Ә.Жатқанбаев, Қосағаш әкімі: Атажұртымыз – бейбітшілік пен бірліктің мекені
РФ Алтай Республикасы Қосағаштағы қандастарымыз атынан Қосағаш ауданының әкімі Әуелхан Жатқанбаев мемлекет басшысы Нұрсұлтан Әбішұлы Назарбаевтың 26 сәуірде өткен ҚР Президенті сайлауындағы жеңісімен құттықтап, редакциямызға хат жолдады.
Аса құрметті Нұрсұлтан Әбішұлы,
біз әрқашанда өзіңізбен біргеміз!
Ресей Федерациясы Алтай Республикасында, әсіресе, Қосағаш ауданында тұратын 12 мың қазақ атынан, өткен сайлауда айқын әрі сенімді жеңіске жеткен аса құрметті Нұрсұлтан Әбішұлына қандастарының қуанышы мен ыстық ықыласты құттықтауларын жеткіземін.
Мен осы жолғы саяси науқан кезінде қасиетті қарашаңырақ-Қазақстанның Шығысында, Өскемен қаласында шетелден барған байқаушылардың қатарында болып, сайлаушылардың бұрын-соңды болып көрмеген айрықша белсенділігіне қайран қалдым. Сайлаудың заң аясында әділ өткендігіне көз жеткізіп, жоғары баға берушілердің қатарындамын.
Мен үшін сайлау кезінде бақылаушы болғанымның өзі үлкен қуаныш. Біздерге, шетел қазақтарына сайлау құқы берілмесе де Сізге іштей сәттілік тілеп отырған жайым бар. Қазақ еліндей Президентті басым дауыспен сайлап шығуды басқа мемлекеттерден көру мүмкін емес. Мұндай болудың өзі Сіздің іскерлігіңізді ап-анық айқындап көрсете алады.
Бүгінгі күні Сіздің арқаңызда бүкіл әлем Атамекенімізді бейбітшілік пен бірліктің мекені деп есептейді және осы бейбітшілік ұстанымдағы саясатты көптеген мемлекеттер үлгі тұтады.
Біз атажұрттан алыс жүрсек те Қазақстан-Атамекеніміз әруақытта жүрегіміздің түбінен ерекше орын алады. Қазақстан тәуелсіз ел болғаннан бері дамып, өркендеп, әлемге танымал болды. Егемендік алғалы ағайын арасына шекара шымылдық болып кетті демесек, қазіргі күнде де сіздермен арамыз алыстамаған. Алтайдың ең шығысындағы, Шүй қазақтарының мәдениет, білім, спорт салаларының дамуына тәуелсіздіктен кейін де жіті назар аударылып отырды. Осындай қарым-қатынасты орнатып, ынтымақтастықты нығайтып отыруымыздың өзі Сіздің шетелдегі қандастарыңызға деген ерекше ықыласыңыз екеніне көзіміз жетіп отыр.
Қазақстан мемлекеті Сіздің көреген басшылығыңызбен алдағы уақытта да талай белестерді бағындырып, одан әрі гүлденуін тілейміз!
Сізге мықты денсаулық тілеп, өз қазағыңызға атқарып отырған ісіңізге сәттілік айтамыз.
Біз барлық Қазақстан халқына ынтымақ пен береке тілейміз. Жеңіс құтты болсын!
Ресей Федерациясы,
Алтай Республикасы қазақтары
қауымдастығының төрағасы,
Қосағаш ауданының әкімі Әуелхан Жазитұлы Жатқанбаев
baq.kz
Пікір қалдыру