgisi keletinin wğınıp, tilimizge paydalı bastamalarğa atsalısuğa şeşim qabıldasa kerek. Alayda zaldağı jwrt onı qayta-qayta sögip, keşirimin qabıldamağanda, ayap kettim. «Dana halqımız ökpege qisa da, ölimge qimaytın edi. Tım artıq ketpedik pe?» dep oylandım.

Sodan keyin Ramil'ge jazıp, Mwhametjan Tınışbaywlınıñ ğasır bwrın şıqqan eñbegi äli künge deyin qazaqşa jarıq körmegenin aytıp, onı audarıp basuğa qoldau swradım. Biz tarihi kitaptardı 2021 jıldan beri şığarıp kelemiz. Bwl – kürdeli joba, demeuşilerimiz bolmağanda, onı jüzege asıru oñay bolmas edi.

Ramil' komandasımen aqıldasuğa uaqıt swradı da, köp wzamay qoldaytının ayttı. Sonıñ arqasında biz «Qazaq halqınıñ tarihın» keşiktirmey oqırmanğa wsındıq. Eger Mwhametjan atamızdıñ aruağı riza bolsa, Ramil'diñ eñbegin de joqqa şığara almaymız.

Osı twsta «demeuşi bolatın qazaq tabılmadı ma?» dep swrauı mümkin. Tabılmadı. Talay qazaq käsipkerine barıp, qoldau swradım. Özin el janaşırı dep, milliondağan dollar salıq töleytinin maqtan etetin käsipkerlerdiñ birazınıñ, ökinişke qaray, wltımızdıñ tarihın qoldauğa öresi äli jetpey jatır. Namıstan jarılsaq ta, şındıq osı.

Bıltır bir dollar-millionerge barıp qoldau swrağanda, Tınışbaywlın mülde tanımaydı da eken. Şok boldım. Qayta keñesşisi eñbektiñ mañızın barınşa tüsindiruge tırıstı. Basında qoldaymın degen sıñay tanıtqanımen, keyin bas tarttı.

Sondıqtan tabalaudı doğarayıq. Sürinbeytin twyaq, jañılmaytın jaq joq. Adamnıñ nietin onıñ äreketiniñ nätijesine qarap bağalaytın kez keldi. Ramil'diñ qoldauımen qwndı mwra ana tilimizde jarıq kördi. Eñ bastısı osı emes pe?