«Qazaqstan», «Kazsport», «Habar» telearnaları jazğı Olimpiada oyındarın tikeley efir arqılı körsetedi
QR Aqparat jäne kommunikaciya ministrliginiñ qoldauımen «Qazaqstan» RTRK» AQ, «Habar» agenttigi» AQ Rio-de-Janeyroda ötetin XXXI jazğı Olimpiada oyındarın translyaciyalaudıñ eksklyuzivti qwqığına ie boldı. Olimpiada elimizdegi «Qazaqstan», «Kazsport» jäne «Habar» telearnaları arqılı taratıladı.
Bügin, 29-şı şilde küni QR Ortalıq kommunikaciyalar qızmetinde XXXI jazğı Olimpiada oyındarınıñ materialdarın atalğan üş arna arqılı taratu mäselesine baylanıstı baspasöz mäslihatı ötti.
Onıñ barısında telearna ökilderi Dentsu, Inc qwqıqtarına ie kompaniya qoyıp otırğan şarttar men talaptar turalı aytıp berdi. Äñgime barısında Olimpiada oyındarınıñ habarların barınşa taza äri kedergisiz taratu, tikeley efir barısında tıyım salınatın jarnama-materialdar, olardı rwqsatsız taratudıñ jauapkerşilikteri siyaqtı özge de köptegen mäseleler söz boldı.
Bwl mäseleler jöninde «Kazsport» telearnasınıñ basşısı Pavel Cıbulin men «Habar» telearnasınıñ direktorı Rinat Kertaev jauap berdi.
«Täjiribeli jurnalister men sport şoluşıları 31 şilde küni Rioğa attanadı. Olar qazaqstandıqtardı Olimpiadanıñ eñ bastı oqiğalarınan habardar etip otıradı. Telarna arqılı oqiğa ornınan eksklyuzivti materialdar, arnayı reportajdar men jarıstardıñ kündelikteri körsetiledi. Olardıñ barlığın «Qazaqstan» men «Kazsport» telearnalarınan jäne kaztrk.kz men kazsport.kz jañalıqtarınan, sonday-aq kaztrk.kz/kz/Rio-2016 arnayı paraqşasınan köruge boladı»,-dedi «Kazsport» telearnasınıñ direktorı Pavel Cıbulin.
Bwğan qosa onıñ aytuınşa, alğaş ret Olimpiadadan tikeley studiyalıq bağdarlama jasaladı. Onda elimizdiñ sportşılarımen, jattıqtıruşılarımen, QR Mädeniet jäne sport ministrligi men QR Wlttıq Olimpiada komitetiniñ basşılarımen swhbattar wyımdastırıladı. Studiya Olimpiada qwramasınıñ aqparat ortalığı bazasında ornalasadı. Olimpiada ayaqtalğan soñ «Kazsport» telearnası derekti fil'm dayındaydı.
«Kazsport» telearnası Olimpiada cikldarın resmi türde Olympic Dream arnayı jobasınıñ negizinde 2015 jıldıñ qaraşa ayınan bastap, qazaq tilinde 10, orıs tilinde 10 habar tarattı. Joba ayasında Olimpiada-2016 oyındarında öner körsetetin qazaqstandıq 104 sportşı turalı äñgime örbidi. «Qazaqstan» men «Kazsport» telearnasınan qazaqstandıq sportşılar turalı 30 arnayı promo-rolikter körsetilip, sport türleri boyınşa 200-den astam translyaciyalar taratıldı.
Ayta keteyik, jazğı oyındardıñ tarihında Olimpiada alğaş ret Oñtüstik Amerikada ötkeli otır. Oğan 200-den astam memleketten 10,5 mıñnan astam sportşı qatısadı dep kütilude. Olimpiadalıq oyındardıñ aşılu räsimi «Marakana» stadionında ötedi.
Halıqaralıq olimpiadalıq komitettiñ bağalauı boyınşa, Olimpiadanıñ aşılu räsimin älem boyınşa 3,6 milliard adam tamaşalaydı.
Pikir qaldıru