ۋكراينداردى بۇل سوعىس تەز ەسەيتىپ جىبەرگەن سەكىلدى.
kerey.kz
باتىس ەندى ۋكرايناعا ورىستارعا توتەپ بەرەتىن قارۋلار ەمەس، مۇمكىندىگىنشە ورىستاردى كەرى ىعىستىرىپ، باسىپ العان تەرريتوريالاردان قۋىپ شىعىپ، تۇگەل قايتارىپ الۋىنا مۇمكىندىك بەرەتىن قارۋلاردى بەرۋگە كوشتى.باتىس شاماسى ورىستاردىڭ اتوم قارۋىن الباتى قولدانا المايتىنىن، بۇل رەت ۋكراينا جەڭىلسە، تۇتاس ەركىندىك الەمىنە ودان سايىن قاۋىپ تونەتىنىن تۇسىنگەن سەكىلدى. ءتىپتى ۋكراينا وسىعان دەيىن رەسەيمەن جاقىن دەپ ونشا جاقتىرماي كەلگەن گەرمانيانىڭ ءوزى ۋكرايناعا مىقتى قارۋلار بەرۋ شەشىمىنە كەلدى.
جاڭا كۇشتى قارۋلار ءالى كەلىپ بولماعانىمەن، ونىڭ بۋى ۋكراينانى جەلپىندىرىپ تاستاعانى، ال ورىستاردى ساستىرعانى انىق. 100 كۇن سوعىسسا دا، باتىل قارسىلىققا تاپ كەلىپ، كوپ ەشتەڭەنى يەلەي الماعان ورىستار ءۇشىن جاعداي ءتىپتى دە قيىنداي تۇسەرى انىق. ورىستار شىداي الماي كيەۆتى الىستان KH-22 قاناتتى زىمىراندارىمەن اتقىلاپ سەس كورسەتتى، “قورىققان بۇرىن جۇدىرىقتايدى”، نەمەسە “شابان ۇيرەك بۇرىن ۇشادى” دەگەن ناق وسى بولار.
الدىن الا كەسىپ ايتۋ قيىن. دەگەنمەن، ەندىگى سوعىستىڭ بۇگى مەن شىگى ۋكراينداردىڭ جالعاستى باتىرلىق تانىتۋىنا بايلانىستى بولماق. ىشكى ساتقىندار مەن قورقاقتاردىڭ ىقپالىنا ءتۇسىپ قالماۋ وتە ماڭىزدى. سونداي-اق سوعىس قيمىلدارىن دۇرىس ۇيىمداستىرۋ، قارۋلاردى ءونىمدى پايدالانا ءبىلۋ، اسىرەسە رەسەيدىڭ كۇش تسەنترلەرىن تالقانداپ، ءوزارا بايلانىس جولدارىن كەسە الۋ دەگەندەر سوعىس تاعدىرىن شەشەدى دەپ ويلايمىن.
ۋكراينا بەينە زەلەنسكي ايتقانداي، ەندى “سوعىستا باسىمدىققا يە بولماي تۇرىپ، ەشقانداي كەلىسىم ۇستەلىنە وتىرمايدى”. ال، لاۆروۆ بىلاي دەپ شاعىمداندى: “باتىس ەلدەرى ۋكراينانىڭ رەسەيمەن كەلىسىمگە كەلۋىنە جول بەرمەي جاتىر.” – وسى ەكى ءسوزدىڭ لامىنەن-اق جاعدايدىڭ قالاي وزگەرىپ بارا جاتقانىن اڭعارۋعا بولادى.
رەسەي بۇرىشقا قىسىلۋدا. ول ودان سايىن بۇلقان-تالقان بولىپ، تالاي نارسەنى بۇلدىرەتىنى انىق، بىراق ءوز-ءوزىن دە بۇلدىرەدى.
ايتپاقشى، سوعىس ادامدى اقىلدى ەتەدى. مىسالى، اقش بەرگەن جاۆەليندەردىڭ باتەرياسى تاۋسىلعاندا، ۋكرايندار ونى اشىپ، موتوتسيكلدىڭ باتەرياسىمەن زاريادتاۋ امالىن ويلاپ تاپقان ەكەن. ۋكراينداردى بۇل سوعىس تەز ەسەيتىپ جىبەرگەن سەكىلدى.
پىكىر قالدىرۋ