شىندىق ىزدەۋشىلەر ءوز حاتتارىندا ءبىراز شىندىقتىڭ بەتىن اشقانىن ايتا كەلە، «قازاقستان اۋماعىندا وسى جىلدىڭ 10 مامىرىنان باستاپ 134 مىڭ  كيىك قىرىلدى دەگەن رەسمي اقپارات تاراتىلعان ەدى، الايدا قىرىلعان كيىكتەردىڭ ناقتى سانى  150 مىڭنان اسادى. قر ينۆەستيتسيالار جانە دامۋ مينيسترلىگىنىڭ اەروعارىش كوميتەتىجانە وعان قاراستى «عارىش-ەكولوگيا» مەكەمەسى باسشىلارى  قوستاناي جانە اقتوبە وبلىستارىنا پروتون زىمىرانىنىڭ بولشەكتەرى قۇلامايدى دەپ مالىمدەگەن بولاتىن، شىندىعىندا، سوڭعى بەس جىلدا قوستاناي وبلىسىنىڭ امانگەلدى، جانگەلدين اۋداندارىنىڭ، اقتوبە وبلىسىنىڭ ىرعىز اۋدانىنىڭ اۋماعىنا پروتون زىمىرانىنىڭ بولىكتەرى ۇدايى قۇلايتىنى دالەلدەندى» دەپ جازعان.

سونىمەن بىرگە ەكسپەديتسيا مۇشەلەرى كيىكتەردىڭ، جابايى اڭدار مەن ءتورت تۇلىك مالدىڭ جاپپاي قىرىلىپ جاتقانىنا گەپتيلدىڭ اسەرى بار ەكەنىنە سەنىمدى ەكەندەرىن جەتكىزدى.

حات سوڭىندا بەلسەندىلەر پرەزيدەنتكە، ۇكىمەت جانە پارلامەنت باسشىلارىنا سەگىز تالاپ قويدى. ولاردىڭ قاتارىندا «بايقوڭىر» عارىش ايلاعىنان پروتون زىمىرانىن ۇشىرۋدى تەز ارادا مۇلدە توقتاتۋ، قازاقستان اۋماعىنداعى بارلىق اسكەري-جاتتىعۋ پوليگوندارىن جابۋ، وسىعان دەيىن پروتون زىمىرانىنىڭ بولشەكتەرى قۇلاعان، اسكەري سىناق جۇرگىزىلگەن  ايماقتارداعى تۇرعىنداردىڭ دەنساۋلىعىنا تولىقتاي تەكسەرۋ جۇرگىز جانە زارداپ شەككەندەرگە وتەماقى تاعايىنداۋ، پروتون زىمىرانىنىڭ ۇشىرىلۋىنان، اسكەري قارۋلار سىناۋدان قورشاعان ورتاعا كەلگەن زيان كولەمىن تولىقتاي انىقتاۋ تاعى باسقا ماسەلەلەر قامتىلعان.

ۇيىم جەتەكشىلەرى ءسوز سوڭىندا 2013-جىلدىڭ 2-شىلدەسىندە «بايقوڭىر» عارىش ايلاعىندا  پروتون زىمىرانىنىڭ قۇلاۋىنان بولعان زارداپتار ءۇشىن وتەماقى رەتىندە رەسەي فەدەراتسياسى تولەۋگە مىندەتتەلگەن 90 ملن. دوللاردى تەز ارادا الىپ، كيىكتىڭ، مالدىڭ جاپپاي قىرالۋ سەبەبىن انىقتاۋ مەن  زارداپ شەككەندەرگە وتەماقى رەتىندە بەرۋدى ۇسىندى.

«150 مىڭ كيىكتىڭ، جۇزدەگەن مالدىڭ، اڭدار مەن قۇستاردىڭ جاپپاي قىرىلعانى ءۇشىن ناقتى لاۋازىم يەلەرىن جاۋاپقا تارتۋدى، ونىڭ ىشىندە ەلىمىزدەگى ەكولوگيا مەن قورشاعان ورتانى قورعاۋعا تىكەلەي جاۋاپتى قر ەنەرگەتيكا ءمينيسترى ۆلاديمير شكولنيكتى، عارىش سالاسىنا تىكەلەي جاۋاپتى قر ينۆەستيتسيا جانە دامۋ ءمينيسترى اسەت يسەكەشەۆتى لاۋازىمدىق قىزمەتىنەن بوساتۋدى تالاپ ەتەمىز» دەدى ءوز سوزىندە «انتيگەپتيل» قوزعالىسىنىڭ جەتەكشىسى ماقسات ءىلياسۇلى.

«ءبىزدىڭ بيلىكتىڭ جازعان حاتقا، جولداعان حابارعا جاۋاپ بەرمەي قوياتىن دەرتى بار. وسى جولى دا ءبىزدىڭ حاتىمىزعا زاڭدامدا كورسەتىلگەن مەرزىمدە جاۋاپ بەرمەسە، بيلىك ورگاندارىن سوتقا بەرەمىز» دەدى ول.

Abai.kz