اسا قۇرمەتتى، اماندىق اتا! مەنىڭ اتى-ءجونىم نۇرتىلەۋ تۇرسىنعاليۇلى. مەن سىزگە بۇگىن ۇلكەن وتىنىشپەن حات جولداپ وتىرمىن.

مۇنداي حات جازۋ، ارينە، مەن ءۇشىن وتە اۋىر. دەسە دە، سىزدەن باسقا مۇڭىمدى شاعار ادامىم جوق. ءسىز وبلىسىمىزدىڭ باسشىسىسىز. ءسىزدىڭ دە مەن سەكىلدى نەمەرەلەرىڭىز بار شىعار. ولاردىڭ قالاۋىن ءاردايىم ورىندايتىن شىعارسىز. مەن ءوزىمدى ءسىزدىڭ نەمەرەڭىزبىن دەپ بىلەمىن. قارعا تامىرلى قازاقتىڭ ءبارى ءبىر-بىرىمەن تۋىس ەمەس پە؟

«ءار بالا باقىتتى بولۋ ءۇشىن جارالادى» دەيدى عوي ۇلكەندەر. «مەن باقىتسىزبىن» دەي المايمىن. «باقىتتىمىن» دەۋگە دە اۋزىم بارمايدى. ەل قاتارلى بولۋدى عانا ارماندايمىن. بۇل مەنىڭ عانا ەمەس، باۋىرلارىمنىڭ، اكە-شەشەمنىڭ، بارلىعى ون ادامنىڭ ءۇشبۋ حاتى دەپ قابىلداعايسىز.

الدىمەن ءسىزدى ءوزىمنىڭ وتباسىممەن تانىستىرايىن.

مىنە، مىناۋ مەنىڭ وتباسىم. الماتى وبلىسى، تالعار اۋدانى، كەڭدالا اۋىلىندا بىرەۋدىڭ قابىرعاسى كوگەرگەن، سىز ءۇيىن جالعا الىپ كۇنەلتىپ جاتىرمىز.

مىنا جىگىتتىڭ اتى – باقىتجان تۇرسىنعاليۇلى. توعىزىنشى سىنىپ وقۋشىسى. مەنىڭ ەڭ ۇلكەن اعام. بولاشاقتا ورازالى دوسبوسىنوۆ سەكىلدى ايتىسكەر اقىن بولۋدى ارماندايدى.

بۇل – ەكىنشى اعام. اتى – باۋىرجان تۇرسىنعاليۇلى. جەتىنشى سىنىپتا وقيدى. باۋىرجان مومىشۇلى سەكىلدى باتىر بولسىن دەپ، اكە-شەشەم اتىن باۋىرجان دەپ قويعان. ءۇش ايدان بەرى بوكس ۇيىرمەسىنە قاتىسىپ ءجۇر. جۋىردا ەسىك قالاسىندا وتكەن جارىستا ءۇشىنشى ورىن الدى. بولاشاقتا قانات ءىسلام سەكىلدى الەمدى مويىنداتقان بىلعارى قولعاپ شەبەرى اتانعىسى كەلەدى.

ءۇشىنشى اعام قايسار تۇرسىنعاليۇلى ءتورتىنشى سىنىپتىڭ وقۋشىسى. ءبىزدىڭ ۇيدەگى ساباقتى وتە جاقسى وقيتىن بالا – وسى قايسار. وقىمىستى. «ساباققا دايىندالاتىن كەڭ بولمەم بولسا عوي» دەپ قيالدايدى. ساباق ۇلگەرىمى – وتە جاقسى. «عالىم بولامىن» دەيدى.

كەيدە سۋرەتشى بولعىسى كەلىپ، مىنانداي سۋرەتتەر سالادى. مىناۋ «ءوز ءۇيىمىز بولسا عوي» دەگەن سۋرەتى.

ءتورتىنشى اعام ميراس تۇرسىنعاليۇلى «دارىگەر بولام» دەيدى. قازىر ەكىنشى سىنىپتا وقىپ ءجۇر. تۇرىپ جاتقان ءۇيىمىز سىز بولعاندىقتان ءجيى اۋىرامىز. اكە-شەشەم ونداي كەزدە ەمحانانىڭ تابالدىرىعىن توزدىرادى. ميراس سول ءۇشىن دە دارىگەر بولعىسى كەلەدى. كەيدە «دارىگەر بولىپ، بالالاردى ەمدەپ، كوپ اقشا تابامىن. سوسىن باي بولىپ، ءبىز سەكىلدى ءۇيى جوق ادامدارعا مىنانداي ءۇي سالىپ بەرەمىن» دەيدى.

بەسىنشى اعامنىڭ اتى – دامير تۇرسىنعاليۇلى. جاسى التىدا. ءالى مەكتەپكە بارعان جوق. قۇداي قالاسا، كەلەر وقۋ جىلىندا ءبىرىنشى سىنىپقا بارادى. ول مەنىڭشە، اسپاز بولادى. اناما قولقابىس جاساپ، ىلعي دا اس بولمەدە جۇرەدى. مىنە، ول تاعى دا ءبىزدىڭ اس بولمەدە ءجۇر.

التىنشى اعامنىڭ ەسىمى – دۋمان تۇرسىنعاليۇلى. جاسى بەستە. اعالارىمنىڭ ىشىندەگى ەڭ بۇزىعى وسى. مىنا ماشينەگە ءمىنىپ الىپ، بىزگە ءبىر تىنىم بەرمەيدى. ءتۇبى مىقتى شوپىر بولاتىن شىعار. ۇيىمىزدە وينايتىن جەر تار بولعاندىقتان كەيدە اياعىمدى، كەيدە قولىمدى باسىپ كەتىپ، مەنى جىلاتىپ قويادى.

جەتىنشى اعامنىڭ اتى دىنمۇحاممەد تۇرسىنعاليۇلى. «دىنمۇحاممەد قوناەۆ سەكىلدى ەل باسقارادى» دەيدى اكەم. كىم ءبىلسىن، ول كۇنگە دە جەتەرمىز.

ەندى مەن جايلى.

مەنى قويا تۇرالىق. اماندىق اتا، ءسىز الدىمەن مەنىڭ اكە-شەشەممەن تانىسىپ الىڭىز.

انام گۇلميرا سەگىز ۇلعا جارىق دۇنيە سىيلاعان – باتىر انا! قازاقتىڭ سانىن كوبەيتۋگە قوماقتى ۇلەس قوسقان «التىن القا» يەگەرى.

مىناۋ مەنىڭ اكەم – تۇرسىنعالي قاباقوۆ. ءبىزدى ەشكىمنەن كەم قىلماي ءوسىرىپ جاتقان – باتىر اكە.

اكەمنىڭ قولىندا وتىرعان – مەنمىن! اتىم – نۇرتىلەۋ. قۇداي بۇيىرتسا، نۇرتىلەۋ يمانعاليۇلى سەكىلدى مىقتى جۋرناليست بولامىن. بىراق، وعان دەيىن قايدا؟ قازىر جاسىم ءالى بىرگە تولعان جوق.

اماندىق اتا، ءسىز ءبىزدىڭ وتباسىمەن تولىق تانىستىڭىز. ءبىز ەشكىمگە الاقان جايمايتىن، الاقان جايۋدى نامىس دەپ بىلەتىن وتباسى ەدىك. اكەم مەن شەشەم ءوز كۇشىمەن ءۇي سالىپ الۋ ءۇشىن نەشە رەت تالعار اۋدانىنا بارىپ، جەر سۇرادى.

دالەل مىنە! ءبىز جەر كەزەگىندە 1036 ادام بولىپ تۇرمىز. بۇل كەزەكتىڭ جىلجيتىن ءتۇرى جوق.

جەر كەزەگى كەلمەگەن سوڭ، شەشەم كوپ بالالى انا رەتىندە جالعا بەرىلەتىن تۇرعىن ءۇي كەزەگىنە جازىلدى. ونى الۋدىڭ دا ۋاقىتى ءازىر كەلەتىن ءتۇرى بايقالمايدى.

ەندى مىنە، قابىرعاسى كوكەرگەن، ەدەنى سىز ءبىر ءۇيدى وتباسىمىزبەن جالعا الىپ كۇن كورىپ جاتىرمىز. بۇعان دەيىن ءبىز بىرنەشە پاتەردى جالداپ تۇردىق. كوشە-كوشە شارشادىق، اتا! ءبىز سەكىلدى كوپ بالاسى بار وتباسىعا ەشكىم ءۇيىن جالعا بەرگىسى كەلمەيدى. ايتپەسە، مىنا ۇيدە ءبىر كۇن تۇرماي كوشىپ كەتەر ەدىك.

اماندىق اتا! اقىر باستادىم، ءبارىن ايتايىن. ءبىزدىڭ وتباسىلىق بيۋدجەتىمىز 65 مىڭ تەڭگە. انام «التىن القاسى» ءۇشىن ايىنا 13 575 تەڭگە الادى. مەنىڭ ءبىر جاسقا دەيىنگى جورگەكپۇلىم 18 800 تەڭگە (بۇل جاقىندا توقتايدى). ءار ءۇش اي cايىن جاردەماقى رەتىندە 17 800 تەڭگەنى مەملەكەت بەرەدى.

اكەمنىڭ ايلىعى بۇرىن 49 مىڭ تەڭگە ەدى. قازىر داعدارىس دەپ جالاقىسى قىسقارىپ قالدى. قولىنا الاتىن اقشاسى – 35 مىڭ.

ەندى ءوزىڭىز ەسەپتەڭىزشى. وسى 65 مىڭنىڭ 15 مىڭى پاتەراقىعا، 5 مىڭى سۋ مەن جارىققا كەتەدى. سوندا، ون ادام 40 مىڭمەن ءومىر ءسۇرىپ جاتىرمىز دەگەن ءسوز.

قۇرمەتتى اماندىق اتا! مەنىڭ وسى حاتىمدى وقىساڭىز بىزگە كومەك كورسەتىڭىزشى. وتىنەمىن! ءسىزدى ىسكەر، قايىرىمدى باسشى دەپ بىلەمىن. نۇرتىلەۋ يمانعاليۇلى ايتپاقشى ءبىز دە «باي قۋاتتى بولايىق»!

سالەمنەن – مەن (سۋرەتتەگى) نۇرتىلەۋ تۇرسىنعاليۇلى!

Abai.kz