Ä.Jatqanbaev, Qosağaş äkimi: Atajwrtımız – beybitşilik pen birliktiñ mekeni
RF Altay Respublikası Qosağaştağı qandastarımız atınan Qosağaş audanınıñ äkimi Äuelhan Jatqanbaev memleket basşısı Nwrswltan Äbişwlı Nazarbaevtıñ 26 säuirde ötken QR Prezidenti saylauındağı jeñisimen qwttıqtap, redakciyamızğa hat joldadı.
Asa qwrmetti Nwrswltan Äbişwlı,
biz ärqaşanda öziñizben birgemiz!
Resey Federaciyası Altay Respublikasında, äsirese, Qosağaş audanında twratın 12 mıñ qazaq atınan, ötken saylauda ayqın äri senimdi jeñiske jetken asa qwrmetti Nwrswltan Äbişwlına qandastarınıñ quanışı men ıstıq ıqılastı qwttıqtauların jetkizemin.
Men osı jolğı sayasi nauqan kezinde qasietti qaraşañıraq-Qazaqstannıñ Şığısında, Öskemen qalasında şetelden barğan bayqauşılardıñ qatarında bolıp, saylauşılardıñ bwrın-soñdı bolıp körmegen ayrıqşa belsendiligine qayran qaldım. Saylaudıñ zañ ayasında ädil ötkendigine köz jetkizip, joğarı bağa beruşilerdiñ qatarındamın.
Men üşin saylau kezinde baqılauşı bolğanımnıñ özi ülken quanış. Bizderge, şetel qazaqtarına saylau qwqı berilmese de Sizge iştey sättilik tilep otırğan jayım bar. Qazaq elindey Prezidentti basım dauıspen saylap şığudı basqa memleketterden köru mümkin emes. Mwnday boludıñ özi Sizdiñ iskerligiñizdi ap-anıq ayqındap körsete aladı.
Bügingi küni Sizdiñ arqañızda bükil älem Atamekenimizdi beybitşilik pen birliktiñ mekeni dep esepteydi jäne osı beybitşilik wstanımdağı sayasattı köptegen memleketter ülgi twtadı.
Biz atajwrttan alıs jürsek te Qazaqstan-Atamekenimiz äruaqıtta jüregimizdiñ tübinen erekşe orın aladı. Qazaqstan täuelsiz el bolğannan beri damıp, örkendep, älemge tanımal boldı. Egemendik alğalı ağayın arasına şekara şımıldıq bolıp ketti demesek, qazirgi künde de sizdermen aramız alıstamağan. Altaydıñ eñ şığısındağı, Şüy qazaqtarınıñ mädeniet, bilim, sport salalarınıñ damuına täuelsizdikten keyin de jiti nazar audarılıp otırdı. Osınday qarım-qatınastı ornatıp, ıntımaqtastıqtı nığaytıp otıruımızdıñ özi Sizdiñ şeteldegi qandastarıñızğa degen erekşe ıqılasıñız ekenine közimiz jetip otır.
Qazaqstan memleketi Sizdiñ köregen basşılığıñızben aldağı uaqıtta da talay belesterdi bağındırıp, odan äri güldenuin tileymiz!
Sizge mıqtı densaulıq tilep, öz qazağıñızğa atqarıp otırğan isiñizge sättilik aytamız.
Biz barlıq Qazaqstan halqına ıntımaq pen bereke tileymiz. Jeñis qwttı bolsın!
Resey Federaciyası,
Altay Respublikası qazaqtarı
qauımdastığınıñ törağası,
Qosağaş audanınıñ äkimi Äuelhan Jazitwlı Jatqanbaev
baq.kz
Pikir qaldıru