Boksşı Qanat Islam 22-kezdesuin Almatıda ötkizbek
Qazaqstandıq käsipqoy boksşı Qanat Islam 29 qazanda Almatıda ganalıq Patrik Alloteymen ringke şığadı.
32 jastağı Qanat Islam bwl jekpe-jekke jattıqtıruşısı Nel'son Lopespen birge Almatıdağı AIBA (Halıqaralıq äuesqoy boksfederaciyası) boks akademiyasında jattığadı. Boksşınıñ aytuınşa, oğan sparring qarsılas retinde qazaqstandıq Janqoş Twrarov pen 2013 jılğı älem çempionı, Rio olimpiadasınıñ qatısuşısı Jänibek Älimhanwlı kömektespek.
– Bwl kezdesuge eki aydan beri dayındalıp jatırmın. Qıtaydan da türli kompaniyalar wsınıs jasap, kezdesu ötkizgisi keldi. Biraq Aziyağa kelgen soñ Almatıda nege ötkizbeske dep oyladım. Olardıñ wsınısı köñilimnen şıqpadı. Allotey – mıqtı qarsılas. Onı alğaşqı raundtarda qwlatamın dep te uäde bere almaymın. Biraq jeñiske jetuge barımdı salamın, – deydi boksşı.
Qanat Islamnıñ qarsılası ganalıq 25 jastağı boksşı Patrik Allotey käsipqoy ringte 36 kezdesu ötkizip, 34 kezdesude jeñiske jetken, eki kezdesude jeñilgen. Al Qanat Islam käsipqoy ringte 21 kezdesu ötkizip, barlığında jeñiske jetken. Ol 19 jekpe-jekti uaqıtınan bwrın ayaqtağan.
Qazannıñ 29-ındağı kezdesude jeñiske jetken boksşı super orta salmaqta (69 kg – red) WBO (Älemdik boks wyımı) twjırımı boyınşa qwrlıqaralıq çempion jäne IBO (Halıqaralıq boks wyımı) twjırımı boyınşa halıqaralıq çempion atağın aladı. Al Qanat Islam WBA Fedelatin nwsqası boyınşa Amerika aymağı çempionı atağın qorğauı tiis.
– Qanat Islam qazir WBC (Älemdik boks keñesi) reytingisinde 5-orında twr. Eger Alloteydi jeñse reytingte üzdik üştikke enedi. Bwl reyting Qanat Islamğa kez kelgen uaqıtta älem çempionı atağın talasuına mümkindik beredi, – deydi Qanat Islamnıñ demeuşileriniñ biri Bauırjan Ospanov.
«QANATTI ÄLEM ÇEMPIONI ETKİM KELEDİ»
Qanat Islamnıñ promouteri äri jattıqtıruşısı amerikalıq Nel'son Lopes «Allotey Qanat Islamnıñ kar'erasındağı mıqtı qarsılas bolmaq» dep bağaladı.
– Qazaqstandıq boksşılarmen 15 jıldan beri jwmıs istep kele jatırmın. Al Qanat Islamdı jeti jıl jattıqtırıp jürmin. Maqsatım – Qanat Islamdı älem çempionı etip şığaru. Qazirgi bar oyımız Patrik Alloteymen ötetin kezdesude. Osı jekpe-jekte jeñiske jetsek alda älem çempionı atağına talasu üşin kelissözder jürgizemiz, – dedi ol Azattıq tilşisine.
Qanat Islam osığan deyin Azattıqqa bergen swhbattarında 21 kezdesudiñ barlığında aqı almağanın aytqan. Almatıda ötetin kezdesude ol alğaş ret jekpe-jek ötkizgeni üşin sıyaqı almaq.
– Gonarar boladı. Biraq qanşa bolatını, qalay bolatının promouterlerim qwpiya saqtap otır. Qazaqstanda käsipqoy bokstıñ deñgeyin kötergim keledi. Sondıqtan Almatıda jekpe-jek ötkizsem degen maqsat üşin köp jwmıs istedik, – deydi boksşı.
Qanat Islam bwl kezdesuden keyin jıl soñına deyin Amerika qwrlığında tağı bir jekpe-jek ötkizudi josparlap otır. Ol 2017 jılı «kem degende tört kezdesu ötkizsem» deydi.
Qanat Islam men Patrik Allotey arasındağı kezdesu 13 mıñ orındıq “Almatı Arena” sport keşeninde ötedi. Biletter qazan ayınan bastap satılımğa şıqpaq. Wyımdastıruşılardıñ aytuınşa, «bilet studentter de de, qarapayım halıq ta ala alatınday boladı».
Qanat Islam soñğı ret mamırdıñ 9-ında Florida ştatında kolumbiyalıq Huan de Anhel'men kezdesip, altınşı raundta jeñiske jetken.
Qıtayda tuğan Qanat Islam sol eldiñ atınan Pekin olimpiadasına qatısıp, qola medal' ielengen. Pekin olimpiadasınan keyin ol Qazaqstanğa qonıs audarğan. Qanat Islam 2012 jılğı London olimpiadasına Qazaqstan atınan qatıspaq bolğan kezde azamattıq-qwqıqtıq dau tuğan soñ käsipqoy boksqa bet bwrğan. Keyin Mayamige (AQŞ) barıp, Nel'son Lopestiñ proumouterlik kompaniyasımen kelisim-şart jasasqan. Qazir Qanat Islamnıñ barlıq kezdesuin osı kompaniya wyımdastırıp jür. Qazaqstanda qwrılğan «Astana» prezidenttik klubı Qanat Islamdı öz qwramına alıp, demeuşilik körsetpek bolğan. Biraq, boksşınıñ aytuınşa, eki tarap ortaq kelisimge kele almağan.
Azat Europa / Azattıq radiosı
Pikir qaldıru