قازاق حاندىعى قۇرىلعاندىعىنىڭ 550 جىلدىعى – ەلىمىز تاريحىنداعى ەلەۋلى جىل. ەلدىگىمىز بەن تاۋەلسىزدىگىمىزدى تانىتاتىن اتاۋلى مەرەكەنى اتاپ ءوتۋ ءۇشىن ءداستۇرلى ءانشى اراي اسقاپتىڭ ۇيىمداستىرۋىمەن قوياندى اۋىلىندا وتكەن كەشتە كومەيىنە بۇلبۇل ۇيالاعان ونەر مايتالماندارىنىڭ ونەرىنە كۋا بولدىق. تاعىلىمدى تاريحىمىزدى تانىتاتىن ۇلى مەرەكەنى ۇلىقتاۋعا رەسپۋبليكالىق جانە حالىقارالىق بايقاۋلاردىڭ جۇلدەگەرى، ءداستۇرلى انشىلەر ەرلان رىسقالي، پەريزات تۇراروۆا، اراي اسقاپ، ايگەرىم نارتۇيەەۆا، نۇربولات ءابىلحان، باقىتنۇر ابىلەزۇلى جانە كومپوزيتور، ءانشى حالىق ريزابەك، قاينار قاتباي، سونداي-اق، كۇيشى، سىبىزعىشىلار كەلىپ قاتىستى.

ءداستۇرلى ءان ونەرىن ناسيحاتتاۋشىلاردىڭ بۇل جولى اۋىلدا ونەر كورسەتۋىنىڭ مانىنە توقتالعان ۇيىمداستىرۋشى اراي اسقاپ بىلاي دەيدى:
«قازاق حاندىعىنىڭ 550 جىلدىق مەرەيتويى بۇكىل رەسپۋبليكا كولەمىندە عانا ەمەس، شەتەلدەگى قازاقتار اراسىندا دا ءوز دەڭگەيىندە تويلانىپ جاتىر. ەلدىگىمىز بەن تامىرى تەرەڭ تاريحىمىزدى تانىتا تۇسەتىن وسىنداي اتاۋلى مەرەكە كەزىندە ءبىز – ءداستۇرلى انشىلەر دە قۇر قاراپ قالماۋدى ءجون كوردىك. بارشا الاشتىڭ تويىن اركىم ءوزىنىڭ قولىنان كەلگەنىنشە اتاپ وتكەنى دۇرىس دەپ سانايمىن. اسىرەسە وسى ۇلى تويدىڭ رۋحىن اۋىلداعى اعايىندارعا جەتكىزۋ ءۇشىن ۇلكەن شاھارلارعا شابىلماي-اق، ەلوردا ماڭىنداعى اۋىلداردا ونەر كورسەتىپ جاتىرمىز. قوياندى اۋىلىنان باستاۋ العان ونەر كەشىن الداعى ۋاقىتتا جاقىن ماڭداعى اۋىلداردىڭ بارلىعىندا وتكىزسەك دەگەن جوسپارىمىز بار. ەلىمىزدە تەك قانا مەرەكە بولسىن! تاۋەلسىزدىكتىڭ تۇعىرى بەرىك بولىپ، قازاق ەلى ماڭگى جاساي بەرسىن!».

توپەپ تۇرعان نوسەرگە قاراماستان كەلىپ ونەر تاماشالاعان قاۋىمنىڭ باسىم بولىگى قاريالار مەن مەكتەپ وقۋشىلارى ەكەنىن بايقادىق. تالانتتىلاردىڭ تاڭدايىنان توگىلگەن اسەم انگە ءتانتى بولعان جۇرت ءار انشىگە كوپكە دەيىن قول شاپالاقتاپ، قۇرمەتتەرىن ءبىلدىرىپ جاتتى.

مەرەكەلىك كەشتىڭ وتۋىنە قولداۋ كورسەتكەن قوياندى اۋىلى ورتا مەكتەبىنىڭ ديرەكتورى، جازۋشى ءجادي شاكەنۇلى اۋىلدى اينالىپ وتپەي، ات توبەلىندەي از قازاقتىڭ الدىندا ۇلكەن ونەر كورسەتكەن انشىلەرگە راحمەت ايتىپ، ماراپاتتاۋ مەن قوسا ەستەلىك سىيلىقتارىن تارتۋ ەتتى. كەش سوڭىندا اۋىلدىڭ اقساقالى اق باتاسىن بەرىپ، اقسامايلى انالار اقجارما شاشۋىن شاشتى.

مايگۇل سۇلتان،
فوتو – عابيت ماداليەۆ

baq.kz