Bügin Praga uaqıtımen tañğı sağat tört şamasında janı jaysañ, minezi jaydarı, köñili säuleli, isi mwqiyat Rahat Mamırbek bauırımızdıñ baqilıq bolğanı turalı habar jetti. Jeltoqsannıñ 11-inde kenet auırıp, Almatıdağı törtinşi auruhananıñ jansaqtau bölimine tüsken äziz äriptesimizdiñ tileuin tilep, sır bermey jürgen edik. Tuğan-tuısı men jaqın dos-jaranı nebäri 39 jastağı jigittiñ sauığıp ketetinine senip, derti turalı köpke jariya qılmaudı ötingen. Toğız kün boyı Raqaştıñ beti beri qaraydı dep ümitin üzbegen otbasına, barşa ağayını men joldas-joralarına qayğırıp köñil aytam. Alla aldınan jarılqap, artın qayırlı etip, jasamağan ğwmırın wl-qızdarına näsip qılsın!

2001 jılğı jeltoqsanda, osıdan däl 16 jıl bwrın Rahattıñ jurnalistikağa bet bwruına sebepşi bolıp edim. “Qazaqstan” telearnasına “Mezgil” habarın endi şığarğalı jatqanda bir äriptesim kezinde QazWPU-dıñ “Elita” studentter klubında erekşe közge tüsken bir sayasattanuşı jigit bar ekenin, qazir joldama boyınşa Semeydegi Şäkerim atındağı memlekettik universitette däris oqıp jürgenin aytıp, Almatığa aldırtıp, tanıstırğan. Qaratorı öñdi, domalaq közdi, twnıq janarlı jigit erekşe alğır, alımdı äri şapşañ bolıp şıqtı. Telejurnalistikağa tez beyimdeldi. Aqköñil tabiğatımen jaña ortanı baurap äketti. Arası aşıq qasqa tisterin körsetip, riyasız jarqıray külgende jer-jihan nwrlanıp ketetin. Bir jıldan soñ jas äriptesimdi Almatıda qaldırıp, Astanağa kete bardım. Arı qarayğı Rahattıñ jeke jürip şınıqqan kezi, käsibi evolyuciyası köz aldarıñızda şığar. “Kültöbede” keleli keñester qwrıp, köptiñ köñilinen şıqtı. “Almatı” telearnasınıñ jañalıqtar qızmetin jandandırıp, “Qızılağaş oqiğası” kezinde şeber reportajdarımen körermendi tänti etti. KTK men 31-arnada jwmıs istegen kezderi qoltañbası ayqındala tüsti. Soñğı jıldarı “Azattıqtıñ” ağa veb-redaktorı retinde halıqaralıq standarttardı meñgergen jergilikti az mamannıñ birine aynaldı. Rahattıñ mätindi redakciyalau täsili men vebifikaciyalau stili däl qazir oqulıq etip şığaruğa dayın.

Soñğı jıldarı bes perzentiniñ oqudağı jetistikterine süysinip, olardı ünemi qanattandırıp, sabaqtarın birge qarap, sırqattanıp qalsa, der kezinde emdetu üşin şetke de şığıp, äkelik parızın öteu jağınan da zamandastarına ülgi bolarlıq is qılıp jür edi. Öz densaulığın da barınşa kütip, az uaqıtta äjeptäuir artıq salmaqtan arılıp, sportpen şwğıldanıp, bwl tarapta da qwrdastarınan qara üzip ketken bolatın.

Pragağa üş ay biliktilik arttıruğa kelip jatqan Qasekeñdi (Qasım Amanjoldı) bügin tañğı tört jarımda päterinen ala salıp, ekeumiz Erekeñniñ (Ermek Tilegenniñ) üyine tarttıq. Üzeñgiles, ayırılmas dos bolğan adamğa jaqın jannıñ qazasın estirtuden qiın jağday joq-au. Köz aldımızdan joğarıdağı ömir suretteri tizilip ötti. Raqabaydıñ jaqsılıq üşin janın ayamaytın adami qasietterin bir tügendep, “adam öledi, äruaq mäñgi” destik. Jurnalist retinde jalpı jwrt jazbay tanitın äriptesimiz resmi sıylıq häm ataq bwyırmağan küyi dünieden ötipti. Meniñşe, eñ zor ataq – Rahattıñ az ğwmırında ömirde de, käsipte de köp täjiribe jinay bilgen qabiletine süysingen halıqtıñ ıqılası. Zamanaui qazaqtildi, liberaldıq tanımdı has ziyalınıñ biri, sanası sergek jurnalist, oyı tereñ publicist bizdey paqırdı bergi bettegi twman işinde qaldırıp, tılsımı tüpsiz arğı betke kete bardı. Täñir tağalam bar isin sauapqa jazıp, imanın mäñgi joldas qılıp, nwrı peyişte şalqığay!

Ğalım BOQAŞtıñ facebook paraqşasınan alındı