بىلتىر ءاليا ءاشىمنىڭ «ورىستاندىرۋ» فيلمىنە شاقىرتۋ الدىم. شارانى ۇيىمداستىرعان راميل ەكەن. سول كينودان كەيىن قازاق ءتىلى جويىلۋدىڭ از-اق الدىندا بولعانىن ءتۇسىنىپ، تابىسىن تاۋىپ وتىرعان قوعامدا اق ءجۇزدى ءومىر سۇرگىسى كەلەتىنىن ۇعىنىپ، تىلىمىزگە پايدالى باستامالارعا اتسالىسۋعا شەشىم قابىلداسا كەرەك. الايدا زالداعى جۇرت ونى قايتا-قايتا سوگىپ، كەشىرىمىن قابىلداماعاندا، اياپ كەتتىم. «دانا حالقىمىز وكپەگە قيسا دا، ولىمگە قيمايتىن ەدى. تىم ارتىق كەتپەدىك پە؟» دەپ ويلاندىم.

سودان كەيىن راميلگە جازىپ، مۇحامەتجان تىنىشبايۇلىنىڭ عاسىر بۇرىن شىققان ەڭبەگى ءالى كۇنگە دەيىن قازاقشا جارىق كورمەگەنىن ايتىپ، ونى اۋدارىپ باسۋعا قولداۋ سۇرادىم. ءبىز تاريحي كىتاپتاردى 2021 جىلدان بەرى شىعارىپ كەلەمىز. بۇل – كۇردەلى جوبا، دەمەۋشىلەرىمىز بولماعاندا، ونى جۇزەگە اسىرۋ وڭاي بولماس ەدى.

راميل كومانداسىمەن اقىلداسۋعا ۋاقىت سۇرادى دا، كوپ ۇزاماي قولدايتىنىن ايتتى. سونىڭ ارقاسىندا ءبىز «قازاق حالقىنىڭ تاريحىن» كەشىكتىرمەي وقىرمانعا ۇسىندىق. ەگەر مۇحامەتجان اتامىزدىڭ ارۋاعى ريزا بولسا، ءراميلدىڭ ەڭبەگىن دە جوققا شىعارا المايمىز.

وسى تۇستا «دەمەۋشى بولاتىن قازاق تابىلمادى ما؟» دەپ سۇراۋى مۇمكىن. تابىلمادى. تالاي قازاق كاسىپكەرىنە بارىپ، قولداۋ سۇرادىم. ءوزىن ەل جاناشىرى دەپ، ميلليونداعان دوللار سالىق تولەيتىنىن ماقتان ەتەتىن كاسىپكەرلەردىڭ ءبىرازىنىڭ، وكىنىشكە قاراي، ۇلتىمىزدىڭ تاريحىن قولداۋعا ورەسى ءالى جەتپەي جاتىر. نامىستان جارىلساق تا، شىندىق وسى.

بىلتىر ءبىر دوللار-ميلليونەرگە بارىپ قولداۋ سۇراعاندا، تىنىشبايۇلىن مۇلدە تانىمايدى دا ەكەن. شوك بولدىم. قايتا كەڭەسشىسى ەڭبەكتىڭ ماڭىزىن بارىنشا تۇسىندىرۋگە تىرىستى. باسىندا قولدايمىن دەگەن سىڭاي تانىتقانىمەن، كەيىن باس تارتتى.

سوندىقتان تابالاۋدى دوعارايىق. سۇرىنبەيتىن تۇياق، جاڭىلمايتىن جاق جوق. ادامنىڭ نيەتىن ونىڭ ارەكەتىنىڭ ناتيجەسىنە قاراپ باعالايتىن كەز كەلدى. ءراميلدىڭ قولداۋىمەن قۇندى مۇرا انا تىلىمىزدە جارىق كوردى. ەڭ باستىسى وسى ەمەس پە؟