Qañtardıñ 17 küni Qıtay astanası Beyjiñde eldi eleñdetip, dübiri jer jarğan ülken bir saltanattı şara ötti. «Baytaq alaptıñ wlandarı – 2015 jılğı memlekettik 10 üzdik diqandı bağalau sıylıq taratu saltı» dep atalatın saltanattı jiındı Qıtay ortalıq televiziyasınıñ 7 arnası wyımdastırıp, körsetti. Barşa jwrttıñ, milliondağan körermenniñ nazarı bükil el boyınşa, 55 wlttıñ arasınan saralanıp şıqqan, milliardtıñ işinen mañdayı jarqırap, sahna törinde twrğan 10 üzdik eñbek erine audı. Mine solardıñ qatarında Şıñjañdağı Erentaudıñ qoynauına qonıs tepken Qwtıbi audanı, Torğaytı qalaşığı, Torğaytı auılınan kelgen qazaq Baqıtqan Qazezwlı da bar edi.
Üstine qazaqı ülgidegi zerli şapan, basına oyulı taqiya kigen eñgezerdey deneli, qızıl şıraylı azamattıñ özgelerden erekşelenip twrğanı da şındıq. Qasına ükili taqiya, oyulı kostyu'm kigen nemeresin erte şığıptı.
Bwl jolğı üzdikter Qıtay Halıq Respublikasınıñ Auıl şaruaşılıq ministrligi tarapınan bağalandı. Er eñbegin qadirlegen ükimet är üzdikke bağalı sıylıq, erekşe kädesıy, arnayı diplommen birge 50 mıñ yuan' naq aqşa tabıs etti.
Bükil Şıñjañnan jalğız özi qara üzip şığıp, Astanada sıylanğan Baqıqtan Qazezwlı bwl märtebege adal eñbek, aq peyil azamattığımen jetken jan. Onıñ bastı erekşeligi narıqqa erte beyimdelip, käsiptiñ közin taba bilgendigi.
Qandasımız jaylı qısqaşa toqtala ketsek, B.Qazezwlı eñ aldımen auıldağı qamdau-sauda koperativiniñ jük maşinasın jalğa alıp, tasımal jwmısımen aynalısadı. Sırt jerlerge barıp, el körgen azamat olardıñ jaqsı twrmıs-jağdayın qanığıp, öz auılın da osınday deñgeyge jetkizsem degen maqsatqa qwlşınadı.
1994 jılı mal şaruaşılığına den qoyğan Baqañ köne sürdekpen jüre bermey, ğılımi jolmen mal bağu arqılı 20 bas qoy, 2 bas siırın az jıldıñ işinde neşe eselep, auqattı adamdardıñ biri bolıp şığa keledi. Eñ ülken qasieti ol – özi bayığanına emes, özgelerge kömek qolın sozıp, auıldastarın alğa jeteley alatın mümkindigi payda bolğanına quanadı. Kömekke mwqtaj, qiınşılığı bar jarlı-jaqpaylarğa qolınan kelgen kömegin ayamaydı. Auıldağılardıñ «qiınşılığıñ bolsa Baqıtqanı izde» degen tämsildi sözi tegin aytılmasa kerek.
Baqıtqannıñ jomart köñil, jaqsı tilekpen kömek körsetken isin sanamalap tauısu qiın. Ol 30 jıldan beri 150-dey otbasına är türli järdem köretip, 300 mıñ yuannan astam qarjısın jwmsağan. Kömektesu – auıldastarınıñ uaqıttıq qiınşılığın şeşkenimen, olardıñ aldağı uaqıtta twrmısın jaqsartuına jol aşa qoymaytının añğarğan ol tıñ täsil qarastıra bastaydı.
Onıñ üstine malşı qauımı qoldağı malınıñ sanın arttıru, jayılımdı dwrıs paydalanuğa asa män bermey, bayırğı sürdekpen jürip kele jatır edi. Bwl olardıñ jañaşa jolmen auqattanuına, äri kün sayın twyaq kesti bolıp bara jatqan mal örisin qalıpqa keltiruge sebi timeytin edi. Osını oylağan Baqıtqan 2012 jılı jergilikti ükimet ornınıñ qoldauımen 56 malşınıñ basın qosıp, Şıñjañda twñğış ret jayılım mal-şaruaşılıq koperativin qwradı.
Bwl qadam malşılardıñ özara selbesip auqattanuına, jayılımdı tozdırmay saqtauına, maldı ğılımi jolmen qolda bağıp, sapasın jaqsartuğa bağıttalğan edi. Osınday ülken bastamalarğa mwrındıq bolıp, auıldastarına sonı jol, jaña täsil nwsqağan Baqıtqannıñ aldağı josparları da köp. Ol koperativti äli de keñeytip, twrmısı tömen, eñbekküşi az otbasılardı demep, jağdayın jaqsartudı oylaydı.
Zamanğa say wmtılıs jasap, özin ğana emes, auıldağı ağayınnıñ da jayına janı aşitın eñbek eriniñ är isi berekeli bola bergey! Baqıtqan Qazezwlınıñ memleket tarapınan joğarı bağalanıp jatuı – qazaq halqınıñ da eñbeksüygiş, bauırmal, talaptı halıq ekenin milliardtar eline tanıttı dep oylaymız.
Mwrat Almasbekwlı 

baq.kz