Jalpı, «Nwr Otan» partiyası Bas Prokuratura jäne basqa da memlekettik organdarmen tığız baylanısta jwmıs istep qeledi. Atalğan organdardıñ basşıları, orınbasarları, deputattar jıl boyı partiyanıñ Respublikalıq qoğamdıq qabıldau bölmesinde azamattarmen qabıldau ötkizedi.

Osı dağdı boyınşa «Nwr Otan» partiyasınıñ Respublikalıq qoğamdıq qabıldau bölimine bügin Qazaqstan Respublikasınıñ işki ister ministri, policiya general-leytenantı Qalmwhanbet Nwrmwhanbetwlı Qasımov özi kelip, ötiniş ayta kelgen halıqtı qabıldadı.

Ayta ketuimiz kerek, osı qabıldaudıñ habarı şıqqalı, telefonımızda tınım bolğan joq. Arqa men Jetisudan neşe jüzdegen qandastarımız qoñırau şalıp, Köşi-qon mäselesi, twraqtı tirkeuge twrudıñ qiındığın aytıp jalbarındı… Kelgen kauımnıñ da qarası öte köp boldı. Solardıñ eñ qomaqtı bölimi QHR-nan kelgen etnikalıq qazaqtar.

Olar sol twraqtı tirkeuge twruda talap etiletin sottılığınıñ bar nemese joq ekeni turalı ANIQTAMA-nıñ qiındığı jäne 2013 jılı tört jılsız azamattıq berilmeytin etilip asığıs qabıldanğan qatañ Zañnıñ kesirinen äkimşilik qwqıq bwzuşılıqqa wrınıp, elden tısqarı şığarılğan tuıstarınıñ tağdırı turalı ötinişpen kelipti.

Mısalı, Almatı qalasındağı №93 mekteptiñ 3 «Ä» sınıbında oqitın 9 jastağı Meyirgüldiñ äkesi Wlarbek pen şeşesi Oralhan sottılıqqa baylanıstı ANIQTAMA-nıñ kesirinen, vizasınıñ merzimin ötkizip alğanı üşin äkimşilik qwqıq bwzuşılıq jazasına tartılıp, elden şığarılğan. Endi Wlarbek pen Oralhan Qazaqstan Respublikasına 5 jılsız kele almaydı. Qarğaday qız Meyirgül Almatıda jalğız qalğan.

 – Qalmwhanbet ata, men sekildi sizdiñ de nemereñiz bar şığar. Mağan kömektesiñizşi, ötinem. Äkem men şeşeme jäne sonday kisilerge bir jolğa raqımşılıq jasañızşı. «Nwr Otan» partiyasına sol üşin Almatıdan keldim. Olar Qazaqstanğa tez qaytıp oralsınşı. Men olardı qattı sağınıp kettim!, - dep, Meyirgül uäjin aytqanda, bükil eldiñ say süyegi sırqırap-aq ketti. Ministr de özin qoyarğa jer tappay, qattı qinaldı. Hat wstağan qoldarı qaltırap ketti….

Senator Mwrat Baqtiyarwlınıñ deputattıq saualına Policiya general-leytenantı Qalmwhanbet Nwrmwhanbetwlı öz qolımen bergen aqparatqa qarağanda, 2015 jılı 307 etnikalıq qazaq elden tıs jerge şığarılıptı. 2016 jıldıñ alğaşqı toğız ayında 199 qandasımız jazağa tartılıp, öz eline qaytarılıptı. Al, 2014 jıl turalı derek bermepti. Bwl jılı jazağa wşırağan qandastarımızdıñ sanı tipti de köp boluı mümkin.

Ministr bwl mäseleni şınında tezdetip şeşpese, qandastarımız köşip kelgenmen, bäri bir twraqtı tirkeuge twra almay, deldaldarğa jem bolıp jatqanı jasırın emes. Köbi äkimşilik qwqıq bwzuşılıqqa wşırap, sottıñ şeşimimen kelgen eline qaytarıluda. Bwl memleketimizdiñ, Elbasımızdıñ bedeline nwqsan keltireri de haq!..

Söytip, Meyirgül bastap, qabıldauğa kelgen qandastarımız tügel ötinişterin aytıp, jazbaşa ötinişterin tapsırdı. «Nwr Otan» partiyasına, onıñ Respublikalıq qoğamdıq qabıldau böliminiñ meñgeruşisi Jwmajan Jükenovke, barlıq qızmetkerlerine alğıstarın jaudırdı.

Öz kezeginde biz de tömendegi üş ötinişti negizge ala otırıp, mäseleni şeşudiñ tiimdi jolın wsındıq:

1. «Şeteldikterge jäne azamattığı joq adamdarğa Qazaqstan Respublikasında uaqıtşa jäne twraqtı twruğa rwqsattar beru qağidatı» degen Qazaqstan Respublikasınıñ İşki ister ministrliginiñ №992 bwyrığınıñ  10 tarmağınıñ 7)-tarmaqşasına tolıqtıru engizip, «eger halıqaralıq şartta özgeşe közdelmese, Qıtay Halıq Respublikasınan keletin etnikalıq qazaqtardı qospağanda;» degen bir auız eskertpe qostırsañız, Qıtaydan kelgen qazaqtar bwl qorlıqtan qwtıladı;

(Mäseleni osı jolmen ğana şeşuge äbden boldı. Sebebi, kezinde osı №992 bwyrıqtıñ «azamattığı bar memlekettiñ jazbaşa kelisimi, ol ketu parağı ne şetelge twraqtı twruğa şığuğa arnalğan rwqsattı rastaytın basqa qwjat retinde jürui mümkin (bosqındar dep tanılğan nemese Qazaqstan Respublikasında pana wsınılğan şeteldikter men azamattığı joq adamdardı jäne eger halıqaralıq şartta özgeşe közdelmese, Qıtay Halıq Respublikasınan keletin etnikalıq qazaqtardı qospağanda);» degen 10 tarmağınıñ 4) tarmaqşasına da osı eskertpeni qostırğamız)

2. Qıtaydan köşip kelip, osı mäselege baylanıstı twraqtı tirkeuge twra almay, vizasınıñ merzimi ötip ketken barlıq etnikalıq qazaqtardı qwqıqbwzuşılıq jazasına tartpay, keşirim jasauıñızdı ötinem!

3. Qazaqstan Täuelsizdiginiñ 25 jıldığı merekesine oray Wlt Köşbasşısı Nwrswltan Nazarbaev 30 000 qılmıskerge raqımşılıq jasağalı jatır. Qazaqstan Respublikasınıñ QR İşki ister ministri märtebeñizben, eski Zañnıñ tım qatañdığın eskere otırıp, Sizdiñ de Qazaqstan Respublikasınıñ Äkimşilik qwqıq bwzuşılıq turalı kodeksine säykes köşi-qon zañnamasın bwzğanı üşin, 2014 jıldıñ 1 qañtarınan beri Sot şeşimimen elden tıs jerge şığarılğan sol qandastarımızğa bir märte raqımşılıq jasatuıñızdı swraymın!

Eger, bwl mäsele 2016 jıldıñ ayağına deyin şeşilmese, BAQ ökilderimen baspa söz mäslihatın ötkizip, Qıtay Halıq Respublikasında twratın etnikalıq qazaqtardıñ Qazaqstan Respublikasına köşip kelmeuin mälimdeuden özge amalımız joq ekenin auızşa da, jazbaşa da eskerttik!

Eskertu:

İşki ister ministri Qalmwhanbet Nwrmwhanbetwlı bwl mäseleni tolıq tüsingenin, Sottılıq pen Raqımşılıq turalı mäseleni Ükimetpen aqıldasatının ayttı.

Auıt MWQIBEK

07.12.2016

Astana

Abai.kz