«Qazaqstan wlttıq banki wlttıq investiciyalıq korporaciyası» (QWB WIK) akcionerlik qoğamınıñ jetekşisi ayaq astınan auıstı: Berik Ötemwrattıñ ornına basqarma törağasınıñ ökiletti merzimi ayaqtalğanğa deyin osı qızmetke Esjan Birtanov tağayındaldı. Osı aptada qazaqstandıqInformburo aqparattıq agenttigi «Berik Ötemwrattı qızmetten alu QWB WIK jetekşisiniñ Wall Street Journal basılımına, mwnaydan tüsken üsteme kiristen qwralatın Qazaqstan wlttıq qorı qarjısı «6-7 jılda sarqıluı mümkin» ekenin mälimdegen bükpesiz swhbatımen bir mezgilge qatar kelgenin» habarlağan edi.

Amerikanıñ Wall Street Journal jurnalı saytında jariyalanğan maqalada «[Qazaqstan wlttıq banki] ökiliniñ aytuınşa, mwnay bağasınıñ qwldırauı saldarınan kirisi kemigen Qazaqstannıñ 64 milliard dollar kölemindegi mwnay qorı altı ne jeti jıl işinde aqşasız qaluı mümkin, al ükimet bolsa jiğan-tergenin jwmsap jatır» dep jazılğan.

«Embimwnaygaz» kompaniyasınıñ mwnay kenişi. Atırau oblısı, 4 säuir 2012 jıl.

Wall Street Journal Berik Ötemwrattıñ «2014 jıldıñ tamızında eñ joğarğı körsetkişke – 77 milliard dollarğa deyin jetken wlttıq qor jinağınıñ kölemi 17 payızğa azayıp ketti. Ükimet jıl sayın qordan 9 milliard 500 million dollar jwmsaydı. Qazaqstandıq sayasatkerler men wlttıq bank şığındı azaytıp, salıq tüsimin wlğaytuı jäne qor qarjısın tikeley investiciya siyaqtı ülken kiris äkeletin aktivterge saluı tiis» degen sözderin keltirgen.

Amerikanıñ Bloomberg saraptama agenttiginiñ pikirinşe, «mwnay bağası soñğı 11 jıldağı eñ tömengi deñgeyge tüsip, şikizat salasındağı kiris soñğı ret 1999 jılı bayqalğan deñgeyge deyin qwldırauına baylanıstı Qazaqstannan bastap Oñtüstik Koreyağa deyingi älem elderiniñ wlttıq äl-auqat qorlarında jatqan 7,1 trillion aktivterge jañadan kiris kirmey qalu qaupi bar».

Berik Ötemwrattıñ aytqanı Qazaqstan baspasözi men äleumettik jelilerde dürbeleñ tudırdı, ile-şala ol qızmetinen alındı. Äytkenmen, «QWB WIK» bwrınğı basşısı jergilikti aqparat qwraldarına bwl mäselege qatıstı kommentariy beruden bas tarttı.

Berik Ötemwrat Facebook äleumettik jelisindegi parağında: «Wall Street Journal men Financial Times basılımdarındağı maqalalardan keyin jergilikti BAQ-tıñ köbi kommentariy swrap, tanıstarım oyların aytıp jatır. BAQ ökilderimen söylesuden principti türde bas tarttım. Meniñşe, eşkimniñ jeke basına tiisip, artıq eşteñe aytqan joqpın. Eger qalağan jağdayda özgeşe bolar ma edi, biraq onday josparım bolğan emes. Ärqilı äri qızıqtı pikirler tüsip jatır. Deni-qarnım sau, eşqanday qısım bolğan joq jäne özimdi jağdaydıñ qwrbanımın dep sezinbeymin. Men kötergen mäselege jwrt nazarın audarğanına quanıştımın. Al jalpı alğanda, mwrınnan qan ketip jatqanın jwrttıñ bäri tüsinedi ğoy, sondıqtan aytqanımdı tıñ jañalıq deuge kelmes. Diagnozğa qatıstı jäne onı emdeu joldarı jaylı jeke oy-pikirlerimdi, bälkim, keyinirek jazarmın» dep tüsindirgen.

TEÑİZ ARQILI ÖTETİN TRANZIT

Japoniyada şığatın Diplomat gazetiniñ jazuınşa, Ukraina özimen sauda-sattıq jasaytın negizgi bes äriptes eldiñ biri – Qazaqstanğa tauarın Resey territoriyasın aynalıp, Gruziya men Äzerbayjan arqılı tasımaldauğa tırısıp jatır. Maqala avtorları Europa men Resey arasındağı şielenistiñ Qazaqstan-Ukraina sauda-sattığına qauip töndirip twrğanın aytadı. «Qazaqstan öziniñ äldeqayda keñ ekonomikalıq müddeleri men Reseymen jaqın qarım-qatınası jäne Resey men Europa arasındağı sauda şayqasınıñ zardaptarı (özine qarsı ädeyi jasalmasa da) ortasında qalıp, äri-säri küy keşip otır» dep jazadı Diplomat basılımı.

Japon basılımı Azattıqtıñ Ukrain qızmeti saytında jariyalanğan Ukraina infraqwrılım ministriniñ mälimdemesine silteme jasap, «Qazaqstanğa Gruziya men Äzerbayjan arqılı «eksperimenttik» jük tasımaldau saparı 15 qañtarda bastaladı» dep habarlağan.

«Bwl bağıt ekonomikalıq twrğıdan tiimdi bola ma, joq pa – onı uaqıt körsetedi, biraq bwl marşrut Qazaqstanğa tauardı jük avtokölikterimen nemese temir jolmen tasımaldau qwnınan qımbatqa tüsui tiis. Gruziya men Äzerbayjan territoriyası arqılı Qazaqstanğa jetkiziletin Ukraina tauarları tranziti Qara teñiz ben Kaspiy teñizin de kesip ötui tiis. Sondıqtan bwl arzanğa tüspesi anıq» dep jazadı Diplomat.

Anna KLEVCOVA

Azattıq radiosı