«قازاقستان»، «Kazsport»، «حابار» تەلەارنالارى جازعى وليمپيادا ويىندارىن تىكەلەي ەفير ارقىلى كورسەتەدى
kerey.kz
قر اقپارات جانە كوممۋنيكاتسيا مينيسترلىگىنىڭ قولداۋىمەن «قازاقستان» رترك» اق، «حابار» اگەنتتىگى» اق ريو-دە-جانەيرودا وتەتىن XXXI جازعى وليمپيادا ويىندارىن ترانسلياتسيالاۋدىڭ ەكسكليۋزيۆتى قۇقىعىنا يە بولدى. وليمپيادا ەلىمىزدەگى «قازاقستان»، «Kazsport» جانە «حابار» تەلەارنالارى ارقىلى تاراتىلادى.
بۇگىن، 29-شى شىلدە كۇنى قر ورتالىق كوممۋنيكاتسيالار قىزمەتىندە XXXI جازعى وليمپيادا ويىندارىنىڭ ماتەريالدارىن اتالعان ءۇش ارنا ارقىلى تاراتۋ ماسەلەسىنە بايلانىستى ءباسپاسوز ءماسليحاتى ءوتتى.
ونىڭ بارىسىندا تەلەارنا وكىلدەرى Dentsu, Inc قۇقىقتارىنا يە كومپانيا قويىپ وتىرعان شارتتار مەن تالاپتار تۋرالى ايتىپ بەردى. اڭگىمە بارىسىندا وليمپيادا ويىندارىنىڭ حابارلارىن بارىنشا تازا ءارى كەدەرگىسىز تاراتۋ، تىكەلەي ەفير بارىسىندا تىيىم سالىناتىن جارناما-ماتەريالدار، ولاردى رۇقساتسىز تاراتۋدىڭ جاۋاپكەرشىلىكتەرى سياقتى وزگە دە كوپتەگەن ماسەلەلەر ءسوز بولدى.
بۇل ماسەلەلەر جونىندە «Kazsport» تەلەارناسىنىڭ باسشىسى پاۆەل تسىبۋلين مەن «حابار» تەلەارناسىنىڭ ديرەكتورى رينات كەرتاەۆ جاۋاپ بەردى.
«تاجىريبەلى جۋرناليستەر مەن سپورت شولۋشىلارى 31 شىلدە كۇنى ريوعا اتتانادى. ولار قازاقستاندىقتاردى وليمپيادانىڭ ەڭ باستى وقيعالارىنان حاباردار ەتىپ وتىرادى. تەلارنا ارقىلى وقيعا ورنىنان ەكسكليۋزيۆتى ماتەريالدار، ارنايى رەپورتاجدار مەن جارىستاردىڭ كۇندەلىكتەرى كورسەتىلەدى. ولاردىڭ بارلىعىن «قازاقستان» مەن «Kazsport» تەلەارنالارىنان جانە kaztrk.kz مەن kazsport.kz جاڭالىقتارىنان، سونداي-اق kaztrk.kz/kz/Rio-2016 ارنايى پاراقشاسىنان كورۋگە بولادى»،-دەدى «Kazsport» تەلەارناسىنىڭ ديرەكتورى پاۆەل تسىبۋلين.
بۇعان قوسا ونىڭ ايتۋىنشا، العاش رەت وليمپيادادان تىكەلەي ستۋديالىق باعدارلاما جاسالادى. وندا ەلىمىزدىڭ سپورتشىلارىمەن، جاتتىقتىرۋشىلارىمەن، قر مادەنيەت جانە سپورت مينيسترلىگى مەن قر ۇلتتىق وليمپيادا كوميتەتىنىڭ باسشىلارىمەن سۇحباتتار ۇيىمداستىرىلادى. ستۋديا وليمپيادا قۇراماسىنىڭ اقپارات ورتالىعى بازاسىندا ورنالاسادى. وليمپيادا اياقتالعان سوڭ «Kazsport» تەلەارناسى دەرەكتى فيلم دايىندايدى.
«Kazsport» تەلەارناسى وليمپيادا تسيكلدارىن رەسمي تۇردە Olympic Dream ارنايى جوباسىنىڭ نەگىزىندە 2015 جىلدىڭ قاراشا ايىنان باستاپ، قازاق تىلىندە 10, ورىس تىلىندە 10 حابار تاراتتى. جوبا اياسىندا وليمپيادا-2016 ويىندارىندا ونەر كورسەتەتىن قازاقستاندىق 104 سپورتشى تۋرالى اڭگىمە ءوربىدى. «قازاقستان» مەن «Kazsport» تەلەارناسىنان قازاقستاندىق سپورتشىلار تۋرالى 30 ارنايى پرومو-روليكتەر كورسەتىلىپ، سپورت تۇرلەرى بويىنشا 200-دەن استام ترانسلياتسيالار تاراتىلدى.
ايتا كەتەيىك، جازعى ويىنداردىڭ تاريحىندا وليمپيادا العاش رەت وڭتۇستىك امەريكادا وتكەلى وتىر. وعان 200-دەن استام مەملەكەتتەن 10,5 مىڭنان استام سپورتشى قاتىسادى دەپ كۇتىلۋدە. وليمپيادالىق ويىنداردىڭ اشىلۋ ءراسىمى «ماراكانا» ستاديونىندا وتەدى.
حالىقارالىق وليمپيادالىق كوميتەتتىڭ باعالاۋى بويىنشا، وليمپيادانىڭ اشىلۋ ءراسىمىن الەم بويىنشا 3,6 ميلليارد ادام تاماشالايدى.
پىكىر قالدىرۋ