Биылғы жылы ораза ұстаған отандық жұлдыздар
kerey.kz
Ауыз бекітіп, ораза ұстаудың рухани тұрғыдан да, денсаулық тұрғысынан да пайдасы зор. Осы орайда NUR.KZпорталы биылғы жылы ораза ұстаған отандық жұлдыздарды назарға ұсынады.
Сәкен Майғазиев
Алланы аузынан тастамайтын дінге берік отандық жұлдыздардың бірі – әнші Сәкен Майғазиев. Ол өз желі парақшасында ораза айын тағатсыз күтіп жүргенін байқатып, алтыншы маусымға қараған түні ауыз бекіткенін жазған.
“Ассалаумағалейкум, ағайын! Бүгін, яғни, маусым айының 5-нен 6-на қараған түні таң алдында ауыз бекітеміз. Рамазан – пенденің Жаратушысына жақындай түсетін уақыты. Осы мүмкіндікті әрбір мұсылман жіберіп алмауы керек. Шексіз мейірім иесі Алла тағала пенделігімізді, әлсіздігімізді кешіріп, отыз күн оразамызды қабыл еткей”, – деп жазған ораза басталардың алдында Сәкен Майғазиев.
Кенжебек Жанәбілов, Мейрамбек Бесбаев, Нұрлан Абдуллин, Абай Бегей сынды әншілеріміз де Меккеге барып, бес уақыт намаз оқитын, Рамазан айын асыға күтіп, ауыз бекітететін жандар.
Айнұр Тұрсынбаева
Айтыскер ақын Айнұр Тұрсынбаева да биыл ауыз бекіткен жұлдыздар қатарында.
“Осы постты жазамын деп жүргенiме 2-3 күн болды, әйтеуiр қолым босамай қойды… Кешеден берi басым сынып, телефонға қарауға шамам келмей қалды… Бүгiн жазбасам кеш болатынын бiлiп, қиналсам да жазайын деп отырмын… Достарым, қасиеттi Рамазан айы да келдi, бұйырса бүгiн түнде ауыз бекiтемiз… Жалпы басқаларға қарағанда менiң оқырмандарым өте иманды.. 80-90% оқырманым оразаны анық ұстайды… Бұл пост оразаны ұстауға дайын емеспiз деушiлерге, қиналып қалам деп қорқып отырғандарға арналады… Ең алдымен ораза ұстап өлiп қалған ешкiм жоқ, керiсiнше барлық ауру астан болады, ал кешке дейiн аш жүруге шыдамыңыз жетпесе, сiз өте әлсiз адамсыз”, – деп Рамазан айы алдында жазба жариялаған ақын ораза айының ғажайыптарын сөз етті.
“Менiң бiр танысым дәрiгерлер ешқашан балаң болмайды, ұрықтарың өлiп қалған деген едi, кейiн қызды болды… Себебiн сұрағанымда отыз күн оразада бiр күн демалмай дұға жасадым, ораза бiте салып әйелiм бала көтердi деген болатын… Кiмнiң жүрегi тыныш емес, кiмнiң жұмысы жүрмей жатыр, кiм қиналып жүр, кiмнiң отбасында береке болмай тұр? Бүгiнгi түннен қалмай ораза ұстасын! Еш дайындықтың керегi жоқ! Мен ораза ұстауға ниет еттiм, Алла барлық қиындықтан құтқар деп дұға жасаса болды! Бұл айдың қасиетiн мен сөзбен түсiндiре алмаймын… Әрбiр минутты пайдаланып қалыңыздар… Алла айтады, бәтеңкеге бау керек болса да менен сұра, мен барлық керегiңдi тауып беремiн, барлық дұғаңды қабыл етемiн дейдi, ал Рамазан айы барлық дұға қабыл болатын ай достарым… Ал, кiмдер оразаны асыға күтiп отыр екен, айта отырыңыздар?”, – дейді Айнұр Тұрсынбаева желі парақшасында.
Ғани мен Бота Жүнісовтер
ФОТО: YOUTUBE.COM
Ғани мен Бота Жүнісовтер де жылдағы әдеттері бойынша, ораза ұстап ауыз бекітуде деп хабарлады 31 арна. Қасиетті жұмада дұға-тілек жасау үшін мешітке келетін әдеттері бар.
Сиви Махмуди
Рамазан айында ораза ұстаған кезекті отандық жұлдыз – әнші Сиви Махмуди. Ол желі парақшасында ауыз бекіткенге дейін кірпік ілмейтінін жазған.
“Ауыз бекіткенше ұйқы жоқ”, – дейді Сиви желі парақшасында.
Ауызашар беріп, игі істер тындырып жүрген отандық жұлдыздар
Меруерт Түсіпбаева
ФОТО: MASSAGET.KZ
Еліміздің шоу-бизнес жұлдыздары арасында ауыз бекіткен-бекітпегенін ашық айтпаса да, ауызашар беріп, игі іс тындырып жүргендер баршылық. Солардың бірі – Меруерт Түсіпбаева. Бүгінде Грузияда демалып жүрген әнші жақында 83 жастағы әжесіне ауызашар берген екен.
“Шетелге жол жүрер алдында 83 жастағы (13 жастан ауызын бекiткен,11 бала туған) әженің ақ батасын алып, ауызашар бердiм”, – деп жазған Меруерт.
Маржан Арапбаева
Маржан Арапбаева ауызашарға махаббатпен дәмді тамақ пісіріп жүргенін жазған болатын. Алайда әнші соңғы кездері тұмауратып қалып, жөнді тамақ әзірлей алмай қалғанына күйінішін білдірген.
“Ауырғанды жек көремін. Төсек тартып жатқаныма үш күн болды. Түр быт-шыт, шаш быт-шыт, тырнағым да быт-шыт. Ал мен көшеге шыққым келеді. Дегенмен ертемен тұрып, жұмыстарыма кірісуге ниеттімін. Үйдегілердің “нормальный тамақ” жемей жүргендеріне екінші күн болды. Ауызашарға әжептәуір пысық болып, махаббатпен дәмді тамақ пісіріп жүр едім. Үйдегілер маған қарап, “ойпырмай көз тимесін” деп жүр еді… Сонда да көз тиіп кеткен сияқты ғой”, – деп жазған Маржан желі парақшасында.
Қарақат Әбілдина
Әнші Қарақат Әбілдина күйеуі Қыдырәлі Болмановпен бірге ислам дінін берік ұстанатындарын жасырмайды. Олар желі парақшасында балаларын да нағыз мұсылман етіп тәрбиелеп жүргендерін аңдатады. Мәселен, Қарақат ұлын кішкентайынан намазға үйреткенді жөн санап, ұлының екі жасында намазға жығылған фотосымен бөліскен болатын.
Қарақат осы жылы “Ораза бағдарламасына көшуге ниетті” екенін өз желі парақшасында жазған. Алайда әншінің бағдарлама дей отырып нені меңзегені, қарапайым салмақ тастау бағдарламасын ба, әлде Рамазан айында ораза ұстауды ма, ол жағы түсініксіздеу болып қалған.
“Қайырлы таң достар! Мен тағы да салмақ тастау бағдарламасын қолға алдым. Осыдан бір жыл бұрын, осы бағдарлама қызметін қолданып, нәтижесiне өте риза болғанмын, ендi концерттiң алдында тағы бiр курс алып, Ораза бағдарламасына біртіндеп көшуді жоспарлап отырмын”, – деп жазған әнші Рамазан айы басталар алдында.
Әбілдина ауыз бекітер мен ашардағы дұғаларды, уағыздарды желі парақшасына жүктеп, ұлдарымен мешітке жол тартқан сәтінен фотосымен бөліскен.
“Қоңыр қозым мен ақ қозымды ертiп, имандылық сабағына мешiтке бет алдық. Алла тағалам салиқалы ұрпақ сүюді нәсiп етсiн”, – деп жазған Қарақат фото астына.
Пікір қалдыру