4-5 jıldan beri mal saudasın käsip etken 1979 jılı tuğan Doldanwlı Jarqınbek, 1973 jılğı Zarlıhanwlı Mwqiyat pen Älimhan Qadılbek esimdi jigitter Şığıs Qazaqstan oblısınıñ Tarbağatay audanınan 43 bas mal satıp alıp, onı eki jük köligimen 17 qırküyek, senbi küni, Almatı mañındağı Wzınağaş bazarına şığarğan.

Senbi, 17 qırküyekte: Sol küni olar eki bas maldıñ satılğanın, qalğandarın da satu üşin erteñgi jeksenbilik bazarğa şığatının aytıp, üyindegilerge habarlağan.

Jeksenbi, 18 kırküyekte: Olarğa jeksenbi küni beytanıs bir azamat kelip, «Maldarıñnıñ bärin men satıp alamın. Wzınağaştan 40 şaqırım jerdegi üyime jetkizip beriñder. Aqşalarıñdı sol jerden alasıñdar», – dep, är bas malğa 143 mıñ teñgeden bağasın da kelisip ketken.

Sol küni körgen kuägerlerdiñ aytuınşa, joğalğan jigitter: «Maldarımızdıñ qalğan 41 basın bireuler alatın boldı. Üyine jetkizip berip, aqşamızdı alıp, keşke qaray biz de üyge qaytamız», – degen.

Satıp alğan adamğa maldarın jetkizip beruge jolğa şıqanın aytıp, üyindegilerge telefonmen habarlağan.

Tüsten keyinnen bastap olardıñ telefondarı söndiruli boladı.

Düysenbi, 19 qırküyekte: mülde habarsız ketse de, tusıqandarı olardı keledi dep kütken. Tergeu nätijesine say, birinşi maşina osı küni örtengen.

Seysenbi, 20 qırküyekte: eşqanday habar bolmağan soñ, üş jigittiñ bireuiniñ ağası Adal Zarlıhan otbasındağılarmen aqıldasa kele, Almatı oblısı Köksu audandıq işki ister bölimine inileriniñ joğalğanı jaylı arız tüsirip, qasına birneşe adam ertip, Almatı jaqqa jigitterdi izdeuge şıqqan. Wzınağaş, Otar jäne qırğız-qazaq şekarası mañın şarlap izdegen. Tüngi sağat 21:00 mölşerinde Qorday polciyasına üş jigittiñ joğalğanı jaylı arız qaldırğan.

Särsenbi, 21 qırküyekte: tuıstarın izdegen atalmış jigitter küni boyı Şu jaqtı şarlap kelip, keşke qaray Wzınağaştağı Jambıl audandıq işki ister bölimine arzı jazğan. Olar Wzınağaş audandıq işki ister böliminde otırğan kezde üstilerinen «Taldıqorğannan keldik» dep üş adam kirgen. Ol jerde otırğan policeyler bir-birine orısşa söylep: «Keşegi örtengen maşina osılardiki emes pe eken?» degen siyaqtı äñgimeler qozğağan.

Beysenbi, 22 qırküyekte: izdeu şaralarınan eş nätije bolmağan soñ, joğalğan jigitterdiñ bireuiniñ ağası Twrsın Älimhan degen azamat Baq.kz redakciyasına habarlasıp, aqparattıq kömek beruin ötingen.

Bwl küni joğalğan jigitterge tiesili bir kölik örtengen küyinde tabılğan.

Sol küni keşke qaray örtengen maşina turalı habardı estigen Adal Zarlıhan policeylerge erip, naq maydanğa barğan. Jol boyındağı kameralardı tekserip, eş derek köre almağan. Sol maşina örtengen uaqıtta onı körgen bir malşı men dämhanada jwmıs jasaytın tağı bir äyel Wzınağaş policiyasına habar beregen. Biraq eşqanday qwqıq qorğauşı kölik örtengen jerge kelmegen. Kuägerler «bwl köliktiñ keşki 20:40 kezinde örtengenin, 20 qırküyekten 21 qırküyekke qarağan küni keşte, qasınan aldıñğı bamperi sınğan jeñil kölikke mingen eki adamnıñ ketip bara jatqanın körgenin» aytqan.

Jwma, 23 qırküyekte: Jambıl oblısı Degeres auılınan ekinşi maşina tabıldı.

Ol turalı qıtaydan köşip kelgen beytanıs oralman jigit habarlağan. Ol mal satıp jürgen jigitterdiñ joğalğanın, el bolıp izdep jatqanın internetten körip, iesiz twrğan köliktiñ qasına barıp fotoğa tüsirip alğan da, tileulestik nietpen izdeuşilerge habarlap, vatsappen fotosın jibergen. Bwl habardı esti sala, tuısqandarı tañğı bes mölşerinde policeylermen birge maydanğa barğan. Onı özge eki policey küzetip twrğan. Köliktiñ akkumulyatorı wrlanıptı.

Kölikti körgenin habarlağan jigit, «ötken keşte öziniñ bir tanısınıñ mal tiegen, bwzılıp, otalmay qalğan bir jük köligin jöndep bergenin» aytıp, ol adamnıñ telefon nömirin bergen. İzdeuşiler, yağni, Adal Zarlıhan bastağan adamdar älgi adamğa habarlasıp, kezdesken. Sol ekinşi kuägerdiñ aytuınşa: «bwrın policiya qızmetkeri bolğan bir jigit kelip, maşinaları bwzılıp qalğanın, jöndep beruin ötinip, ertip barğan. Ol kezde joğalğan üş jigit bwl jerde de bolmağan. Policiyada jwmıs jasağan älgi jigitpen qosa ol jerde özge eki adam jäne iesimen qosa bir traktor bolğan. Ol otalmay qoyğan maşinanı süyreuge kelgenin aytqan.

Jük köligi jöndelgen soñ rölge asığıs otırğan olar maşinanı ornınan qozğap qalğanda jol şetinde jaqın twrğan traktordı barıp soğıp, audarıp tastağan.

Ol trkatordı tartıp twrğızu üşin özge kölikter şaqırılğan. Sosın bwzılğan maşinanı jöndegen jigit üyine qaytıp ketken.

İzdeuşiler bwl habardı esti sala sol mañayğa barıp, közderimen anıq izderdi körgen.

Osı küni tünge qaray izdeuşi jigitterdiñ küşimen Şien degen auılda jayılıp jürgen jerinen 35 bas mal tabıldı.

Senbi 24 qırküyekte: Almatı oblısı Jambıl audanında ötken jeksenbide joğalğan mal saudasımen aynalısatın üş jigittiñ qaza tapqanı belgili boldı. Ol turalı policiya marqwmdardıñ tuıstarına estirtken.

Qılmıskerler üş mürdeni Almatıdan 270 şaqırım jerge aparıp, ien şwñqırğa tastap, köñmen kömip ketken.

Qandı qılmıstı tergeu jwmıstarı Almatı oblısı äkimdiginiñ nazarına alındı.

Bügin, Wzınağaş policiyası tekseru nätijesinen soñ, qapıda jazım bolğan üş azamattıñ süyekterin qaytarıp berdi.

Janaza namazı erteñ, yağni, 27 qırküyek küni Almatı oblısı Köksu audanı Qazaqstan auılında sağat 10:30 da oqıladı.

Qoğamda zor dümpu tudırğan atışulı oqiğa jaylı qazirge deyin eşbir qwzırlı organ arnayı mälimdeme jasağan joq.

Qaza bolğan üş azamattıñ artında 9 bala jetim qaldı…