ءا.جاتقانباەۆ، قوساعاش اكىمى: اتاجۇرتىمىز – بەيبىتشىلىك پەن بىرلىكتىڭ مەكەنى
رف التاي رەسپۋبليكاسى قوساعاشتاعى قانداستارىمىز اتىنان قوساعاش اۋدانىنىڭ اكىمى اۋەلحان جاتقانباەۆ مەملەكەت باسشىسى نۇرسۇلتان ءابىشۇلى نازارباەۆتىڭ 26 ساۋىردە وتكەن قر پرەزيدەنتى سايلاۋىنداعى جەڭىسىمەن قۇتتىقتاپ، رەداكتسيامىزعا حات جولدادى.
اسا قۇرمەتتى نۇرسۇلتان ءابىشۇلى،
ءبىز ارقاشاندا وزىڭىزبەن بىرگەمىز!
رەسەي فەدەراتسياسى التاي رەسپۋبليكاسىندا، اسىرەسە، قوساعاش اۋدانىندا تۇراتىن 12 مىڭ قازاق اتىنان، وتكەن سايلاۋدا ايقىن ءارى سەنىمدى جەڭىسكە جەتكەن اسا قۇرمەتتى نۇرسۇلتان ءابىشۇلىنا قانداستارىنىڭ قۋانىشى مەن ىستىق ىقىلاستى قۇتتىقتاۋلارىن جەتكىزەمىن.
مەن وسى جولعى ساياسي ناۋقان كەزىندە قاسيەتتى قاراشاڭىراق-قازاقستاننىڭ شىعىسىندا، وسكەمەن قالاسىندا شەتەلدەن بارعان بايقاۋشىلاردىڭ قاتارىندا بولىپ، سايلاۋشىلاردىڭ بۇرىن-سوڭدى بولىپ كورمەگەن ايرىقشا بەلسەندىلىگىنە قايران قالدىم. سايلاۋدىڭ زاڭ اياسىندا ءادىل وتكەندىگىنە كوز جەتكىزىپ، جوعارى باعا بەرۋشىلەردىڭ قاتارىندامىن.
مەن ءۇشىن سايلاۋ كەزىندە باقىلاۋشى بولعانىمنىڭ ءوزى ۇلكەن قۋانىش. بىزدەرگە، شەتەل قازاقتارىنا سايلاۋ قۇقى بەرىلمەسە دە سىزگە ىشتەي ساتتىلىك تىلەپ وتىرعان جايىم بار. قازاق ەلىندەي پرەزيدەنتتى باسىم داۋىسپەن سايلاپ شىعۋدى باسقا مەملەكەتتەردەن كورۋ مۇمكىن ەمەس. مۇنداي بولۋدىڭ ءوزى ءسىزدىڭ ىسكەرلىگىڭىزدى اپ-انىق ايقىنداپ كورسەتە الادى.
بۇگىنگى كۇنى ءسىزدىڭ ارقاڭىزدا بۇكىل الەم اتامەكەنىمىزدى بەيبىتشىلىك پەن بىرلىكتىڭ مەكەنى دەپ ەسەپتەيدى جانە وسى بەيبىتشىلىك ۇستانىمداعى ساياساتتى كوپتەگەن مەملەكەتتەر ۇلگى تۇتادى.
ءبىز اتاجۇرتتان الىس جۇرسەك تە قازاقستان-اتامەكەنىمىز ارۋاقىتتا جۇرەگىمىزدىڭ تۇبىنەن ەرەكشە ورىن الادى. قازاقستان تاۋەلسىز ەل بولعاننان بەرى دامىپ، وركەندەپ، الەمگە تانىمال بولدى. ەگەمەندىك العالى اعايىن اراسىنا شەكارا شىمىلدىق بولىپ كەتتى دەمەسەك، قازىرگى كۇندە دە سىزدەرمەن ارامىز الىستاماعان. التايدىڭ ەڭ شىعىسىنداعى، ءشۇي قازاقتارىنىڭ مادەنيەت، ءبىلىم، سپورت سالالارىنىڭ دامۋىنا تاۋەلسىزدىكتەن كەيىن دە ءجىتى نازار اۋدارىلىپ وتىردى. وسىنداي قارىم-قاتىناستى ورناتىپ، ىنتىماقتاستىقتى نىعايتىپ وتىرۋىمىزدىڭ ءوزى ءسىزدىڭ شەتەلدەگى قانداستارىڭىزعا دەگەن ەرەكشە ىقىلاسىڭىز ەكەنىنە كوزىمىز جەتىپ وتىر.
قازاقستان مەملەكەتى ءسىزدىڭ كورەگەن باسشىلىعىڭىزبەن الداعى ۋاقىتتا دا تالاي بەلەستەردى باعىندىرىپ، ودان ءارى گۇلدەنۋىن تىلەيمىز!
سىزگە مىقتى دەنساۋلىق تىلەپ، ءوز قازاعىڭىزعا اتقارىپ وتىرعان ىسىڭىزگە ساتتىلىك ايتامىز.
ءبىز بارلىق قازاقستان حالقىنا ىنتىماق پەن بەرەكە تىلەيمىز. جەڭىس قۇتتى بولسىن!
رەسەي فەدەراتسياسى،
التاي رەسپۋبليكاسى قازاقتارى
قاۋىمداستىعىنىڭ توراعاسى،
قوساعاش اۋدانىنىڭ اكىمى اۋەلحان جازيتۇلى جاتقانباەۆ
baq.kz
پىكىر قالدىرۋ