دەمالىس كۇندەرى الماتى وبلىسى جامبىل اۋدانىنداعى مال بازارىنداعى ساۋدا-ساتتىقتان كەيىن ءۇش بىردەي اعايىندى ازاماتتىڭ ءىز-ءتۇزسىز جوعالۋى حالىقتى قاتتى الاڭداتتى. سول سەبەپتى بۇگىن ۇزىناعاشتا حالىق جينالىپ، جوعالعان ازاماتتاردىڭ دەرەگىن انىقتاۋدى تالاپ ەتكەن بولاتىن-دەپ حابارلايدى egemen.kz .
وكىنىشكە قاراي، جۇرت اماندىعىن جابىلىپ تىلەگەن ارىستاي جىگىتتەر كىسى قولىنان قازا تاپقانى انىق بولىپ وتىر.
قايعىلى حاباردى وبلىستىڭ ىشكى ىستەر دەپارتامەنتى راستادى. «الماتى وبلىسىنىڭ جامبىل اۋدانى اۋماعىنان ولتىرىلگەن ادامداردىڭ ءمايىتى تابىلدى. بۇل بۇعان دەيىن كوكسۋ اۋداندىق ىشكى ىستەر بولىمىنە كەلىپ تۇسكەن شاعىم بويىنشا ىزدەستىرىلىپ جاتقان ازاماتتاردىڭ مايىتتەرى ەكەنى انىقتالدى. قازىر قىلمىستىق ءىس قوزعالىپ، وقيعاعا قاتىسى بار دەگەن كۇدىكپەن جامبىل اۋدانىنىڭ ەكى تۇرعىنى تۇتقىندالدى. اۋدان اۋماعىندا وبلىستىق ىشكى ىستەر دەپارتامەنتى باسشىسىنىڭ ورىنباسارى ن. ءماسىموۆ باستاعان جەدەل ىزدەستىرۋ توبى جۇمىس جاساپ جاتىر»، – دەدى اتالعان دەپارتامەنتتىڭ ءباسپاسوز قىزمەتىندەگىلەر.
ءدال وسى ساتتەردە بىزدەر جامبىل اۋدانىنداعى قۇزىرلى مەكەمەلەردىڭ باسشىلارىنا حابارلاسا وتىرىپ، اقپاراتتىڭ راستىعىن انىقتاعان ەدىك.
«قازىرگى ۋاقىتتا وبلىستىق، اۋداندىق اكىمشىلىكتىڭ باسشىلارى، قۇزىرلى ورگانداردىڭ قىزمەتكەرلەرى ءبىر كىسىدەي جۇمىلىپ، وسى ماسەلەمەن اينالىسۋدا. ءتيىستى مەكەمەلەردەن بولەك، «نۇر وتان» پارتياسىنىڭ وبلىستىق، اۋداندىق جەتەكشىلەرى، ءماسليحات دەپۋتاتتارى دا ۇزىناعاشتاعى قىلمىستىق وقيعانىڭ تولىق اشىلۋىنا، جاۋىزداردىڭ ءتيىستى جازاسىن الۋىنا مۇددەلىلىك تانىتىپ وتىر. ءۇش بىردەي ازاماتىنان اسا قايعىلى جاعدايدا ايىرىلعان وتباسى مۇشەلەرىنە كوڭىل ايتىپ، سويلەسىپ، بارلىق امال-شارالاردىڭ قولدانىلاتىنىن جەتكىزدىك. ال ۇزىناعاشتا بۇل وقيعاعا الاڭداپ، تولقىعان حالىققا دا ءتۇسىندىرۋ جۇمىستارى جۇرگىزىلدى. كوپشىلىككە باسۋ ايتىلدى. وسى قايعىلى جاعدايدى پايدالانىپ، ەلدى ودان ءارى دۇرلىكتىرىپ، ۇرەي تۋعىزعىسى كەلەتىندەر دە بار. وزدەرى ازالى، اشۋلى وتباسىن دا ارانداتقىسى كەلىپ وتىرعاندار بار. وسىنى دا حالىققا جەتكىزدىك. قازىر ەل تارادى. ال قايعىلى وقيعاعا بايلانىستى قىلمىستىق ءىس قوزعالدى. كۇدىكتىلەرگە قاتىستى تەرگەۋ جۇمىستارى جۇرگىزىلىپ جاتىر. ءاربىر اقپاراتتى تەكسەرىپ، جاعدايدى تولىق باقىلاپ وتىرمىز، – دەدى اۋداندىق قۇقىق قورعاۋ ورگاندارىنىڭ جۇمىسىنا تىكەلەي جاۋاپتى، الماتى وبلىسى جامبىل اۋدانى اكىمىنىڭ ءبىرىنشى ورىنباسارى نۇرلان ەرتاسۇلى.
ەسكە سالا كەتەيىك، وتكەن جەكسەنبى كۇنى الماتى وبلىسى كوكسۋ اۋدانىنىڭ تۇرعىندارى – جارقىنبەك دولدانۇلى، مۇقيات زارلىحانۇلى جانە قادىلبەك ءالىمحان اتتى اعايىندى جىگىتتەر 2 كاماز كولىگىمەن الماتى وبلىسى جامبىل اۋدانى ۇزىناعاش اۋىلىنداعى مال بازارىنا مال ساتۋعا بارعان. سودان ءىزىم-قايىم جوعالعان ازاماتتاردىڭ ءمايىتى بۇگىن تابىلدى.
قالماحانبەت مۇقامەتقالي،
ايناش ەسالي.
egemen.kz
پىكىر قالدىرۋ