Президент әкiмшiлiгi жетекшiсiнiң бұрынғы орынбасары Бағлан Майлыбаевпен бiрге ұсталған осы мекемеде iшкi саясат бөлiмi меңгерушiсiнiң орынбасары болған Николай Галихин Ресейдiң мүддесiне жұмыс iстеген болуы мүмкiн. Олай деуiмiзге қылмыстық кодекстiң “Мемлекеттiк құпияларды заңсыз жинау, тарату және жариялау” бабымен айыпталған 53 жастағы Н.Галихиннiң әлеуметтiк желiдегi парақшаларының мазмұны түрткi болды. Бiрден айта кетейiк, Н.Галихин туралы мәлiметтер табу қиын-ақ болды. Елдегi iшкi саясаттың құлағын ұстаған адам көптiң көзiне түспеген, жариялылықтан аулақ жүрген. Журналистерге сұхбат беруден бойын аулақ салған.

БАҚ беттерiндегi азды-көптi хабарламалардан оның Ресейде өткен алқалы жиналыс, кездесулерден қалмағанын, тiптi пiкiр бiлдiргенiн анықтадық. Есесiне, ресейлiк әлеуметтiк желiлердегi парақшаларында Николай Галихин есiмдi азамат саяси көзқарастарын жасырмайды.
Мәселен, “Одноклассники” деп аталатын желiде Николай Галихин деп тiркелген адамның бет-әлпетi де, жасы да ұсталған iшкi саясат бөлiмi меңгерушiсiнiң орынбасарына келедi. Отбасылық суреттерiн жариялаудан бөлек бұл адам әлемде, әсiресе Украинада болып жатқан оқиғаларға қызығушылық бiлдiрiп отырған. Және ол көшiрiп басқан суреттер мен пiкiрлерге қарасаңыз, Н.Галихин дегенiңiз Ресейдiң Украинаға қарсы басқыншы саясатын, Сириядағы әрекетiн қос қолын көтерiп қолдайтын, Еуропаның босқындарды қабылдағанын мысқылдайтын нәсiлшiл адам екенiн анық байқайсыз. Кiлең Ресей мен оның мүддесi туралы суреттерден тұратын парақшасына қарап бұл адам Қазақстан емес, Ресейдiң азаматы дерсiз.
Әлеуметтiк парақшасы ДХР мен ЛХР секiлдi әлемдiк қауымдастық, оның iшiнде Қазақстан мойындамаған сепаратистiк құрылымдарға жеңiс тiлеген суреттерге толы. Қазақстан ресми түрде Украинадағы сепаратизмдi қолдамайтынын бiлдiрдi. Тiптi құқық қорғау органдарының бiрнеше адамды Украинаның оңтүстiк-шығысындағы қарулы қақтығыстарға қатысқаны үшiн соттағанын, сепаратистердi жақтап пiкiр бiлдiргендерi үшiн жауапқа тартқанын да бiлемiз. Ал президент әкiмшiлiгiндегi iшкi саясат бөлiмi меңгерушiсiнiң орынбасары қызметiнде жүрiп күнi кешеге дейiн ашықтан-ашық Қазақстанның саясатына қайшы, керек десеңiз Украина мен Қазақстанды арандататын материалдармен бөлiсiп келген! Сонда қарапайым интернет қолданушылардың аузын бағып отыратын ҰҚК мен өзге де органдар ай қарап жүрдi ме? Тұмсығының астындағы арандатушылық пен зымияндықты көрмеген арнайы қызмет орындарының құны көк тиын. Путиннiң саясатын сынағаны үшiн қарапайым ақтөбелiктi 3 жылға соттап жiбергендер мына бассыздыққа неге үндемей келдi? Украина президентiн шошқаға теңеген, ақыл-есi дұрыс емес адам ретiнде көрсеткен Н. Галихин сонда заң бұзбаған ба? Әлде билiкте отырғандарға заң талабы жүрмей ме? Ауыр айыппен қамаларынан аз уақыт бұрын Тәуелсiздiк мерейтойының қарсаңында Н.Галихиннiң “Құрмет” орденiмен марапатталуына қарағанда шынымен солай ма деп қаласыз.
Одан бөлек, әлеуметтiк желiлерде Николай Галихиннiң 30 жыл бұрынғы 1986 жылғы қанды оқиғаларда қазақ студенттерiн қудалауға белсендi қатысқаны туралы мәлiмет тарады. Ол ақпардың рас-өтiрiгiн алдағы уақытта анықтай жатармыз, әзiрге белгiлiсi бiрнеше адам ұсталған президент әкiмшiлiгiнiң бұрынғы қызметкерiн Желтоқсан оқиғасы үшiн туыстарын оқудан қудалағандардың бiрi ретiнде көрсетедi.
Н.Галихин туралы осындай деректерден кейiн, бұл адам Ресейдiң мүддесiне жұмыс iстеп келуi мүмкiн деген ой туады. Қамауға алынғандардың мемлекеттiк құпияны жинап-таратқаны рас болса, әсiрересейшiл тұлға мемлекеттiк құпиялармен көршiмiзбен бөлiспегенде кiмге беруi мүмкiн? Олай болса ықпал ету жағынан үкiметiңнен асып түсетiн президент әкiмшiлiгi Кремльдiң ықпалында деген сөз. Яғни, тәуелсiз ел президентiнiң iшкi және сыртқы саясатқа қатысты бүкiл ойы мен жоспарлары В.Путиннiң үстелiнiң суырмасында жатыр. Оның iшiнде президент Н.Назарбаевтың жеке басына қатысты құпиялар болса, былықтың көкесi басталды дей берiңiз. Н.Галихин жалғыз әрекет етуi мүмкiн емес. Мұндай iсте сыбайластар, тiлеулестер, оған қарыздарлар болады. Демек алда талай жасырын тыңшының әлеуметтiк желiсiне үңiлiп, жаңа қырларынан тануымыз мүмкiн. Әрине, оған дейiн бетперде кигендер жазған-сызғандарын тазалап тастамаса.

Әдiл ҰЗАҚБАЙ

zhasalash.kz