ۇشقان قۇسقا جەتكىزبەس قايران ۋاقىت.
باۋىر باسقان ىنىلەرىمنىڭ ءبىرى تالاسبەك ەدى. سول تالاسبەك وتان الدىنداعى بورىشىن وتەپ ءجۇرىپ، جەردىڭ ءتۇبى  مۋرمانسكدەن 1976 جىلى حات جازدى.

تالاسبەك:

اماندىق حات

امانسىزدارما جارقىن اعا، جەڭگەي، تاعى باسقالار؟

حالدارىڭىز جاقسى، دەندەرىڭىز ساۋ ما؟

ال مەنەن حال جاي بىلمەك بولساڭىزدار حالىم جاقسى، دەنىم ساۋ، بىرقالىپتى ءجۇرىپ جاتىرمىن. جازعان حاتىڭىزدى الدىم. قۋانىپ قالدىم. پلاستينكام تۋرالى جانە تەلەۆيزورداعى حابار تۋرالى جازىپسىز.

      راحمەت جاكە! وسىنىڭ ءبارى ءسىزدىڭ ەڭبەگىڭىز عوي جاكە. ءسىز بولماساڭىز مەن كىمگە كەرەكپىن. حالىقتىڭ الدىنا دا شىعارعان ءسىز عوي، جاكە!

«ەر موينىندا قىل ارقان شىرىمەيدى» – دەگەن ماقال بار عوي. مەن دە كەيىن ءسىزدىڭ ءبىر كەرەگىڭىزگە جارارمىن!

تالاسبەك اسەمقۇلوۆ. مۋرمانسك. 1976 جىل. 03.01.76

ءيا، ول كەزدە مەن جاتپاي-تۇرماي، قاجىماي-تالماي ءجۇرىپ تالاسبەك باۋىرىمنىڭ بايجىگىت كۇيلەرىن ورىنداعان كۇيتاباق-پلاستينكاسىنىڭ شىعۋىنا سەبەپكەر بولىپ، رەداكتورى بولىپ جارىققا شىعاردىم.  ول كەزدە تالاسبەك 19 جاستا، ال مەن  27 جاستامىن. ەندى مىنە ارادا شامامەن 40 جىل وتكەندە كەلىن بالامىز زيرا ناۋرىزباەۆا ءشۇيىنشى حابار جەتكىزدى. تالاسبەكتىڭ جازعان سول حاتىندا پلاستينكاسى جايلى ايتىلاعنداي  دال 40 جىلداي ۋاقىت وتكەندە 2016 جىلى تالاسبەكتىڭ 73 كۇي ورىنداعان البومى جارىق كوردى.  جارىق كورگەندە  قىتاي ەلىندە، قۇلجا قالاسىندا «ءتالتۇس» اتالعان سد-البوم.

كۇنى كەشە 2016 جىلدىڭ 1 ءساۋىرى كۇنى ىقىلاس اتىنداعى حالىق اسپاپتار مۇراجايىندا تالاسبەك  باۋىرىمنىڭ  وزى جاساعان دومبىراسى مۋزەيگە تابىستالىپ بۇل دا ءبىر  دۇرىلدەپ وتكەن توي بولدى. مۋزەيدىڭ ەكسپوزيتسيا سورەسىنە قويۋ مۇمكىندىگى ەل سەرىسى، ءانشى ءارى اكتەر ەرلان تولەۋتايعا بۇيىردى.

ءبىر عاجابى ءدال سورەگە قويىلار ساتتە كونە اسپاپتار مۇراجايى ىشىندە ءبىر تىلسىم كۇش، ەرەكشە كورىنىس، اسەر پايدا بولدى. بۇل تالاسبەكتىڭ رۋحى ەدى. قۇلاق ۇنسىزدىگىن عارىشتان جەتكەن گۋىل اسەرىندەي، ءتىپتى ەرلاننىڭ قولىنداعى تالاسبەكتىڭ دومبىراسى «مەن دە ماڭگىلىك وسى جەردە قونىس تەبەمىن» دەگەندەي سان ءتۇرلى ەلەسكە اينالعانداي، كوزىمىز بۇلدىراپ كەتكەندەي بولدى. ءبارىمىز دە تالاسبەك رۋحىنىڭ كەرەمەتى-اي دەستىك. سول ساتتە اينالايىن تالاسبەككە اللا الدىڭنان جارىلقاسىن، جانىڭ جانناتتا بولسىن. جۇماقتان ورىن ال دەپ ەرنىمىز كۇبىرلەدى، تىلەۋ تىلەدىك. تالاسبەكتىڭ سۇيگەن جارى زيرا ناۋرىزباەۆاعا جانە سول ساتتە بىرگە بولعان ۇل-قىزىنا ۇزاق عۇمىر، ءسات ساپار تىلەدىك. ارينە وسى كەشتى ۇيىمداستىرعان مۋزەي ديرەكتورى ۇلجان بايبوسىنوۆاعا العىسىمىز شەكسىز.

جارقىن شاكارىم | اۆتورلىق سايت