رينات، ايتشى، بىزدە تاڭداۋ بار ما؟ تالعام شە؟ تاڭداۋ مەن تالعام بار ما؟ جوق. وعان سەن جانە سەن سياقتىلار جول بەرمەي وتىر، وكىنىشكە قاراي.
انىعىندا، تالعام بار جەردە، تاڭداۋ بار. تاڭداۋ بار جەردە تالعام بار. بىزدە ەكەۋى دە جوق. ساياساتىمىز قانداي بولسا، ساحنامىز دا سونداي ەكەن. وزگەشە پىكىر بىلدىرگەندەردى، ءوز جولىمەن جۇرگىسى كەلگەندەردى كوتەرمەيدى. بالكىم، كورە المايدى.
ايتپەسە، Ninety One ساعان نە جازدى، رينات؟ ءبارىن باستاپ بەرگەن سەن ەدىڭ. اتارعا وق، سىنارعا ءسوز تابا الماي جۇرگەندەر جامىراسا كەتتى. ءبارىن باستاپ بەرگەن سەن ەدىڭ. ولاردى كوگىلدىر قىلعان دا، ولاردى ۇلتتان بەزدىرگەن دە، جالپى ولارعا قاراتا نەشە ءتۇرلى جامان ءسوز ايتتىرعان دا ءوزىڭ ەدىڭ رينات.
سوندا سەنىڭشە ونەر دەگەن نە؟ كافەدەگى ءۇش جىگىتتىڭ باسىن قۇراپ «مۋزارتتىڭ» كوشىرمەلەرىن قۇرۋ ما؟ الدە قىرعىز-وزبەكتىڭ اندەرىن ۇرلاپ قولدان حيت جاساۋ ما؟
بايقايسىڭ با، بىزدە اۋىردىڭ ءۇستى، جەڭىلدىڭ استىمەن جۇرەتىن انشىلەر كوپ. ولار تىڭدارماندى ويلامايدى. ءوزىن ويلايدى. ءوزىنىڭ نەسىبەسىن ويلايدى. تويدى ويلايدى. تويداعى ءبيدى ويلايدى.
ايتالىق، ءبىزدىڭ تالعامىمىز توي اندەرىن قابىلداي المايدى. قايناعاعا، قارىنداسقا، قۇداشاعا ارنالعان اندەر ءبىزدىڭ تاڭداۋىمىزبەن سايكەسپەيدى ەكەن. نە ىستەيمىز سوندا؟ كىمدى تىڭدايمىز، رينات ايتشى؟
Ninety One كىمگە، نە جازدى؟ سەنىڭ باستاپ بەرگەنىڭ سول جەر-جەردىڭ بارىندە «انتي 91» اكتسيالارى ءوتتى. توپ حالىق جاۋىنا اينالدى. كۇلكىلىسى سولتۇستىك جاقتا توپتىڭ كەشىن وتكىزۋگە قارسى ءبىر توپ اعا-اپالارىمىز ميني-ميتينگ وتكىزىپتى.
«توپ قازاققا قاۋىپتى. ۇلتقا قاتەر ءتوندىرىپ وتىر» دەپتى. كۇلگەنىمىز-اي. سولتۇستىكتە بۇدان باسقا ماسەلە جوق ەكەن. ولاردىڭ Ninety One-عا شاماسى جەتەدى. ال كۋتۋزوۆ پەن سۋۆوروۆتىڭ كوشەلەرىن، پاۆلودار مەن پەتروپاۆلدىڭ اتتارىن اۋىستىرۋ قاجەتتىگىن ايتا المايدى. ولاردى سولتۇستىكتەگى ءتىلدىڭ تاعدىرى تولعاندىرمايدى، ولار ءۇشىن Ninety One قاۋىپتى. انىعىندا، ولار Ninety One-دى نە ءۇشىن جەككورەتىندەرىن بىلمەيدى. ولار سەنىڭ سوزدەرىڭە الدانىپ قالعان، رينات. سەن ءسوزدىڭ مايىن تامىزاسىڭ عوي، ويتكەنى.
ءسوزدىڭ مايىن تامىزاتىن ادام اقساقتى تىڭداي، وتىرىكتى شىنداي جەتكىزبەۋشى مە ەدى؟
توپتىڭ اتىن پايدالانىپ وزىڭە جارناما جاساعاندى دوعارۋ كەرەك شىعار. ورىنسىز جالا، دورەكى ءتيىسۋ. انىقتاپ كەلگەندە، سوزدەرىڭنىڭ بىردە-بىرىنە دالەل جوق. بىراق، حالىقتىڭ تابيعاتى سونداي. ەرتەگىگە سەنەدى، پافوسقا الدانىپ قالادى.
ايتپەسە، سەن جىرلايتىن ماسەلە از با؟ تىلدى ايتشى، جەردى ايتشى. قايدا بارامىز، قايدا كەلەمىز؟ كىم ەدىك، قانداي بولدىق؟ وسى تۋرالى ايتشى. جۇرت تىڭدايدى سەنى. Ninety One-عا تيىسكەنىڭدى دوعارشى. سەندەي اقىنعا ءسوز ەتۋگە تۇرمايتىن دۇنيەمەن الىسقان ۇيات. جوق، راس.
وتكەندە وسى توپتىڭ پروديۋسەرى ەربولاتتىڭ ءسوزىن تىڭدادىق. «ماقساتىم قازاق ءتىلىن ترەندكە اينالدىرۋ» دەدى. قالاي؟ ءان ارقىلى، ونەر ارقىلى. باسقا جول جوق. باسقالاي ۇيرەنبەيدى. باتىستا «جۇمساق كۇش » دەگەن تۇسىنىك بار. ولاردا ءبىزدى سولاي جاۋلاعان. ەندەشە بۇل جىگىتتەر ءوز جولىمەن جۇرۋگە، ونەرىن جاساۋعا مۇرسات بەر. سەن ولارعا ءبارىبىر كەدەرگى بولا المايسىڭ…
ال فرەدو
dalanews.kz
پىكىر قالدىرۋ