ماتچ كوممەنتاتورى بولۋدىڭ نەگىزگى شارتتارى
kerey.kz
رەسەيلىك جاڭادان اشىلىپ جاتقان سپورت ارنالارىنان اپل ماتچتارىن كورىپ ءجۇرمىن. بۇل تاراپتا نە وزگەرىس بار ەكەن دەپ. كلاسسيكالىق كاسىبي كوممەنتاتورلاردان (سوۆەتتىك ءستيلدى بولسا دا) الەكساندر ەلاگين عانا قالىپتى. قالعاندارىنىڭ ءبارى – تۇكىرىگىنە شاشالعان، تىستەنە سويلەپ، كوسەمسي كوسىلىپ، دوپ ايىپ الاڭىنا جەتەر-جەتپەستەن “ويپىرماي، ويپىرماي!”، “مىنە، مىنە!!!” دەپ شاڭكىلدەي شۋلايتىن overexcited بالا-شاعا. قازاقشا نۇسقاسى: “تاعى ءبىر قاۋىپتى ءسا-ءا-ءات! تاعى ءبىر قاۋىپتى ءسا-ءا-ءات!” كەيبىر قازاقستاندىق فۋتبول كوممەنتاتورلارىنىڭ كىمگە ەلىكتەيتىنىن ەندى ۇقتىم. بۇل بالا-شاعا ماتچ كوممەنتاتورى بولۋدىڭ مىناداي نەگىزگى شارتتارىن تۇسىنە الماعان ەكەن:
1. ماتچ كوممەنتاتورى 90 مينۋت ءسوزىنىڭ كەم دەگەندە 90 پايىزىن الاڭدا بولىپ جاتقان تارتىسقا ارناۋى ءتيىس، 10 پايىزى سول ماتچقا تىكەلەي قاتىستى بەكگراۋند پەن ستاتيستيكا بولسىن. ماتچقا قاتىسسىز ۆيكيپەديالىق مالىمەتتەر، بولجاۋ، وسەك-اياڭ، جەكە تولعانىس، ءمانسىز ماقال-ماتەليزم، ليريكالىق شەگىنىس، ويىنشىلار مەن ترەنەرلەرگە دەگەن جەكە باس كوزقاراسى، تاعىسىن تاعىلار شالا كوممەنتاتوردان شارشاعان جۇزدەگەن مىڭ كورەرمەن تۇرماق، ونىڭ “ۆكونتاكتە”-دەگى جەتى جۇزگە جەتەر-جەتپەس دوسىنا دا قىزىق ەمەس. ال ساراپتاما مەن بولجامدى ماتچتان كەيىن (يا ورتاسىنداعى ۇزىلىستە) ستۋدياداعى مودەراتور مەن ەكسپەرتتەر ايتسىن. “توتتەنحەم” ادەتتە ويىندى وسىلاي يا وڭ، يا سول قاپتالمەن وربىتەدى” دەيدى “ماتچ تۆ”-ءنىڭ ءبىر كوممەنتاتورى. “بۇل كوماندا ادەتتە ويىندى دومالاق دوپپەن وينايدى” نەمەسە “بۇل كوماندا كوبىنە قارسىلاستىڭ قاقپاسىنا گول سوعۋدى ماقسات تۇتادى” دەگەن سياقتى قۇبىجىق اقيقاتيزم. جانە مۇنداي اقيقاتيزمدەر مينۋت سايىن ايتىلادى. 90 مينۋت سامبىرلاي سويلەۋ شارت ەمەس، ويىننىڭ باياۋ تۇستارىندا، يا ەرەكشە ءبىر ەموتسيالار كورىنگەن ساتتەردە جارتى مينۋتتىق پاۋزالار جاساپ، كورەرمەننىڭ قۇلاعىن دەمالدىرىپ، يا بالقىتىپ وتىرۋ كەرەك.
2. كوممەنتاتوردىڭ ءتىلى جاتىق، سوزدىك قورى باي بولۋى ءتيىس. مىسالى، جاڭاعى كەيبىر رەسەيلىك جاس كوممەنتاتورلاردىڭ لەكسيكا قورى قانشالىقتى جۇتاڭ ەكەنىن ءبىر-اق جاعدايدان بىلۋگە بولادى. ويىننىڭ ەڭ قاۋىپتى ساتتەرىن عانا شولىپ شىققان قىسقا كليپتە “قاقپاشى كومانداسىن تاعى قۇتقاردى”، “تاعى قۇتقاردى”، “تاعى قۇتقاردى”، “تاعى قۇتقاردى” دەپ قاقساپ قايتالاي بەرەدى. ومىرىندە “قۇتقارۋدان” باسقا ەتىستىك ەستىمەگەن ادام سياقتى.
3. نەگىزگى كوممەنتاتور ارىپتەس رەتىندە جۇمىسقا تارتىلعان قاسىنداعى بۇرىنعى فۋتبولشىنىڭ قاجەتسىز مەمۋار ايتىپ كەتۋىنە جول بەرمەۋى كەرەك. بىرنەشە ماتچ كورىپ وتىرىپ، اتىن ءومىرى ەستىمەگەن ءبىر ءسوزۋار بۇرىنعى رەسەيلىك فۋتبولشىنىڭ شالا كوممەنتاتورعا اينالعانىنا كۋا بولدىم. وزىنە-ءوزى تامسانىپ، ءسۇيسىنىپ، كەلسىن-كەلمەسىن ەستەلىكتەرىن تىقپالاپ وتىرىپ، ويىننىڭ كەيبىر وتە قاۋىپتى ءھام ماڭىزدى تۇستارىن بايقاماي دا قالدى.
4. كوممەنتاتوردىڭ الدەبىر كومانداعا، يا فۋتبولشىعا قاتىستى سيمپاتياسىن، يا انتيپاتياسىن اشىق ءبىلدىرۋى، كوپە-كورىنەۋ جاقتاسۋى – ابسۋرد. ەفيردەن كەيىن بىردەن جۇمىستان شىعارىپ جىبەرسە، وبالى جوق.
5. تورەشىنىڭ شەشىمدەرىن قولداۋ، يا سىناۋ، قىزىلكەڭىردەك بولىپ سىرتتاي داۋلاسۋ – كاسىبي كوممەنتاتوردىڭ تۇسىنە كىرمەيتىن كۇپىرلىك. وتكەندەگى ءبىر ماتچتا رەسەيلىك كوممەنتاتور ويىن بىتكەنشە “نەگىزى وففسايد ەدى، نەگىزى وففسايد ەدى” دەپ كۇڭكىلدەدى دە وتىردى. ء“اي، جولىڭ بولعىر جەتەسىز-اۋ، بۇل جەكە پىكىرىڭنىڭ ماعان كوك تيىن قۇنى جوق، الاڭسىز ويىن كورەيىنشى!” دەپ ايعاي سالعىڭ كەلەدى. ماتچ كوممەنتاتورى تورەشىنىڭ شەشىمىن كورەرمەنگە حابارلايدى، ەگەر ويىنشىلاردىڭ، ترەنەرلەر مەن كورەرمەندەردىڭ تارابىنان قانداي دا ءبىر رەاكتسيا بولسا، سونى سيپاتتايدى. ءتامام! تەك باقىلاپ وتىرۋ. ەفيردە تورەشى شەشىمىنە قاتىستى جەكە پىكىرىن تىقپالاپ، كۇرسىنە كۇڭكىلدەپ، قىزاراقتا قورعاشتاپ، ايعايلاي ايىپتاپ وتىراتىن رەسەيلىك ارىپتەستەرگە ەلىكتەۋدىڭ تۇك قاجەتى جوق. ونىڭ ءبارى – ستۋديا مودەراتورى مەن ساراپشىلارىنىڭ جۇمىسى. ەگەر تەلەارناڭدا ماتچ الدىندا، ەكى تايم ورتاسى مەن ويىننىڭ سوڭىندا بولجام مەن ساراپتاما جاسايتىن كاسىبي ستۋديا جۇرگىزۋشىسى مەن ساراپشىلارى بولماسا، وندا ءويتىپ كوسەمسۋدى كورەرمەننىڭ ءوز ەنشىسىندە قالدىر.
عالىم بوقاشتىڭ facebook پاراقشاسىنان الىندى
پىكىر قالدىرۋ