Чунциндегі кездесу
kerey.kz
Тарихи сурет
Уақыты: 28 тамыз 1945 ж.;
Орыны: Чунцин (重慶) қ-сы;
Түсініктеме: Тарихи суретте АҚШ-тың қытайдағы өкілетті елшісі Патрик Херли және Қытай президенті Чан Кайши мен ҚКП төрағасы Мао.
Чунциндегі кездесу кезінде диалогқа келе бастаған қытайлық партия өкілдері алпауыт ел АҚШ пен Совет Одағының “қытай саясатын” жаңа дағдарысқа әкелді. Көріністе азаматтық соғысты тоқтатып бүкілқытайлық мәселені шешу болғанымен үлкен қастандықтың басы содан басталды.
Алпауыт тараптар қытай картасын өзгертетін жаңа диалогтарды қызу талқылап жатқанда Шығыс Түркістан аумағында бір уақытта үш бірдей уақытша үкімет өмір сүрді. Олар:
Бірінші, отставкадағы Шэн Шицай кланы;
Екінші, Ву Чжунсинның уақытша үкіметі;
Үшінші, Шығыс Түркістан уақытша үкіметі.
АҚШ-тың қытайдағы өкілетті елшісі Патрик Херли Шығыс Түркістан аумағын назарға ала отырып АҚШ-тың Үрімжідегі өкілетті консулына және консулдық сыртқы барлау қызметіне арнайы тапсырма берді. Соның негізінде АҚШ-тың ресми өкілдері Алтай, Шәуешек және Іле мен Еренқабырға аймақтарын еркін аралап аймақтану және әлеуметтану тұрғысынан көп зерттеу жүргізді.
Осы іс-қимыл аясында CIA-дың Шығыс Түркістан туралы ақпараттық базасы қалыптасты. АҚШ журналистері мен сыртқы барлау қызметі мамандары аймақтарды жасырын аралап ақпарат жинады және стратегиялы сараптамалар жасады. Алдағы уақытта CIA материалдарын сіздерге жариялайтын боламын.
Сол материалдардың ішінде АҚШ-тың қытайдағы өкілетті елшісі Патрик Херлидің өзі дайындаған рапорт құжаттары да бар. Ол материалдарда П.Херли Шығыс Түркістан ұлт-азаттық қозғалысын көбірек назарға ала отырып әр іс-қимылды барынша обьективті талдап отырған. Сонымен бірге Үрімжіден жеткізілген ақпараттық деректердің базасын дайындап Совет Одағының аймақтағы көңіл күйін тексеріп АҚШ тұрғысынан не істеу керектігін нақтылайтын пікірлер беріп отырған.
Елдес ОРДА
13.02.2024
Пікір қалдыру