رەسەي تىلىندە سويلەگەن قاسىموۆتى شيپوۆسكيح قازاقشا سويلەتە المادى…
جارايسىڭ، دەپۋتات! جارامايسىڭ مينيستر!
جەزقازعانداعى كولىك جۇرگىزۋشىسى بەتىنە كىشى دارەتىن شاشىپ جىبەرگەن پوليتسەيگە قاتىستى ۇكىم قايتا قارالۋى مۇمكىن دەپ حابارلايدى كتك ارناسى.
5 جىلعا سوتتالعان تولەگەن يگىبەكوۆكە ىشكى ىستەر ءمينيسترىنىڭ ءوزى اراشا ءتۇستى. قالمۇحامبەت قاسىموۆ كەسىلگەن جازامەن كەلىسپەي، جوعارى سوتقا حات جازىپتى. ماجىلىسكە ەسەپ بەرۋگە كەلگەن مينيستردەن قاراماعىنداعى ساقشىنى قالايدا قورعاپ قالۋدى دەپۋتاتتار دا تالاپ ەتتى.
ادەتتە، ءار دۇيسەنبى ءماجىلىس مينيسترلەردى قابىلدايدى. كەزەك قالمۇحامبەت قاسىموۆقا كەلىپتى. ىشكى ىستەر ءمينيسترى ەسەپ بەرمەس بۇرىن پوليتسەيلەردىڭ جاڭا قۇرال-جابدىقتارىن كورسەتىپ، دەپۋتاتتاردىڭ كوڭىلىن اۋلاماق بولعان. ماجىلىسمەندەر كورمەگە اسا قىزىعا قويمادى. بىردەن مينيستردەن 5 جىلعا سوتتالعان جەزقازعاندىق پوليتسەيدىڭ تاعدىرىنا اراشا ءتۇسۋدى تالاپ ەتتى. قاسىموۆ تا قاراپ قالماپتى.
“ۇكىمگە قارسىلىق بىلدىردىك. جوعارى سوتقا حات جازدىم. پوليتسەي 5 جىلعا سوتتالدى. ال، ءتارتىپسىز جۇرگىزۋشى جازالانبادى. سوت ساراپتاماسى دا ونىڭ دەنەسى جاراقتانباعانىن دالەلدەپ بەردى”، – دەيدى ىشكى ىستەر ءمينيسترى قالمۇحامبەت قاسىموۆ.
وقيعا بىلتىر بولعان. تولەگەن يگىبەكوۆ كەزەكشىلىك كەزىندە ماس جۇرگىزۋشىنى توقتاتادى. ونىڭ سپيرتتىك ىشىمدىك ىشكەنىن دارىگەرلەر دە راستاعان. الايدا، مۇنى مويىنداماعان جۇرگىزۋشى كىشى دارەتىن ساقشىنىڭ بەتىنە شاشىپ جىبەرگەن. جاۋاپ رەتىندە پوليتسەيدىڭ جۇرگىزۋشىنى شاپالاقپەن تارتىپ جىبەرۋىن، سوت اۋىر قىلمىس دەپ، 5 جىلعا سوتتاپ جىبەرگەن. ماجىلىسمەندەر ەندى ماس ازاماتتىڭ دا جازالانۋىن تالاپ ەتۋدە. قازىر ونسىز دا بۇل سالادا ادام تۇراقتامايدى. جىلىنا 6 جارىم مىڭ پوليتسەي قىزمەتتىن تاستاپ كەتەدى ەكەن. ويتكەنى، جۇمىس اۋىر، جالاقى وتە تومەن.
“ەندى وسىنىڭ الدىن توقتاتپايتىن بولاتىن بولساق، حالقىمىز وسى ىشكى ىستەر قىزمەتكەرلەرىن اۋداننان قۋىپ شىعاتىن شىعار. وسىنى ءسىز تىكەلەي باقىلاۋىڭىزعا الا الاسىز با؟”، – دەدى ماجىلىس دەپۋتاتى ومارحان وكسىكباەۆ.
جاسوسپىرىمدەر اراسىنداعى قىلمىستىڭ ستاتيستيكاسىنان دا ادام شوشيدى. كامەلەتتىك جاسقا تولماعان 100 مىڭنان استام بالا ىشكى ىستەر مينيسترىلىگىنىڭ باقىلاۋىندا تۇر. جاسوسپىرىمدەردىڭ قولىنان بىلتىر 23 ازامات ءولىم قۇشقان. بۇعان جۇزدەگەن ۇرلىق-قارلىق، ۇرىپ-سوعۋدى قوسىڭىز.
“سوڭعى 8 جىلدىڭ كولەمىندە رەسپۋبليكا بويىنشا ۋاقىتشا وقشاۋلاۋ ورتالىعى، بەيىمدەلۋ مەكەمەلەرىنە 70 مىڭنان استام كامەلەتتىك جاسقا تولماعان جاسوسپىرىمدەر جەتكىزىلدى. سىزگە سۇراعىم، وسى كورسەتكىشتەردى ازايتۋ ءۇشىن قازىرگى كەزدە ناقتى قانداي ءىس-شارالار قولدانىپ جاتىرسىزدار؟”، – دەدى ماجىلىس دەپۋتاتى گەننادي شيپوۆسكيح.
بۇل ەڭ جاس ماجىلىسمەننىڭ العاش رەت دەپۋتات رەتىندە ءسوز الۋى. الايدا، قازاقشا سۇراق قويعان شيپوۆسكيحكە قاسىموۆ مەملەكەتتىك تىلىندە جاۋاپ بەرۋگە جارامادى.
“سۇراققا راحمەت! رۇقسات بولسا، مەن ورىسشا جاۋاپ بەرەيىن. يا سكازال، چتو نام نادو زانيماتسيا. كاكيە شكولى نام نادو رەشات. ۆسەگو ۋ ناس 8 ۋچەبنىح زاۆەدەني ي ۆسەگو ودنا سپەتسشكولا دليا تەح، كتو سوۆەرشيل پرەستۋپلەنيە”، – دەدى ىشكى ىستەر ءمينيسترى.
جاسوسپىرىمدەر اراسىنداعى قىلمىستىڭ ارتۋىنا بىردەن-ءبىر سەبەپ – مەكتەپ ينسپەكتورلارى جەتىسپەيدى ەكەن. وعان قوسا، ءتارتىبى قيىن بالالاردى وقىتاتىن ارنايى مەكەمە دە جوقتىڭ قاسى.
بۇدان بولەك، ماجىلىسمەندەر ىشكى ىستەر مينيسترىنەن جۇرت تۇندە كوڭىل كوتەرەتىن ورىنداردا قاتاڭ ءتارتىپ ورتانۋدى تالاپ ەتتى. باسقا قالانى ايتپاعاندا، استانادا جەڭىل ءجۇرىستى قىزدار مەن ناشاقورلار باس قوساتىن كافە، باردىڭ قاپتاپ كەتكەنى سونشالىق، لاس ۆەگاس جولدا قالادى دەيدى دەپۋتاتتار. سوندىقتان، ماجىلىسمەندەر تۇنگى 12-دەن كەيىن سپيرتتىك ىشىمدىكتى تۇتىنۋعا مۇلدەم تىيىم سالۋدى ۇسىندى.
دەرەك كوزى: كتك
پىكىر قالدىرۋ