قازاقستان ءىىد اكىمشىلىك يۋۆەنالدى پوليتسيا كوميتەتى ءبولىمىنىڭ باسشىسى اسەت وسپانوۆ قوعامدا كەڭىنەن تالقىلانىپ جۇرگەن پەدوفيلدەردى حيميالىق ءپىشتىرۋ ماسەلەسى ۇكىمەت دەڭگەيىندە قاراستىرىلىپ جاتقانىن مالىمدەدى.

بۇل تۋرالى وسپانوۆ ورتالىق كوممۋنيكاتسيا قىزمەتىنىڭ بريفينگىسىندە ايتتى دەپ حابارلادى 24.kz.

وسپانوۆتىڭ ايتۋىنشا، قىلمىستىق كودەكستىڭ جاڭا رەداكتسياسىندا كامەلەتكە تولماعاندارعا قاتىستى قىلمىسقا بارعانداردىڭ جازاسى قاتايتىلدى. 2010 جىلعى تۇزەتۋلەردەن كەيىن كامەلەتكە تولماعانداردى زورلاعانى ءۇشىن ازاماتقا ەڭ كوبى 10 جىل ەمەس، 15 جىل قاماۋعا الۋ جازاسى تاعايىندالاتىن بولدى. ال 14 جاسقا جەتپەگەندەردى زورلاعانى ءۇشىن قىلمىسكەر 20 جىلعا دەيىن تەمىر تورعا توعىتىلادى.

“انا مەن بالانى قورعاۋعا قاتىستى ەلباسىنىڭ تاپسىرماسى شەڭبەرىندە اعىمداعى جىلدىڭ قاڭتارىنان كۇشىنە ەنگەن جاڭا قىلمىستىق كودەكستە دە كامەلەتكە تولماعاندارعا قاتىستى قىلمىس جاساعانداردىڭ جازاسى قاتايتىلدى. ال حيميالىق پىشتىرۋگە كەلەتىن بولساق، بۇل ماسەلە پارلامەنت دەڭگەيىندە قاراستىرىلىپ جاتىر. ازىرگە بۇل ماسەلە تەك تالقىلاۋ دەڭگەيىندە”، – دەپ مالىمدەدى وسپانوۆ.

ال زاڭگەر سەرگەي ۋتكين بولسا، “استانا” ارناسىنا بەرگەن سۇحباتىندا ءالسىز قۇقىق قورعاۋ جۇيەسى ازىرگە قازاقستاندا پەدوفيلدەردى حيميالىق ءپىشتىرۋ جازاسىن ەنگىزۋگە مۇمكىندىك بەرمەيتىنىن ايتتى. دەگەنمەن، كونستيتۋتسيا مۇنداي زاڭدى قابىلداۋعا تىيىم سالمايدى.

ۋتكيننىڭ ايتۋىنشا، ەگەر پەدوفيلدەردى كۇشتەپ ءپىشتىرۋ جازاسى ەنگىزىلسە، تەرگەۋ ورگاندارى تاراپىنان “قاتەلىكتەر” ورىن الۋى عاجاپ ەمەس. پوليتسەيلەر قىلمىستىڭ اشىلۋ دەڭگەيىن كوتەرۋ ماقساتىمەن كىناسىز ادامدارعا جالا جابۋى مۇمكىن دەگەندى زاڭگەر جوققا شىعارمادى. ونىڭ ويىنشا، قازىرگى تەرگەۋ مەن سوتتىڭ دەڭگەيىندە زورلىققا بارعانداردى ءپىشتىرۋ جازاسىن ەنگىزۋ دۇرىس ەمەس.

“كونستيتۋتسيادا پەدوفيلدەردى پىشتىرۋگە بولمايدى دەگەن ەرەجە جوق. دەمەك، كونستيتۋتسيا قارسى شىقپايدى. ال وركەنيەتتى قوعام ءولىم جازاسىنا قاشاندا قارسى. سەبەبى، قاتەلىك كەتۋى عاجاپ ەمەس. سەبەبى، سوت پەن تەرگەۋ دەڭگەيىن ەسكەرە وتىرىپ، كىناسىز جاندى وسىنداي جازاعا كەسۋ دۇرىس پا دەگەن ساۋال تۋادى. ورىنسىز ايىپتالعان ادامدى ءولىم جازاسىنا كەسەتىن بولامىز. ال 5 جىلدان كەيىن مۇنىڭ ءبارى جازىقسىزعا كىنا ارتۋ بولىپ شىعادى. سوندا ورىنسىز ءومىرى قيىلعان ادامدى قايتا ءتىرىلتۋ مۇمكىن بولمايدى. ەڭ قورقىنىشتىسى دا وسى”، – دەيدى زاڭگەر.

ۋتكين زورلاۋ ورىن العان جاعدايدا ەكى تاراپتىڭ بىتىمگە كەلۋ ماسەلەسىنە دە ءوز پىكىرىن ايتتى. ونىڭ ويىنشا، قازاقستاندا بۇل، ءتىپتى اۋىر قىلمىس كەزىندە دە رۇقسات ەتىلۋى ءتيىس.

“تاراپتاردىڭ كەلىسىمگە كەلۋى – بۇل قالىپتى ينستۋيتۋت. جابىرلەنۋشى تاراپ تاتۋلاسقىسى كەلسە، ونداي مۇمكىندىكتەن ايىرۋدىڭ نە قاجەتى بار؟ مەنىڭ ويىمشا، ولاي ەتۋگە بولمايدى. ءتىپتى وسىنداي جاعدايدا كەلىسىمگە كەلۋ مۇمكىندىگى بولۋى قاجەت”، – دەپ سانايدى ۋتكين.