Алматыда балалар балабақшаға қажетті құралдарды қақпақтан жасап алды
kerey.kz
Алматыдағы №37 бөбекжай-балабақшасындағы балалар қажетті ойыншықтарды тәрбиешілермен бірігіп өздері жасап алған. 4-6 жас аралығындағы бүлдіршіндер оқуға қажетті заттарды көбінесе пластмассаның қақпағынан жасап келеді деп хабарлайды kerey.kz ақпараттық танымдық порталы. Олардың соңғы рет жасап шығарған ең үлкен жетістігі қазақтың қошқармүйізі бейнеленген қақпақ кілем. 15 күндей уақыт кеткен қақпақ кілемге 7 мыңнан астам тығын қолданылған екен.
Массаж үйін қолданып жүрген қақпақ кілемнің ұзындығы 4, ені 3 метр. Ең қызығы, бүлдіршіндер мен тәрбиешілер тек қажетсіз тұрмыстық қалдықтарды ғана қолданады. Тәрбиешілер оюдың орнын белгілеп, бағыт-бағдар берсе, қатты материалдың үстіне балалар қақпақты желіммен жабыстырады
Балалар бұған дейін төсеніштер және кішкентай кілемшелерді де жасап көрген. Тек оюсыз. Алыстан қарғанда бірыңғай жасыл немесе сары түсті төсеніштердің қақпақтан жасалғаны білінбейді. Мемлекеттік балабақшаның меңгерушісі бұл әдістерді шетелге қысқа мерзімді оқу курсына барғанда үйренген екен.
«Мен Оңтүсік Корея мемлекетіне, сосын Германия мен Мәскеуге де барып білімімді жетілдірдім. Сол кезде ол жақтан қажетсіз қалдықтарды кәдеге жаратуды үйрендім. Тығын арқылы әр түрлі моторикалық бұйымдар жасаймыз. Бұл балалардың денсаулығына да өте пайдалы. Осындай заттар арқылы олардың қызығушылығын оята отырып, әрі ысырапқа жол бермеуге үйретеміз. Балалар болмашы дүниелерден өмірге қажетті заттарды жасай алатындарын көргенде өздеріне сенім пайда болады»,- деді Алматы қаласы Алатау ауданындағы №37 бөбекжай-балабақшасының меңгерушісі Айнұр Әлімбекова.
Осы технологияларды қолданудағы ұжымның негізгі мақсаты – бала бойындағы шығармашылық қабілет пен терең ойлауды, қоршаған әлемді түсінуге, ақпараттық маңызды мәселелерді шешуге, қабілетті тұлға қалыптарсыруға жасалып жатқан мүмкіндіктер. Ең бастысы, мәдиниетті тұлға қалыптастыра отырып, олардың бойына ұлттық рухани құндылықтарды дарыту. Балабақша тәрбиешілері жаңашылдықты ұстана отырып, қолданыстан шыққан заттарды іске асырып отыр. Соның жарқын көрінісі – түрлі қақпақтардан әр түрлі ойын әрекеттері үшін заттар жасағаны.Осы ойыншықтар арқылы бала ең алдымен ысырапшылыққа жол бермейді. Әрі еңбекке деген қызығушылығы артады деп санайды ұжымның тәрбиешілері.
«Табанда, саусақтың ұшында жүйкемен баланысты көптеген нүктелер бар. Массаж қақпағымен тығынды бұрап, бекіту арқылы саусақ моторикасы, яғни саусақ қимылы іске қосылады. Тәрбиеленушілер мидың ойлануы мен дене қимылын да жұмыс істетеді. Баланың ой- өрісі кеңіп, сана сезімі, есте сақтау қабілетті артады. Мәселен, есептеуге арналған, түрлі дыбыстарды айыруға, түсті тануға арналған заттарымыз бар. Ұйқыдан оянған соң балалардың қақпақтан жасалған кілем үстімен баяу жүріп өтуінің өзі оларды белсенділікке, шапшаңдыққа, төзімділікке, табандылыққа баулиды», -деді аталған балабақшаның психологі Әйгерім Бәйімбетова.
Балабақшада 480-нен астам қақпақтан жасалған ойыншықтар мен құралдар бар. Балабақшадағы босаған шырын, сүттердің қақпақтары жетпеген соң балақайлар тығын, құмыраны үйлерінен тасиды екен. Осылайша, бір жыл көлемінде елу мыңға жуық қақпақты ата-аналар жинап берген. Бабақшада асықтан жасалған арнайы бөлмеде бар. Ұлттық бұйымдарда тәрбиеге таптырмас құрал.
«Асықтерапиясы бар. Оны біз күнделікті денсаулық сақтау мен қарапайым математикалық түсініктерді қалыптастыру үшін қолданамыз. Қатты матаға желімдеп жапсырылған асықтың үстінен балаларды жүргіземіз. Табанға, аяққа, арқаға жақсы. Бала сергек болады. Қан айналымы жақсарады. Ұлттық ойын түрлерінен бөлек балалар асық арқылы сандарды қосып-алу, түстерді ажырату сынды әдістер арқылы өз ойын дамытады», – деді балабақшаның әдіскері Жазира Шыныбаева.
Қәзіргі таңдағы балабақшалар қызметінде «М. Монтессори технологиясы», «Жобалау технологиясы», «Ойын технологиясы», «Құм терапиясы», «Денсаулық сақтау» технологияларымен қатар, тағы да басқа жаңаша технологияларды кеңінен қолданылуда әрбір балабақшаның өзіндік қолданып жатқан тың технологиялары бар. Әрбір шара «Денсаулық», «Таным», «Шығармашылық», «Коммуникация», «Әлеумет» салаларын қамтып, жаңа технологиямен байланыстырған. Осы ретте педагогтардың шығармашылық қабілеттері, ізденістері мен мүмкіндіктері, балалармен тіл табысуы, жаңашылдықты орынды қолдана білуі және оны ұйымдастыра білгендігімен ерекшеленеді. 360-тан астам бала тәрбиеленіп жатқан балабақшада қуыршақ бөлмесі мен арнайы адалдық алаңы да бар. Бала тәрбиелеудің өзгеше әдісін тапқан ұжымдағы қырықтан астам қызметкер жуырда қалдық құмыраларды да іске жаратпақ.
Пікір қалдыру