اپورتتىڭ جۇپار يىسى(اڭگىمە، بولعان وقيعانىڭ ىزىمەن)
kerey.kz
جۇمات انەسۇلى
الماتى قالاسى كۇنى قارساڭىنا وراي
وسىدان ەلۋ جىلداي بۇرىن بولعان وقيعا. 65-جىلدارى
قوستاناي وبلىسىنان باكىش دەگەن بالا الماتىعا وقۋعا تۇسۋگە
اتتانادى. پوەزعا ءمىنىپ، الماتى ۆوكزالىنان تۇسەدى. بالا
تاكسيگە وتىرىپ، باراتىن ادرەسىن ايتادى. تاكسيشى بالامەن
اناۋ اقسايعا دەيىن بارىپ، قازىرگى ءال فارابي كوشەسىمەن
زۋىلداتىپ كەلە جاتادى. ول كەزدە فارابي كوشەسىنىڭ ارعى بەتى
اقسايدان وسى كۇنگى دوستىق كوشەسىنە دەيىن «گورنىي گيگانت»
سوۆحوزىنىڭ الما باعى. بالانىڭ كوزى جول بويىندا سامساعان
قىزىل المالاردى كورىپ، اۋزىنان سىلەكەيى اعادى. بالا باكىش
تاكسيستكە :
– اعا اناۋ الما اعاشتارىنان ءبىر ەكى الما السام بولا ما ؟
ءتاسيشى ماشينەسىن توقتاتىپ،:
–بولادى- دەيدى. بالا سەكىرىپ بارىپ، اعاشتان ءبىر ەكى المانى
جۇلىپ الىپ تاكسيگە وتىرادى. ۇلكەن ەكى قىزىل الما بالانىڭ
ەكى الاقانىنا ارەڭ سيىپ تۇر. باكىش بالا سوعان تاڭ قالىپ :
–اعا، مىنا المالاردىڭ بىرەۋى ءبىر وبەدكە جاراعانداي عوي!-
دەيدى. تاكسيست ءوزىنىڭ قالتاسىنان بەرگەندەي قوپايىپ :
ء–يا، بۇل الماتىنىڭ اتاقتى اپورتى- دەيدى.
سونىمەن بۇلار بالانىڭ ىزدەگەن ادرەسىنە كەلەدى.. تاكسيشى
– جيىرما سوم تولەيسىڭ -دەيدى بالا وعان تاڭعالىپ:
–اعا، ءبىزدىڭ اۋىلدا ون سومعا قىرىق بولكە نان الىپ، قىرىق
كۇن كۇن كورەدى. ءسىز مەنەن جيىرما سوم الىپ، سەكسەن كۇن
كورگىڭىز كەلە مە! ءبىز ءبىر ساعات قانا جۇردىك قوي -دەپتى. تاكسيشى
بالانىڭ العىرلىعىنا ءتانتى بوپ،:
–جارايدى، ون سوم بەرسەڭ بولادى، بەنزين كوپ كەتتى- دەگەن
ەكەن.
سونىمەن نە كەرەك، باكىش بالا كاز پيگە دوكۋمەنت تاپسىرىپ،
سوڭىندا وتپەي قالادى. سوسىن باكىش اۋىلعا قۇر قول
قايتپايىن دەپ، بازارعا بارىپ ون شەلەك ساتىپ الىپ، باياعى
تاكسيست كورسەتكەن الما باعىنا كەلىپ، جايعاسىپ ءجۇرىپ، ون
شەلەك ىلعي قىپ قىزىل، ءىرى اپورت المالارىن جيناپ الادى.
"ەندى بولادى اۋ" دەي بەرگەندە بالانىڭ ۇستىنەن باقشانىڭ
كۇزەتشىسى شىعا كەلەدى
-ءيا، بالا، مۇنىڭ نە؟ بۇل سوۆحوزدىڭ باقشاسى عوي -دەيدى.
باكىش بالا ساسىپ قالىپ، انا كىسىگە:
–اعا ءبىزدىڭ اۋىلدا مۇنداي الما بولماعاسىن، شەشەمدى ءبىر
قۋانتايىن دەپ ەدىم…
–قاي جاقتانسىڭ؟
–قوستاناي جاقتان، ءبىزدىڭ اۋىلدا مۇنداي الما وسپەيدى.
-سولتۇستىكتە مۇنداي اپورت وسپەيدى عوي. جارايدى، ءبىراز
ەڭبەكتەنگەن ەكەنسىڭ، ءارى الىستان كەلگەن ەكەنسىڭ، ءبىر شەلەگىڭدى
تاستا دا، قالعانىن الىپ جۇرە بەر -دەپ كۇزەتشى رۇقسات بەرىپتى.
باكىش بالا سول قۋانعاننان ، جەلپىنىپ وتىرىپ، توعىز شەلەك
اپورتپەن اۋىلىنا جەتەدى.
باكىش بالا جولدان شارشاعاسىن ، ۇيدە ءبىراز تىنىعىپ،
جاتقان. «بالاڭ امان ساۋ الماتىدان كەلىپتى.، بازارلىق اكەلىپ
پە؟" دەپ سۇراپ جاتقان كورشى ايەلدەردىڭ داۋىستارىن ەمىس ەمىس
ەستىگەن. كەشكە قاراي الماتىنىڭ جاڭالىعىن ايتايىن دەپ،
باكىش قۇرداستارىنىڭ ءۇيىن ارالاۋدى باستاعان. ويىندا
ەشتەڭە جوق، باكىش ءبىر قۇرداسىنىڭ ۇيىنە كىرگەن بەتتە
اپورتتىڭ جۇپار ءيىسى مۇرنىنا بۇرق ەتە قالدى. "اپىراۋ،
بۇلاردا الماتىعا بارىپ كەلگەن بە؟" دەگەن وي كەلگەندە
قويعان باكىشكە. سوسىن سول ۇيدەگى قۇرداسىنا الماتىدا وقۋعا
تۇسپەي قالعانىن ايتىپ شىعىپ كەتتى. باكىش اياڭداپ وتىرىپ،
ەكىنشى كلاستاسىنىڭ ۇيىنە كىرگەن. باكىش "اپىراۋ، مۇندا دا
المانىڭ ءيىسى بۇرقىراپ تۇر عوي!" دەپ ىشتەي تاڭعالعان. .سودان
باكىش تاعى ءبىر كلاستاسىنىڭ ۇينە كىرسە، مۇندا دا اپورتتىڭ
جۇپار ءيىسى اڭقىپ تۇر ەكەن. باكىش قۇرداسىنا الماتىدا كوپ
بولا الماعان مۇڭىن ايتىپ، ءبىرازدان سوڭ، ۇيىنە قايتىپ كەلدى..
كەشكى ءشاي ۇستىندە باكىش شەشەسىنەن :
-اپا ، اۋىلداعىلاردىڭ ءبارى الماتىعا بارىپ كەلگەن بە ؟،
ءبارىنىڭ ۇيندە اپورتتىڭ جۇپار ءيىسى اڭقىپ تۇر -دەيدى. شەشەسى
كۇلىپ،:
–بالام اۋ، مانا سەن ۇيىقتاپ جاتقاندا وسى اۋىلدىڭ
ايەلدەرى كەلىپ:
–بالاڭ الماتىدان كەلىپتى ، قۇتتى بولسىن!" دەپ جانىمدى
شىر پىر قىلعان جوق پا! سوسىن بارلىعىنادا سەن اكەلگەن
المالاردى تاراتىپ بەرگەنمىن! -دەگەندە، باكىش بالا سوعان
شىن جۇرەگىمەن قۋاندى.
–دۇرىس ىستەگەنسىڭ، اپا! جاڭا عانا كلاستاستارىمنىڭ ۇيلەرىنە
كىرىپ شىقسام ، ءبارىنىڭ ۇيىنەن اپورتتىڭ جۇپار ءيىسى اڭقىپ
تۇردى- دەگەن الماتىدان وقۋعا تۇسە الماي كەلگەن باكىش بالا.
جۇمات انەسۇلى، اقىن، جازۋشى، ارداگەر
جۋرناليست
پىكىر قالدىرۋ