Qazaqstan sırtqı ister ministrligi 25 mamır küni Astanada bastalğan Siriya oppoziciyası kelissözderi turalı ünsiz otır. Birneşe künnen beri vedomstvo baspasöz qızmetinen aqparat aluğa tırısqan Azattıqqa olar «kelissöz barısınan habarımız joq nemese qolımız timeydi» degen uäj aytumen boldı. Keyde ministrlik qızmetkerleriniñ telefonı jauap bermedi.

TARMAQTAR MEN ŞARTTAR

Al reseylik «RIA Novosti» agenttigi Astanadağı kelissöz kezinde Siriya oppoziciyası ökilderi arasında alauızdıq tuğanın habarladı. Soltüstik jäne Oñtüstik Amerikadağı plyuralistik qoğam qozğalısı ökili Bassam Bitardıñ aytuınşa, keybir sayasatkerler qorıtındı qwjatqa qol qoyudan bas tartqan.

Plyuralistik qoğam qozğalısı basşısı Randa Kassistiñ sözinşe, qwjattıñ şetel jaldamalıları turalı tarmağına qatıstı dau tuğan.

Siriya plyuralistik qoğam qozğalısı basşısı Randa Kassis.

«RIA Novosti» agenttigi Randa Kassistiñ «Azdağan qarsılıqtar boldı. Biz şetel jaldamalılarınıñ biri qalmay elden ketui tiis dep sanaymız. Bwl – bizdiñ principimiz, olardıñ dereu ketuin swramaymız. Biraq sayasi process bastalu üşin olar elden tübinde ketui tiis. Kelissözge qatısuşılardıñ köbi bwl talabımızben kelisti, biraq keybireuler «Hezbolla» qozğalısı da ketui tiis dep sanaydı» degen sözin keltirgen.

Qazaqstan sırtqı ister ministrligi saytınıñ habarlauınşa, kelissöz jabıq esik jağdayında ötken. Sonday-aq Siriya oppozicionerleri Qazaqstannan Siriyadağı dağdarıstı retteu jönindegi kelissözderge arağayındıq jasaudı ötingen soñ Astananıñ olarğa dialog jürgizetin alañ wsınğanı, biraq kelissözge qatıspağanı aytılğan.

Qazaqstan astanasına 30-dan asa adam kelgen. Sayttıñ habarlauınşa, bwl – Siriyadağı türli opppoziciyalıq küşterdiñ basşıları men ökilderi jäne azamattıq qoğam ökilderi men täuelsiz oppozicionerler. Biraq kelissözge ükimetten delegattar kelgen joq.

Säuir ayında mwnday kelissözder Mäskeude de ötken. Ol kezde Siriya wlttıq keñesi men wlttıq opppoziciyalıq küşter koaliciyası siyaqtı iri oppoziciyalıq toptar kelissözge qatısudan bas tartqan bolatın. Olar «äueli resmi Damask bizben prezident Başar Asadtı bilikten ketiru jöninde dialog bastasın» degen şart qoyğan.

Bügin «RIA Novosti» agenttigi Mäskeudegi Siriya elşisi Riyad Haddadtıñ pikirin keltirdi. Onıñ mälimdeuinşe, rsemi Damask Astanada ötip jatqan kezdesudi bwrın Kair men Stambulda ötken kezdesulerge teñeydi. Onıñ aytuınşa, oppozicionerlerdiñ köbi kelissözge qatısudan bas tartqan.

«Novosti RIA» agenttigiRiyad Haddadtıñ «memleket retinde bwl kezdesuden äldebir nätije kütpeymiz» degen sözin keltiredi.

BEDEL, MÄRTEBE JÄNE NÄTIJE

Sayasattanuşı Dosım Sätpaev Astana janjaldasuşı taraptardı bitimge keltiruge bwrın da talay tırısqanın aytadı. Bwdan erterekte Astanada mwnday kezdesudi Ündistan men Päkistan basşıları ötkizgen. Qazaqstan Iran yadrolıq bağdarlamasına qatıstı kürdeli mäseleni talqılau üşin de alañ wsınğan.

Sayasattanuşı Dosım Sätpaev.

– Qazaqstan biligi janjaldardı diplomatiyalıq jolmen retteudi jaqtaytın memleket retinde eldiñ sırtqı sayasi bedelin maqsattı türde qalıptastıruğa tırısadı äri bwl bağıtta belgili bir kömegin wsınuğa äzir. Imidj twrğısınan alğanda, Astana bwdan wtpasa, wtılmaydı. Siriya oppoziciyası kelissözine qatıstı da osını aytuğa boladı. Imidj twrğısınan alğanda, Qazaqstan bwl kelissözden wtatının bäri jaqsı tüsinedi. Keminde belgili bir uaqıtqa özine tağı nazar audardı, – deydi Dosım Sätpaev.

Biraq ol bwl kelissözderden eş nätije şıqpaytının sarapşılardıñ köbi äu bastan eskertkenin aytadı. Onıñ pikirinşe, Siriya ükimet ökilderiniñ kelissöz procesine qatısudan bas tartuı kelissözdiñ märtebesin de, äserin de tömendetip otır.

– Qazaqstannan kelissöz ötkizuge bastamaşı boluın swrağan Siriya oppoziciyası böliginiñ eldegi ıqpalı mıqtı emes. Öytkeni ol sansız bıtırañqı toptardan twradı. Ol jaqta mınalardan da mıqtı oyınşılar bar. Biraq meniñşe, qazir Siriyada kelissöz jürgizuge äzir küşterdiñ emes, «Islam memleket» nemese «Äl-Kaida» tobınıñ bir tarmağı «An-Nusra» maydanı siyaqtı radikal qwrılımdardıñ ämiri jürip twr, – deydi Dosım Sätpaev.

Onıñ pikirinşe, Astanadağı kelissözder Qazaqstannıñ Siriyadağı jağdaydı beybit jolmen retteudi qoldaytının jäne mwnday is-şaralarğa öz territoriyasın aldağı uaqıtta da wsınuğa äzir ekenin tağı bir märte körsetti.

Sayasattanuşınıñ pikirinşe, Minsk aldın orap ketip, Ukrainadağı dağdarısqa qatıstı kelissöz ötkizu nieti iske aspay qalğan Astana Siriya oppoziciyası kelissözi twsında säl de bolsa esebin tügendep aldı.

Svetlana GLUŞKOVA

azattyq.org