«Artıq istegen uaqıt üşin aqşa qosa ma?». “Qaydan?! Bastıqtar bizge “Do şesti çasov tı rabotal dlya sebya, a posle şesti tı doljen rabotat' dlya Pravitel'stva” dep üyretedi» deydi atın jariya etudi qalamaytın qızmetkerler. Keşki altıdan keyin bayğwstardıñ jipsiz baylanıp otırğanı. Üylengenderi balasın balabaqşadan aludı bir birine tapsırıp jatqanı. Qaptağan twrmısqa şıqpağan qızdar, üylenbegen jigitter. «Öy, aynalayındar, ömir ötip baradı, üylenbeysiñder me?» deymiz. «Oy, ağay, jwmıstan tüngi toğız, onda şığamız. Tanısuğa, qıdıruğa uaqıt qayda? Tañerteñ 08.50-de jwmısta bolu kerek. Elektrondıq kärtişkemen kirgizedi. Keşikseñ jaza tartasıñ, jalaqıñ azayıp qaluı kädik. Sondıqtan jeke ömirimizge uaqıt qalmaydı!» dep ağınan jarıladı keybir ini-qarındastarımız.

İs jüzinde olar 11-12 sağat jwmıs isteydi. Artıq istegen sağattarın ötep jatqan eşkim joq. Tipti senbi, jeksenbi künderi amalsız jwmısqa şığatındarı bar.

Sonda «Eñbek kodesi» kim üşin jazılğan? Eger Ükimet orındamasa, ministrlikter, äkimşilikter orındamasa ol Kodestiñ kimge keregi bar? Segiz sağat jwmıs mindetti. Qızmetkerlerdi qanauğa nege jol beriledi? Jipsiz baylanğan jerde jöndi nätije bola ma? Eger şeneunikterdiñ tañ atqannan tün jarımğa deyin istegeninen ekonomika güldenip keter bolsa onda Qazaqstan otızdıq tügili alğaşqı ondıqqa kirmes pe edi? Alayda statderekter ekonomikanıñ keri ketip bara jatqanın aydan anıq körsetip twr ğoy. Eger Ükimet öz jwmısın tiimdi wyımdastıra alsa şaruanı altığa deyin de tındıruğa boladı.

Sondıqtan keşki sağat altıdan keyin qızmetkerler eşkimniñ rwqsatınsız üylerine qayta berui kerek. Şeneunikter halıqtan zañğa bağınudı talap eterden bwrın tärtipke özderi bağınuı kerek dep oylaymın!

Marat Tokaşbaevtıñ facebook paraqşasınan alındı