Böhçuluun Damdin Qazaqstanğa arnayı şaqırtumen kelgen. Tört künnen beri aldınan adam üzilmey jatqan 80 jastağı aqsaqal, 2 jarım mıñ şaqırım joldan şarşap kelse de bir künnen soñ jwmısına kirisip ketti. Mi şayqalu, türli bas auruları, büyrektiñ sozıluı, buın auruları, köz tiyu, bala kötermeu sındı özge de densaulığında kinarattarı bar adamdardı qaraydı.

Moñğoldardıñ uranhay ruınan şıqqan Böhçuluun aqsaqaldı öziniñ jolın quğan, 12 jasınan lamalıq jolğa tüsken 40 jastağı wlı Galörög ertip jür. Aqsaqal emşilik qasiettiñ ata-babasınan beri jalğasıp kele jatqanın aytadı. Emşilik törtinşi atalarımnan beri kele jatqanın bilem, bwl qasiet 8 balamnıñ (4 wl, 4 qız) ekeuine qazir darıdı, – deydi qolında biotoğı bar qart.

Almatı irgesindegi qazaqtardıñ üyine twraqtağan qart emşi kün sayın 40-50 şaqtı adamdı qarap ülgeredi.

«Maqsatım adamğa jaqsılıq jasau. Qazaqstanğa birinşi ret kelip twrmın. Erlerde bel aururları, äyelderde jatır auruları köp eken. Monğoldarda midıñ şayqaluı jii  kezdesedi. Aurudıñ köbi negizinen büyrekke de baylanıstı. Ayağı, buını auırıp, tizesin basa almau da köbine büyrektiñ bwzıluınan, büyrektiñ tömen tüsui, tamırınıñ jiñişkeruinen boladı», – dedi emşi.

Lamaizm dininiñ ökili özderiniñ qwdayı Burhanğa siınatının aytadı. Halıq emimen, buddalıq ilimmen keñes kezinde adam qarauğa tiım salınsa da tığılıp, ata saltın  jalğastırğan. Qartın jetektep, balasın köterip qaraluğa kelgen qazaqtar qazir 80 jastağı buddisten şipa alu üşin kezekte twr. Özin Altıngül Millionqızı dep tanıstırğan äyel wlın, kelin-nemeresin ertip osımen ekinşi kün qatarınan kelip jürgenin ayttı.

«Ol (Böhçuluun) kisiniñ qolı qay jerge tidi, sol jerdiñ bärine äser etti. Jaqsı eken. Sezdim. Biz bwl adam turalı bwrınnan estitinbiz. Tipten şeşem men inim bwl emşini Monğoliyağa arnayı izdep te barğan. Biraq ol kezde kezdese almadı, adamdar özge jaqqa alıp ketken eken. Basım jii auıratın. Büyrektiñ isigi basqa äser etip, endi ayaqqa şauıp bara jatır eken. Üş künde nätije beredi dedi. Basımdı wstağan  soñ miım bos, solqıldap qalğan siyaqtı boldı. Wlım, kelinim, nemerem, inim beseumiz de emdelip jürmiz,- dedi almatılıq Altıngül Millionqızı.

Almatıda tağı jiırma kündey ayaldaytın lama-emşi qızmeti üşin aqı, aqşa swramaydı. Onıñ alğan eñ ülken därejesi “Ard emç”, yağni “Halıq emşisi” degen  atağı eken.  12 jasınan bastap budda ilimin alğan Galörög Böhçuluunwlı da äke jolın quğan.

«Äkem Qazaqstanğa şığarda buddalıq saltpen de emdeuge qajetti şöp, qwmalaq, dwğa kitaptarın, lamalıq kiimderi sındı özge de qajetti zattarın  salıp alıptı. Monğoliyanıñ işindegidey dep oylağan boluı kerek, qart adam ğoy. Şekarada problema boluı mümkin dep tüsindirip, qaldırıp kettik. Äri mwsılmandardıñ arasında buddalıq ilimmen emdeuge rwqsat joq. Qazir äkemdi Qarağandı, Astana, Pavlodar jaqqa da şaqırıp jatır. Biotoğı bar, tamırdan-aq köp aurulardı anıqtaydı, sipap emdeydi.  Adamdardıñ  bergenin aladı, dünie qumaydı, qwdaydıñ qasietin halıqqa körsetuim kerek degen maqsat onda», – dedi Ard emç-ge jol körsetip jürgen wlı Galörög Böhçuluun.

Ämirbolat Qwsayınwlı, Almatı