Armeniya men Äzerbayjannıñ arasındağı daulı aymaq – Taulı Qarabaqta ötken aptanıñ senbisinde bastalğan qarulı qaqtığıs äli sayabırsığan joq. BWW dereginşe, demalıs künderi Taulı Qarabaqta keminde 33 adam qaza tauıp, 200-dey adam jaralğan. Aymaqta qarulı qaqtığıstıñ örşuine Armeniya men Äzerbayjan birin-biri ayıptı köredi.

http://www.azattyq.org/audio/27654058.html

Qazaqstan Taulı Qarabaq janjalına baylanıstı pikirin qaqtığıs bastalğan künniñ erteñinde – 3 säuirde mälim etti. Resmi Astana taraptardı wstamdılıq tanıtuğa, oq atudı toqtatu turalı uağdalastıqtardı qatañ wstanuğa, janjaldı tek qana beybit jolmen şeşuge şaqırdı.

«QAZAQSTANĞA KEREK EMES JANJAL»

Qazaqstannıñ twñğış prezidenti qorı janındağı älemdik sayasat jäne ekonomika institutınıñ bas mamanı Asqar Nwrşa «Armeniya men Äzerbayjan arasındağı Taulı Qarabaqqa qatıstı kikiljiñ Qazaqstannıñ müddesine ziyanın tigizedi» dep biledi.

Taulı Qarabaqtağı atıstan jaralanğan balalar.

– Şielenistiñ odan äri uşığuı Qazaqstanğa kerek emes. Qazaqstan bwl elderdiñ qarım-qatınastarın tüzegenine müddeli. Äzerbayjan – Qazaqstan üşin öte mañızdı tranzittik bağıt, – deydi ol.

Sarapşınıñ pikirinşe, «Armeniya men Äzerbayjan şielenisin ekijaqtı kelisimmen şeşu qiın – öytkeni qos tarap ta mäselege birjaqtı iilmes wstanımda otır». Ol Taulı Qarabaq şielenisi odan äri örşui mümkin degen qaupi barın da aytadı.

– Postsovettik aumaqtağı birqatar eski şielenisterdiñ qayta örşuine qarağanda, äñgime aymaqtıq şieleniste emes, älemdik sayasatqa wlasıp jatır. Müddeleri qayşı iri derjavalardıñ tiresi bwl mäseleniñ şeşiluine oñ äserin tigizbeydi, – deydi ol.

Asqar Nwrşa Taulı Qarabaq janjalınıñ qayta üdeui Wjımdıq qauipsizdik şartı wyımına (WQŞW) ülken sın bolmaq dep joridı.

«QAZAQSTANDA OQITILMAYTIN QAQTIĞIS»

Azattıq tilşisi Qazaqstan mäjilisiniñ deputatı Mwhtar Tinikeevke jolığıp, Armeniya men Äzerbayjan arasında qayta tuğan qaqtığıs jaylı pikirin bilmek boldı. Ol Taulı Qarabaq janjalın şeşu üşin 1991 jäne 1993 jıldarı Resey men Qazaqstan birigip jibergen bitimgerlik missiyalar qwramında bolğan edi.

– Şielenisti şeşu üşin eñ aldımen kelisim boyınşa olar basıp alğan territoriyasın bosatuı kerek, – dep qısqa qayırdı Mwhtar Tinikeev.

Eriktiler. Taulı Qarabaq, 2 säuir 2016 jıl.

Al Şımkent qalasındağı tarih päniniñ mwğalimi Ömir Şınıbekwlı Taulı Qarabaq janjalı qazaqstandıqtarğa, äsirese jas buınğa beymälim taqırıp ekenin aytadı.

– 11-sınıpqa arnalğan «Dünie jüzi tarihı» päninde «TMD elderi» degen taqırıp bar. Biraq bwl taqırıpta täuelsizdik alğan postsovettik elder arasındağı şielenister turalı aytılmağan, – deydi ol.

Negizinen armyandar köp qonıstanğan Taulı Qarabaq avtonomiyalıq oblısı 1991 jılı Äzerbayjan qwramınan şığatının mälimdegen. Mwnıñ aqırı Armeniya men Äzerbayjan arasındağı qarulı janjalğa wlasıp, 30 mıñğa juıq adam mert bolğan. Halıqaralıq bitimgerlerdiñ qatısuımen 1994 jılı Armeniya men Äzerbayjan arasında atıstı toqtatu turalı uağdalastıq jasalğan. Alayda, soğan qaramastan, daulı aymaqpen şektesetin sızıq boyında äzerbayjan men armyan äskeri arasında bwğan deyin de kişigirim qaqtığıstar tıyılmağan.

Azat Europa / Azattıq radiosı