شوۋ-بيزنيس

م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ جاڭا باسشىسى تاعايىندالدى

kerey.kz

 |  Feb 15, 2018

12 اقپان، 2018. قازاقستان رەسپۋبليكاسى مادەنيەت جانە سپورت
ءمينيسترىنىڭ بۇيرىعىمەن تانىمال قازاقستاندىق رەجيسسەر اسحات
ماەميروۆ م.اۋەزوۆ اتىنداعى قازاق مەملەكەتتىك اكادەميالىق
دراما تەاترى ديرەكتورى بولىپ تاعايىندالدى.
اسحات ماەميروۆ – قازاقستاننىڭ ەڭبەك سىڭىرگەن قايراتكەرى، فيلوسوفيا
عىلىمدارىنىڭ دوكتورى (PhD), «بولاشاق» پرەزيدەنت ستيپەندياسىنىڭ
يەگەرى. ت. جۇرگەنوۆ اتىنداعى قازاق ۇلتتىق ونەر اكادەمياسىن دراما تەاتر
رەجيسسەرى ماماندىعى بويىنشا اياقتاعان. 2008 جىلى فرانتسيانىڭ تانىمال
Université Sorbonne Nouvelle Paris 3 ۋنيۆەرسيتەتىندە ءبىلىم الىپ، دراما
ونەرىنىڭ پاريج ۇلتتىق كونسەرۆاتورياسىندا تاعىلىمدامادان وتكەن
بولاتىن. 2010 جىلى رەسەي تەاتر ونەر اكادەمياسىندا (گيتيس) تەاتر ونەرى
ماگيسترى دارەجەسىن قورعادى.
ەڭبەك جولىن باتىس قازاقستان وبلىستىق قازاق دراما تەاترىندا رەجيسسەر
بولىپ باستادى. قۇرمانعازى اتىنداعى ورال مۋزىكالىق كوللەدجىندە
«اكتەرلىك ونەر» ءبولىمىنىڭ مەڭگەرۋشىسى، ت. جۇرگەنوۆ اتىنداعى قازاق ۇلتتىق
ونەر اكادەمياسىنىڭ «تەاتر ونەرى» فاكۋلتەتىنىڭ دەكانى، قازاق ۇلتتىق
ونەر ۋنيۆەرسيتەتىنىڭ «اكتەر شەبەرلىگى جانە رەجيسسۋرا» كافەدراسىنىڭ
دوتسەنتى بولدى. شىعارماشىلىق جۇمىستارىنان بولەك، ونەرتانۋ بويىنشا
فيلوسوفيا دوكتورى رەتىندە عىلىمي ىزدەنۋىس جۇمىستارىنىڭ شەڭبەرى -
زاماناۋي رەجيسسۋراداعى ءداستۇر مەن جاڭاشىلدىق ۇردىستەرى، قازىرگى زامانعى
تەاتر ونەرىنىڭ دامۋ تەندەنتسيالارى سىندى تاقىرىپتاردى قامتيدى.
وتاندىق مادەنيەتتىڭ قازىرگى زامانعى ۇزدىك ارت-مەنەدجەرلەرى قاتارىنا
كىرەدى. ەلىمىزدىڭ مادەنيەت پەن ونەر سالاسىنداعى بەلگىلى ۇيىمدار –
«قازاقستاننىڭ رۋحاني قورى» اق، «قازاق اۋەندەرى» اق جەتەكشىلىك ەتتى. 2017
جىلى قازاقستاندىق مادەنيەتتىڭ كوش باسىنداعى ەڭ ءىرى مۋزىكالىق
ۇجىمداردىڭ ءبىرى – «قازاقكونتسەرت» مەملەكەتتىك كونتسەرتتىك ۇيىمىن
باسقاردى. ەلوردالىق «استانا ميۋزيكل» تەاترىنىڭ كوركەمدىك جەتەكشىسى
جانە قازاقستان تەاترلار اسسوتسياتسياسىنىڭ ۆيتسە-پرەزيدەنتى بولىپ
تابىلادى.
اسحات ماەميروۆتىڭ شىعارماشىلىق قىزمەتى تەاتر ونەرىمەن بايلانىستى.
ول ع.مۇسىرەپوۆ اتىنداعى قازاقتىڭ مەملەكەتتىك اكادەميالىق بالالار مەن
جاسوسپىرىمدەر تەاترىندا «قارا شەكپەن» (گ. حۋگاەۆ), م.اۋەزوۆ اتىنداعى
تەاتردا «قوشتاسقىم كەلمەيدى» (ا.ۆولودين), «ۇلىم ساعان ايتام»
(ب.بەدەلحان) اتتى سپەكتاكلدەردىڭ، اباي اتىنداعى مەملەكەتتىك اكادەميالىق
وپەرا جانە بالەت تەاترىندا س.مۇحامەدجانۆتىڭ «ايسۇلۋ» وپەراسى، «استانا
وپەرا» تەاترىندا «قىزجىبەك» وپەراسىن ساحنالاۋعا ات سالىستى. سونىمەن
بىرگە «رومەو مەن دجۋلەتتا» (ج.پرەسگۋرۆيك), «قىز جىبەك»
(ە.برۋسيلوۆسكي), «استانا» (ب.عافۋ، ا.ورەنبۋرگسكي) اتتى قازاقستاندىق
ميۋزيكلدەردىڭ قويۋشى رەجيسسەرى رەتىندە تانىلدى.

بەلگىلى قازاقستاندىق رەجيسسەر قازاقستاننىڭ تەاتر ونەرىن بىرنەشە رەت
حالىقارالىق ساحنالاردا تانىستىردى. اۆستريا، بەلگيا، گەرمانيا، يزرايل،
رەسەي، اقش، تۇركيا، فرانتسيا، ارمەنيا، گرۋزيا، پولشا، چەحيا جانە ت.ب.
مەملەكەتتەردە وتكىزىلگەن تەاتر فەستيۆالدەرىندە، سيمپوزيۋمدار مەن
فورۋمدارعا قاتىستى. 2009 جىلى قازاقستان ساحنا ونەرىنىڭ تاريحىندا
تۇڭعىش رەت نيۋ-يورك قالاسىندا وتكەن م.چەحوۆ اتىنداعى ءى حالىقارالىق
تەاتر فەستيۆالىندە «زووپاركتەگى وقيعا» سپەكتاكلىمەن (رەج.ا.ماەميروۆ)
لاۋرەات اتاندى (اقش). 2017 جىلى ونىڭ «اقتاستاعى احيكو» اتتى سپەكتاكلى
(رەج.ا.ماەميروۆ) توكيو قالاسىندا (جاپونيا) قويىلدى. وتكەن جىلدىڭ
سوڭىندا «ۇلى دالا تەاترى» اتتى ەۋروپالىق تۋرنە شەڭبەرىندە «قىز جىبەك»
ميۋزيكلىن (رەج.ا.ماەميروۆ) الەمنىڭ بەس استاناسى – بريۋسسەل، پاريج، ۆەنا،
بەرلين جانە ماسكەۋ قالالارىنىڭ كورەرمەندەرى ەرەكشە ىقىلاسپەن
قابىلدادى.

قر مسم ءباسپاسوز قىزمەتى