Rinat, aytşı, bizde tañdau bar ma? Talğam şe? Tañdau men talğam bar ma? Joq. Oğan sen jäne sen siyaqtılar jol bermey otır, ökinişke qaray.

Anığında, talğam bar jerde, tañdau bar. Tañdau bar jerde talğam bar. Bizde ekeui de joq. Sayasatımız qanday bolsa, sahnamız da sonday eken.  Özgeşe pikir bildirgenderdi, öz jolımen jürgisi kelgenderdi kötermeydi. Bälkim, köre almaydı.

Äytpese, Ninety One sağan ne jazdı, Rinat? Bärin bastap bergen sen ediñ. Atarğa oq, sınarğa söz taba almay jürgender jamırasa ketti. Bärin bastap bergen sen ediñ. Olardı kögildir qılğan da, olardı wlttan bezdirgen de, jalpı olarğa qarata neşe türli jaman söz ayttırğan da öziñ ediñ Rinat.

Sonda seniñşe öner degen ne? Kafedegi üş jigittiñ basın qwrap «Muzarttıñ» köşirmelerin qwru ma? Älde qırğız-özbektiñ änderin wrlap qoldan hit jasau ma? 

Bayqaysıñ ba, bizde auırdıñ üsti, jeñildiñ astımen jüretin änşiler köp. Olar tıñdarmandı oylamaydı. Özin oylaydı. Öziniñ nesibesin oylaydı. Toydı oylaydı. Toydağı bidi oylaydı.  

Aytalıq, bizdiñ talğamımız toy änderin qabılday almaydı. Qaynağağa, qarındasqa, qwdaşağa arnalğan änder bizdiñ tañdauımızben säykespeydi eken. Ne isteymiz sonda? Kimdi tıñdaymız, Rinat aytşı?

Ninety One kimge, ne jazdı? Seniñ bastap bergeniñ sol jer-jerdiñ bärinde «anti 91» akciyaları ötti.  Top halıq jauına aynaldı. Külkilisi Soltüstik jaqta toptıñ keşin ötkizuge qarsı bir top ağa-apalarımız mini-miting ötkizipti.

«Top qazaqqa qauipti. Wltqa qater töndirip otır» depti. Külgenimiz-ay. Soltüstikte bwdan basqa mäsele joq eken. Olardıñ Ninety One-ğa şaması jetedi. Al Kutuzov pen Suvorovtıñ köşelerin, Pavlodar men Petropavldıñ attarın auıstıru qajettigin ayta almaydı. Olardı Soltüstiktegi tildiñ tağdırı tolğandırmaydı, olar üşin Ninety One qauipti. Anığında, olar Ninety One-dı ne üşin jekköretinderin bilmeydi. Olar seniñ sözderiñe aldanıp qalğan, Rinat. Sen sözdiñ mayın tamızasıñ ğoy, öytkeni.

Sözdiñ mayın tamızatın adam aqsaqtı tıñday, ötirikti şınday jetkizbeuşi me edi? 

Toptıñ atın paydalanıp öziñe jarnama jasağandı doğaru kerek şığar. Orınsız jala, döreki tiisu. Anıqtap kelgende, sözderiñniñ birde-birine dälel joq. Biraq, halıqtıñ tabiğatı sonday. Ertegige senedi, pafosqa aldanıp qaladı. 

Äytpese, sen jırlaytın mäsele az ba?  Tildi aytşı, jerdi aytşı. Qayda baramız, qayda kelemiz? Kim edik, qanday boldıq? Osı turalı aytşı. Jwrt tıñdaydı seni. Ninety One-ğa tiiskeniñdi doğarşı. Sendey aqınğa söz etuge twrmaytın düniemen alısqan wyat. Joq, ras.  

Ötkende osı toptıñ prodyuseri Erbolattıñ sözin tıñdadıq. «Maqsatım qazaq tilin trendke aynaldıru» dedi. Qalay? Än arqılı, öner arqılı. Basqa jol joq. Basqalay üyrenbeydi. Batısta «jwmsaq küş » degen tüsinik bar. Olarda bizdi solay jaulağan. Endeşe bwl jigitter öz jolımen jüruge, önerin jasauğa mwrsat ber. Sen olarğa bäribir kedergi bola almaysıñ… 

Al' FREDO

dalanews.kz