Asa qwrmetti, Amandıq ata! Meniñ atı-jönim Nwrtileu Twrsınğaliwlı. Men Sizge bügin ülken ötinişpen hat joldap otırmın.

Mwnday hat jazu, ärine, men üşin öte auır. Dese de, Sizden basqa mwñımdı şağar adamım joq. Siz oblısımızdıñ basşısısız. Sizdiñ de men sekildi nemereleriñiz bar şığar. Olardıñ qalauın ärdayım orındaytın şığarsız. Men özimdi Sizdiñ nemereñizbin dep bilemin. Qarğa tamırlı qazaqtıñ bäri bir-birimen tuıs emes pe?

«Är bala baqıttı bolu üşin jaraladı» deydi ğoy ülkender. «Men baqıtsızbın» dey almaymın. «Baqıttımın» deuge de auzım barmaydı. El qatarlı boludı ğana armandaymın. Bwl meniñ ğana emes, bauırlarımnıñ, äke-şeşemniñ, barlığı on adamnıñ üşbu hatı dep qabıldağaysız.

Aldımen Sizdi özimniñ otbasımmen tanıstırayın.

Mine, mınau meniñ otbasım. Almatı oblısı, Talğar audanı, Keñdala auılında bireudiñ qabırğası kögergen, sız üyin jalğa alıp küneltip jatırmız.

Mına jigittiñ atı – Baqıtjan Twrsınğaliwlı. Toğızınşı sınıp oquşısı. Meniñ eñ ülken ağam. Bolaşaqta Orazalı Dosbosınov sekildi aytısker aqın boludı armandaydı.

Bwl – ekinşi ağam. Atı – Bauırjan Twrsınğaliwlı. Jetinşi sınıpta oqidı. Bauırjan Momışwlı sekildi batır bolsın dep, äke-şeşem atın Bauırjan dep qoyğan. Üş aydan beri boks üyirmesine qatısıp jür. Juırda Esik qalasında ötken jarısta üşinşi orın aldı. Bolaşaqta Qanat İsläm sekildi älemdi moyındatqan bılğarı qolğap şeberi atanğısı keledi.

Üşinşi ağam Qaysar Twrsınğaliwlı törtinşi sınıptıñ oquşısı. Bizdiñ üydegi sabaqtı öte jaqsı oqitın bala – osı Qaysar. Oqımıstı. «Sabaqqa dayındalatın keñ bölmem bolsa ğoy» dep qiyaldaydı. Sabaq ülgerimi – öte jaqsı. «Ğalım bolamın» deydi.

Keyde suretşi bolğısı kelip, mınanday suretter saladı. Mınau «Öz üyimiz bolsa ğoy» degen sureti.

Törtinşi ağam Miras Twrsınğaliwlı «däriger bolam» deydi. Qazir ekinşi sınıpta oqıp jür. Twrıp jatqan üyimiz sız bolğandıqtan jii auıramız. Äke-şeşem onday kezde emhananıñ tabaldırığın tozdıradı. Miras sol üşin de däriger bolğısı keledi. Keyde «Däriger bolıp, balalardı emdep, köp aqşa tabamın. Sosın bay bolıp, biz sekildi üyi joq adamdarğa mınanday üy salıp beremin» deydi.

Besinşi ağamnıñ atı – Damir Twrsınğaliwlı. Jası altıda. Äli mektepke barğan joq. Qwday qalasa, keler oqu jılında birinşi sınıpqa baradı. Ol meniñşe, aspaz boladı. Anama qolqabıs jasap, ılği da as bölmede jüredi. Mine, ol tağı da bizdiñ as bölmede jür.

Altınşı ağamnıñ esimi – Duman Twrsınğaliwlı. Jası beste. Ağalarımnıñ işindegi eñ bwzığı osı. Mına mäşinege minip alıp, bizge bir tınım bermeydi. Tübi mıqtı şopır bolatın şığar. Üyimizde oynaytın jer tar bolğandıqtan keyde ayağımdı, keyde qolımdı basıp ketip, meni jılatıp qoyadı.

Jetinşi ağamnıñ atı Dinmwhammed Twrsınğaliwlı. «Dinmwhammed Qonaev sekildi el basqaradı» deydi äkem. Kim bilsin, ol künge de jetermiz.

Endi men jaylı.

Meni qoya twralıq. Amandıq ata, Siz aldımen meniñ äke-şeşemmen tanısıp alıñız.

Anam Gülmira segiz wlğa jarıq dünie sıylağan – batır ana! Qazaqtıñ sanın köbeytuge qomaqtı üles qosqan «Altın alqa» iegeri.

Mınau meniñ äkem – Twrsınğali Qabaqov. Bizdi eşkimnen kem qılmay ösirip jatqan – batır äke.

Äkemniñ qolında otırğan – menmin! Atım – Nwrtileu. Qwday bwyırtsa, Nwrtileu Imanğaliwlı sekildi mıqtı jurnalist bolamın. Biraq, oğan deyin qayda? Qazir jasım äli birge tolğan joq.

Amandıq ata, Siz bizdiñ otbasımen tolıq tanıstıñız. Biz eşkimge alaqan jaymaytın, alaqan jayudı namıs dep biletin otbası edik. Äkem men şeşem öz küşimen üy salıp alu üşin neşe ret Talğar audanına barıp, jer swradı.

Dälel mine! Biz jer kezeginde 1036 adam bolıp twrmız. Bwl kezektiñ jıljitın türi joq.

Jer kezegi kelmegen soñ, şeşem köp balalı ana retinde jalğa beriletin twrğın üy kezegine jazıldı. Onı aludıñ da uaqıtı äzir keletin türi bayqalmaydı.

Endi mine, qabırğası kökergen, edeni sız bir üydi otbasımızben jalğa alıp kün körip jatırmız. Bwğan deyin biz birneşe päterdi jaldap twrdıq. Köşe-köşe şarşadıq, ata! Biz sekildi köp balası bar otbasığa eşkim üyin jalğa bergisi kelmeydi. Äytpese, mına üyde bir kün twrmay köşip keter edik.

Amandıq ata! Aqır bastadım, bärin aytayın. Bizdiñ otbasılıq byudjetimiz 65 mıñ teñge. Anam «Altın alqası» üşin ayına 13 575 teñge aladı. Meniñ bir jasqa deyingi jörgekpwlım 18 800 teñge (bwl jaqında toqtaydı). Är üş ay cayın järdemaqı retinde 17 800 teñgeni memleket beredi.

Äkemniñ aylığı bwrın 49 mıñ teñge edi. Qazir dağdarıs dep jalaqısı qısqarıp qaldı. Qolına alatın aqşası – 35 mıñ.

Endi öziñiz esepteñizşi. Osı 65 mıñnıñ 15 mıñı päteraqığa, 5 mıñı su men jarıqqa ketedi. Sonda, on adam 40 mıñmen ömir sürip jatırmız degen söz.

Qwrmetti Amandıq ata! Meniñ osı hatımdı oqısañız bizge kömek körsetiñizşi. Ötinemin! Sizdi isker, qayırımdı basşı dep bilemin. Nwrtileu Imanğaliwlı aytpaqşı biz de «bay quattı bolayıq»!

Sälemnen – men (surettegi) Nwrtileu Twrsınğaliwlı!

Abai.kz