1 440 000 TEÑGE, Wşaq, poyız, avtobus keşikse ötemaqını qalay aluğa boladı?
kerey.kz
Samat Musabaev
Jazda qozğalıs köbeyedi. Eldiñ işine de, sırtına da sayahat, demalıs, balalardıñ kanikulı dep tınım tappaymız. Qozğalıs köbeygen soñ jolauşılar tasımalında qiındıq tuındap, jeliden ünemi reniş pen aşuğa tolı jazbalar oqıp twramız. Wşaqtıñ keşigui, poyızdıñ kesteden qalıp qoyuı sekildi oqiğalardıñ aptasına äldeneşeui belgili bop jatadı.
Meniñ aytpağım da osı mäselege qatıstı:
Jaqında äriptes ağam Edil Jañbırşin ekeumiz el jaqqa birge wştıq. Mañğıstauda kezdesulerimiz josparlanğan edi.
Astana äuejayına biz uaqtılı kelgenimizben, Air Astananıñ wşağı uaqtılı wşa qoymadı. Uaqtılı degende jartı sağat, bir sağat degenge etimiz äbden üyrendi ğoy. Endi bwlar eki sağat, üş sağattap wşpaudı şığarıptı. Bizdiñ wşağımız baqanday üş jarım – tört sağatqa keşigip wştı!
Otandıq äue kompaniyalarınıñ osı jauapsızdığına zığırdanım qaynap jüretin. Bıltır Mäjiliske kelgen köp zañnıñ biri – däl osı taqırıpqa qatıstı “Kölik turalı zañ” boldı.
Jii wşamın, keşikken wşaqtıñ kesirinen talay auzım küydi, köptegen äriptester de, azamattar da jii aytatın osı mäseleni.
Aldımızğa kelgen zañğa “tasımaldauşı tarap wşaq, poyız, avtobus qwraldarın keşiktirgen är sağatqa bilet qwnınıñ 3% ötemaqı retinde qaytaruı tiis” degen tüzetudi Edil Terekbaywlı ekeuimiz wsındıq!
YAğni, wşaq, poyız nemese avtobus bir sağat keşikse 3%, eki sağatqa 6%, osılayşa qosıla beredi. Tipti, bwlay jalğasa berse jolauşı bilet qwnın tolıq qaytarıp aluı da mümkin:)
Bwl, ärine, tasımaldauşılarğa wnağan joq. Alayda, halıqqa kerek tüzetu, el ünemi şağımdanatın närse bolğan soñ sözimizden tanbay, aytqannan qaytpay otırıp aldıq. Aqırı, Mäjilis zañğa tolıqtıru engizdi, Senat maqwldadı, qañtar ayında Prezident qol qoydı. Süytip, osı jıldıñ basınan beri bwl zañ küşinde!
Air Astananıñ wşağı tört sağatqa juıq keşigip wştı. Edil ağam ekeumiz elge aman esen jettik. Üyge keldim de, “özimiz erekşe eñbek siñirgen zañ edi, qalay jwmıs istep twrğanın köreyinşi” degen oymen, kompaniyanıñ resmi saytına kirip, şağım qaldırdım.
Qadirli ağayın! Üş-aq qadam. Qiın eşteñesi joq eken, men keşikken üş sağattan astam uaqıt üşin bilet qwnınıñ 10% somasın qaytarıp aldım.Bwl üşin ne isteu kerek? Reti bılay:
1) Kompaniyanıñ resmi saytına kiresiz. Tikeley silteme: help.airastana.com. Osı jerge tolıq atı-jöniñizdi, bilet nömirin, reys nömiri, wşu uaqıtı qanşağa keşikkeni jäne elektron poştañızdı jazasız. YAğni, şağım qaldırasız.
2) support@help.airastana.com – twtınuşılardıñ qoldau böliminen jauap keledi, “sizdiñ şağımıñız tirkeldi” degen jauap boladı jäne qosımşa anketa joldanadı. Osı anketadağı swraqtarğa jauap beresiz. Atı-jöniñiz ben aqşanı qaytaru üşin esepşot nömiriñizdi jazasız.
3) “Ötinişiñiz boyınşa talap etken ötemaqı soması sizdiñ şotıñızğa jiberildi” degen habarlama keledi. Osılayşa, Siz Mäjilis qabıldağan zañnıñ igiligin köresiz!
Öz basımnan keşken oqiğa. Özimiz engizgen wsınıstıñ, qabıldağan zañnıñ jwmıs istep twrğanın körip, quandım. Biraq…
Biraq, sol Edaqañ ekeuimiz wşqan reyspen Aqtauğa 180 jolauşı keldi. Solardıñ arasınan kompaniyağa şağım tüsirip, ötemaqı talap etken jalğız men bolarmın.
Eger, sol 180 adamnıñ ärqaysısı şağım jasap, kem degende 8 – 9 mıñ teñgeden ötemaqı alatın bolsa, sol küni Air Astana keşikken bir reys üşin şamamen 1 440 000 teñgedey ötemaqı tölegen bolar edi…
Är reys üşin bir jarım million tölep otıru kimge wnaydı? Keleside keşikpeudi üyrener edi!
Qwrmetti ağayın, bwl jazbam maqtan da emes, mindetsinu de emes. Bwl halqımız zañnıñ tetikterin bilip, öziniñ qwqıqtarın tolığımen paydalansa eken degen tilek!
Eger osınday kişkentay närselerden bastap talap ete bilsek, alıp kompaniyalardı jauapkerşilikke üyretemiz, birte birte twtas qoğamğa özgeris äkelemiz.
Bäri öz qolımızda!
Pikir qaldıru